هو أنا بعمل في نفسي كده ليه ؟

سؤال جه في بالي وأنا بفكر في حالي
وقلت لنفسي ....

ليه أنا مختلف عن غيري ؟!
ليه بحاول أعمل حاجات عارف إني لما أعملها الناس ممكن تنقدني ؟!

هو أنا ليه بصلي ؟
ليه خمس فروض في اليوم ، ومش مرة واحدة لأ ده كل يوم ، ومش بس كل يوم ده المفروض أكون ناوي إني لحد ما أموت إني مقطعش الصلاة ؟!!

هو أنا بعمل في نفسي كده ليه ؟

وليه لما بدي لحد معاد براعي فيه وقت الصلاة يعني بقوله نتقابل بعد الصلاة الفلانية ، أو نصلي في المكان الفلاني ونتقابل ؟ مع إن في غيري مش بيفكر كده ممكن يكون مش في دماغه الصلاة خالص ؟!!

هو أنا بعمل في نفسي كده ليه ؟

الإنسان فطرته إنه ينجذب للطرف الآخر ، ليه الولاد نفسهم يتعرفوا ويصاحبوا بنات وليه أنا مش عايز بل إن لو واحدة عرضت عليا شيء زي ده أنا اللي أرفض ؟!!

هو أنا بعمل في نفسي كده ليه ؟

ليه الناس بتسمع أغاني وأنا ببعد عنها بل إني مش بحب أسمعها ولو لقيتها شغالة ببعد عنها ؟!!

هو أنا بعمل في نفسي كده ليه ؟

ليه الناس ممكن تجري ورا الفلوس الحلال والحرام وأنا لو جاتني فلوس حرام أرفض وممكن أسيبها في الشارع وأمشي ؟!!
طيب اشمعنا أنا بقول لأ للفلوس الحرام ؟!

هو أنا بعمل في نفسي كده ليه ؟

ليه أنا لو اشتريت أكل من مطعم مثلاً ولقيت الحساب غلط وهو ليه عندي فلوس برجعله واديله فلوسه وغيري ممكن يضحك بخبث ويمشي ؟!!

هو أنا بعمل في نفسي كده ليه ؟

هو أنا ليه لو راكب مواصلة والسواق مخدش باله إني مدفعتش الأجرة أنا بنفسي اللي أقوله إنت ليك عندي فلوس !!

ليه لما أشوف الغلط أقول ده غلط وأنصح غيري إنه ميعملوش ؟!

ليه بقول الحق حتى ولو هيضرني في حين إن غيري بيقولك عيش جبان تموت مستور ؟!!!

هو أنا بعمل في نفسي كده ليه ؟

ليه الشباب في زمانا ممكن دمعة تنزل من عينه عشان بنت أو عشان أغنية أو عشان مشهد في فيلم ، وليه أنا عيني تنزل منها الدموع والدموع عشان واحد معرفوش في فلسطين أو العراق أو أي دولة مسلمة ؟!
إيه اللي خلاني مختلف كده ؟

ليه الشباب نفسه يقلد فلان وعلان عشان يكون شيك واستايل ، وأنا بقلد حد تاني خالص بالنسبة ليا أسطع من نجم في السماء ؟!!

حاجات كتير أوي أكتر من إني أقدر أذكرها في موضوع ، بلاقي إن الواحد بيختلف فيها عن الواقع ومهما اتغير الواقع لازم أكون ثابت على مبادئي ....
ايه اللي خلاني مختلف كده ؟
هو أنا اتخلقت بطريقة غير كل الناس !
هو برمجة قلبي وعقلي مختلفة عن كل الناس !!

بالرغم إني عارف إني هكون محط أنظار النقد وعارف إن ناس كتير هتلومني
عارف إن بيتكتب عن واحد زيي في الجرايد والصحف
عارف إن بيتعمل برامج التوك شو عشان يدرسوا حالة واحد زيي
عارف إني بالرغم إني متمسك بالصح في زمن اللاصح هتوصف بإني متشدد ورجعي في حين إني معملتش حاجة غير الصح ومقتش حاجة غير الحق !!
عارف إن ناس كتير هتفتكرني مجنون عشان بعمل في نفسي وتقولك يا بني أنت فاهم الدنيا غلط !!
مش مهم إني أكون فاهمها غلط المهم إني أكون فاهم الآخرة صح !!

وإجابة السؤال المتكرر ... هو أنا بعمل في نفسي كده ليه ؟
الإجــــــــابــــــــة ببســــــــــاطــــــــة
صحيح ... أنا بعمل كده عشان عايز ادخل الجنة !!

والسؤال اللي نفسي أطرحه ... ايه اللي هيضرني لما أعمل كده وفي الآخر أدخل الجنة ؟!!


إمضــاء : خيال أي إنسان نفسه يلتزم !!

@@@@@@@@@@@@@@@@@@@@

قال صلى الله عليه وسلم : ( يؤتى بأنعم أهل الدنيا من أهل النار يوم القيامة فيصبغ في النار صبغة ثم يقــال : يــا ابــن آدم .. هل رأيت خيرًا قط ؟ هل مر بك نعيم قط ؟ فيقول : لا والله يا رب ! ، ويؤتى بأشد الناس بؤسًا في الدنيا من أهل الجنة فيصبغ في الجنة صبغة فيقال له : يــا ابــن آدم .. هل رأيت بؤسًا قط ؟ هل مر بك شدة قط ؟ فيقول : لا والله يا رب ! ما مر بي بؤس قط ولا رأيت شدة قط . ) صحيح مسلم

قال رسول الله : ( الدنيا سجن المؤمن وجنة الكافر ) صحيح مسلم

وقال صلى الله عليه وسلم : ( يأتي على الناس زمان الصابر فيهم على دينه كالقابض على الجمر ) صححه الألباني

اللـهم إنا نسـألك الجنـة
هو أنا بعمل في&#32.jpg