بريد سريع .. للجميع







المرسل اليه:


المصريون المسلمون


الرسالة:


عايز تعمل الصح؟

مش بس تبعت لمسيحيي و تشارك في مواضيع التعزية



لو نزلت تشتري حاجة من حد ولقيته مسيحي قل له احنا كمسلمين زعلانين جدا على اللي حصل لكم و بنشارككم مشاعركم

و اللي عمل كده مش مسلم حتى لو كان مسلم

الكلمتين دول ح يفرقوا معاه جدا و يخلوه يقول لغيره ان حد ما يعرفوش قال له احنا حاسين بيكم

وبكده يبقى انت طيبت خاطر شريكك المصري و كمان كسبت ثواب عشان وضحت الوجه الحقيقي للاسلام

مرة كانت بنت بتشتري حاجة من صيدلية برة المنطقة ولاحظت ان الانسة مكتئبة والتليفزيون على قناة مسيحية وجايبين الجثامين وكده

قالت لها احنا زعلانين زيكم والله ومافيش فرق بينا وبينكم في حاجة زي دي ربنا يصبركم

البنت ابتسمت وقالت ليها شكرا حسيت انها كانت محتاجة تحس ان الناس كلها واقفة جنبهم وحاسين بيهم





المرسل اليه:


اي مسلم كان لما تيجي سيرة "القاعدة" يحس من جواه بالفخر لانهم حاربوا امريكا و لانهم منتمين للاسلام ويستغرب وصف الاعلام لهم بالارهابيين


الرسالة:


دلوقتي بس لما قتلوا مصريين يعني جيرانك وصحابك (و ممكن يكرروها تاني و تالت) اتأكدت ان القاعدة ارهابيين؟

امبارح كان انفجار بالليل و في شارع صغير بكره في سوق في شبرا على اساس الكثافة المسيحية و يكون عدد اكبر و معاهم عدد اكبر من المسلمين (بعد الشر على الكل)

ممكن اولادنا يكونوا رايحين يركبوا باص المدرسة و يكون فيه عربية مفخخة قريبة منهم (بعد الشر لا قدر الله)!

طيب ما تفجيراتهم في كل مكان بتقتل مدنيين سواء كانوا عراقيين او افغان او امريكان!

الارهاب واحد ومالوش دين، و قتل المدنيين حرام

وما دام حرام يبقى اللي القاعدة بتعمله ده حرام ومخالف للشرع يعني فئة ضالة مش مسلمين

"المسلم من سلم المسلمون من لسانه ويده"

"مَنْ قَتَلَ نَفْسًا مُعَاهَدًا لَمْ يَرِحْ رَائِحَةَ الْجَنَّةِ وَإِنَّ رِيحَهَا لَيُوجَدُ مِنْ مَسِيرَةِ أَرْبَعِينَ عَامًا"

يبقى نصحح مفهومنا عن القاعدة ونرفضها تماما!





المرسل اليه:


اي مسلم كان لما ييجي كلام عن المسيحيين يتمنى لهم الشر


الرسالة:


شعورك ايه دلوقتي بعد ما شفت وتابعت المصيبة اللي حصلت وصور القتل والدم؟

لو لسه زي ما انت خلي بالك ان فيه مشكلة في انسانيتك!

"مُرّ على رسول الله صلى الله عليه و سلم بجنازة يهودي فوقف، فقالوا له: إنها جنازة يهودي، فقال: أوليست نفسا!؟ إن للموت فزعًا"

الحساسية في التعامل دلوقتي ما كانتش موجود على ايام الرسول صلى الله عليه و سلم

للاسف هي مستحدثة نتيجة بعض الناس اللي بيفهموا الدين بطريقتهم الخاصة بعيدا عن الفهم الصحيح

دول نصارى نجران لما وردوا على الرسول صلى الله عليه و سلم جه وقت صلاتهم وقفوا يصلوا في المسجد النبوي تجاه الشرق

لسه حد ح يمنعهم قام الرسول صلى الله عليه وسلم قال لهم "دعوهم" وكملوا صلاتهم فعلا!

لما دخل عليه عدي بن حاتم الطائي قعده على وسادته وقعد هو على الارض صلى الله عليه وسلم!

الموضوع ابسط من كده .. و مش في مصلحة مسلم ولا مسيحي ان حد منهم يصيبه اذى!

اظهر ارتباطك بالمسيحيين قدام الارهابيين عشان يعرفوا ان مالهمش مكان في بلادنا!

عشان يعرفوا ان مافيش فرق بين مسلم ومسيحي في الحق في الحياة!

عشان تثبت للناس ان سنة الرسول صلى الله عليه وسلم هي السماحة!






المرسل اليه:


الاخوة المسيحيون


الرسالة:


احنا بنعزيكم في اللي حصل ليلة راس السنة وفي كل حادث حصل قبلها

وبنأكد لكم ان اللي يمسكم يمسنا ومافيش فرق بينا وبينكم في الحق في الحياة والاحساس بالامان

وندعو الله ان تكون هذه هي اخر الاحزان





المرسل اليه:


الاخوة المسيحيون الغاضبون


الرسالة:


اللوم كل اللوم يقع على الامن اللي مشغول في تأمين التشريفات في الشوارع و سايب امن مصر

اللي عمل الحادث ده مش مسلم ولو قال انه مسلم فالمسلمين متبرئين منه والاسلام بريء منه

(زي في كل ديانة لما بنلاقي حد بيتصرف غلط وبيفتكر انه كده متدين وبرضي ربنا)

ومهما حصل من خلافات بيننا فلا يمكن ان تصل الى حد الترويع والقتل لان ده مش موجود في الاسلام

خلونا نفضل ايد واحدة ويكون هدفنا الحصول على حقوقنا من اللي مهدرين حقوقنا





المرسل اليه:


الارهابيون من القاعدة او اسرائيل او غيرهم


الرسالة:


انتو جيتوا البلد الغلط

والمشاركات في البرامج الحوارية من اول امبارح من كل الطوائف والدوائر والمستويات رسالة واضحة لكم

ان مصر مش بلد فيها مسلمين وفيها مسيحيين .. لا .. مصر بلد واحدة للمصريين

واللي انتو عملتوه مش ح يخلينا نرحب بيكم ونشاور لكم على المسيحيين تضربوهم زي ما انتو فاكرين

بالعكس ده زود الترابط بين الطوائف المختلفة في مصر

وربنا قادر على حمايتنا منكم








منقوووووووووووووووووووول