ملوخية حمرااااا ( حدث بالفعل )

طبعا المعروف أن الملوخية لونها أخضر من قديم الأزل , بس عشان رمضان و عشان نجدد و نعمل فطار مختلف الملوخية اللى أنا جايبهالكم النهاردة لونها أحمر , أه أحمر , متستغربوش , تعالوا نشوف الطريقة .......



الأدوات بتاعتنا هتكون ....

ملوخية



مخرطة



كوب طماطم متسبكه او 3معالق صلصه و
لازم تكون الطماطم تقيله ومتسبكه علشان ما تخففش الملوخيه




كوب و نص شربة .



بصلة واحدة صغيرة



فصين توم أو تلاتة أو أربعة , انت و ذوقك .



حبة كزبرة ناشفة ناعمة



معلقتين سمنة عشان الطشة





بعد ما حضرنا الحاجت اللى فوق دى كلها , نبدأ بقا فى التنفيذ يا معلم , و لازم تنفذ الكلام ده خطوة خطوة , بالترتيب عشان الملوخية تبقى حمرا , و الخطوات بالترتيب هى ......

أول حاجة يا ريس تقطف الملوخية و تغسلها كويس و تسيبها لغاية ما تاخد حمام الشمس المتين , تسيبها تنشف يعنى .

مش هنقعد بقا نستنى الملوخية لغاية ما تنشف , لأ , فى الفترة دى عايزك تجيبلى كوب و نص الشوربة اللى قولنا عليهم و نحطه على النار عشان يغلى .

لغاية بقا ما الشوربة تغلى سيادتك تروح تجيبلى الكبة المرعبة اللى عندكم , تحط الفيشة , و تروح تجيبلى ....

- الملوخية بعد ما نشفت و اتحرقت فى الشمس .
- البصلة الظريفة بتاعتنا بعد ما تقطعها 8 حتت كده ولا حاجة عشان متبوظليش الكبة و متنساش تمضغ لبان و انت بتقطع البصل عشان مش تدمع .
- فصين التوم بتوعنا .
- كوب و نص الشوربة هناخد منه نص كوب بس و نسيب الكوب اللى فاضل عالنار زى ما هو.
- رشة كزبرة ناعمة بقا بإيديك الحلوة دى يا ريس .

و بعد ما تحط الناس اللى فوق دى كلها فى الكبة , سمى الله و دور يا معلم .

فى الوقت ده بقا يكون كوب الشوربة اللى سيبناه عالنار غلى و اتحرق و اتقطع نفسه كمان , نقوم احنا بقا ايه ؟ , نقوم جايبين نجم الحفلة بتاعتنا دى اللى هى الصلصة ( أو الطماطم ) طبعا و نحطها عالشوربة و هى بتغلى , و نستنى بقا لغاية ما الخليط العجيب ده يغلى .

نيجى بقا للحظة تاريخية و ننزل بالملوخية أو بمعنى أصح ننزل بالخليط اللى هريناه فى الكبة , نحط الخليط ده على الصلصة و الشوربة بعد ما إتحرقوا و نقلب لغاية ما تاخدلها غلوتين كده ولا حاجة .

فى الوقت ده قبل ما الملوخية تغليلها غلوتين , نجيب كام فص توم تانيين على حبة كزبرة تانيين برضه و ندقهم صح لغاية ما يتهروا كده , و نقوم نقليهم ف حتة سمنة و نجيبهم فى ايدينا الشمال .

فى الوقت ده تكون الملوخيةغليت غلوتين كده ولا حاجة نقوم ماسكين حلة الملوخية بإيدينا اليمين و نفاجئها بالخليط اللى ف إيدينا الشمال , تقوم تحصل الطشة , و نقوم احنا قافلين غطه الحلة و كابين الملوخية فى أطباق و مقدمينها للمساكين اللى هيكلوها .

و بالهنا و الشفا و ربنا يستر , و متنسوش الرقم ده 123 .