السلام عليكم ورحمته وبركاته
ازيكو يا كل النجعاويه
يارب يكون الكل بخير
الموضوع ومافيه ليه يا زمان مسبتناش ابرياء؟
كنت لسه بفكر في زمان ودلوقتي
يمكن انا مش كبيره اوي بس حاسه اني عيشت كتير اوي
زمان واحنا صغيرين بابا وماما مسئولين عني في كل حاجه
حتي لو حد ضربني اوي اي حاجه اجري عليهم
كنت حاسه ان هي دي الدنيا وبس
الدنيا كلها بيتنا واهلي
وبنطلع من الابتدائيه للاعداديه للثانويه
هو هو نفس تفكيرنا ومفيش مسئوليه علينا
مش متعودين اذا اتحطينا في موقف نتصرف فيه ازاي
ولما روحنا الجامعه لقينا عالم وناس كتييير اوي
ودنيا واسعه ايه الناس دي كلها كانت مستخبيه فين
وبرده عدت الجامعه واحنا مستخبيين في بيوتنا من غير منتعرض لاي اختبارات حقيقيه في الحياه
تيجي بقي لما تروح لمصلحه حكوميه
وتقف في طابور طويل عريض ولا زمن البطاله اللي احنا فيه
ولا انك لازم تكون مسئول عن نفسك شويه بقي
وتصرف علي نفسك وتكوم نفسك
ولو افترضنا اشتغلت مع مدير رخم وبيضايقك
تلاقيك انك طول حياتك اللي فاتت شيء ودلوقتي شيء رابع خالص
تلاقي ان لازم تتعلم ازاي تتصرف وتزاحم وتبقي فهلوي
وتاخدها من بوء الاسد زي مبيقولو لقمه العيش
المهم بعد الرغي ده كله اني عاوزه اقول
ان بعد مكنا ابرياء وعيب وميصحش والاحترام
لازم تتغير عشان تعرف تعيش وتكون ناصح ومدقدق
طيب هو العيب كده في تربيتنا؟
ولا الواحد ينفع يعيش محترم وابن ناس في الزمن ده عادي ؟
ولا لازم ناخد كورس في اخر مرحله في التعليم اننا نكون مدقدقين؟
ولا نفضل عايشين مع امنا وابونا وهما يتصرفو؟