بسم الله الرحمن الرحيم

والصلاة والسلام على اشرف المرسلين سيدنا محمد عليه الصلاة وافضل السلام

صلب الموضوع
زى ما حاضرتكم شايفين كدة الموضوع باين من عنوانه وهوة "ازاى تسوق نفسك" يعنى ازاى تدخل انترفيو وتتكلم بمنتهى الشجاعة والثقة والثبات وشوية حاجت كدة....... وفى الموضوع هنا هنتطرق لكل جزئية خاصة بالانترفيو ومش هتكلم بطريقة الكتب والورقة والقلم.........لآ........انا هتكلم بلسانى انا,,,,,, بحكم خبرتى المتواضعة وكم الانترفيو اللى انا دخلته وكمان هحكى ان شاء الله عن كل انترفيو دخلته من اول ما تخرجت لغاية ما وصلت للبنك الاهلى اللى انا فيه حاليا

السبب اللى خلانى اعمل الموضوع دة
ان القسم هنا بيتكلم ديما عن فرص للتوظيف سواء فى بنوك او شركات واسئلة كتير ديما بتسال "اية اللى حصل
معاك فى الانترفيو وهكذا "......... واوقات الناس ترد واوقات كتير ما تردش

كمان فى نقطة تانية
ان انتاج القسم بدأ يقل وكل المواضيع بتتكلم حول نقطة واحدة وهية البنوك اللى محتاج ناس دلوقت وفى محافظة اية والناس قدمت ازاى وكدة ..................بس الناس نسيت نقطة مهمه قوى وهية ازاى تخلى من نفسها شىء مطلوب وله قيمة علمية وتخلى اى مكان تدخله يتمنى انه يشغلك معاه وكل دة والحمد لله حصل معايا ودة اللى هحكية ان شاء الله فى السطور اللى جاية

ملحوظة
انا تعمدت انى اكتب الموضوع بالعامية علشان مايبقاش ممل ويزهق فارجو ان الناس تتقبلى فكرتى وبحكم المواضيع الللى عملتها قبل كدة بالعامية وكانت الناس مبسوطة قوى من طريقة العرض وان شاء الله يتحقق كمان فى الموضوع دة

يلا بينا نتكلم
سالت نفسك هوة انا لية كل ماقدم على اميل او بالبريد او باى وسيلة تانية "اين كان نوعها"..........محدش يعبرنى ولا يبعتلى لية؟

الاجابة :اكيد فى حاجة غلط (يا اما فى الاتش ار بتاع البنك او فينا احنا)
طيب لو فى الاتش ار يبقى الغلط فين؟؟؟؟؟؟
اكيد الاتش ار معندهمش غلط ولا بيشتغلوا الناس علشان يقدموا بالكميات الضخمة دية وفى الاخر ميعبروش حد
يبقى الغلط اكيد فينا احنا!!!!!!!!!!!!!!!
اة فعلا الغلط عندنا احنا........(اقولك فين الغلط)
1-السى فى بتاع حضرتك مش مكتوب باسلوب جذاب ومش ملفت للانتباه (مش هتصدق ان ليا واحد صاحبى اتقبل فى شركة كبيرة بسبب السى فى بتاعه ولما اشتغل قالوله ان احنا قبلناك بنسبة 70% بسبب السي فى بتاعك)
تصدق ان دة ممكن يحصل؟؟؟!!! فعلا دة حصل

يبقى اول حاجة لازم السي فى بتاعنا يكون منظم وله اولويات ومكتوب بصيغه فيها حبكة واسلوب مميز يجذب اللى يقراه وكمان فى ترتيب فى اولويات السي فى يعنى مثلا (فى البداية مقدمة صغيرة وبعد كدة بياناتك الشخصية وبعد كدة الهدف من الالتحاق بالوظبفة وبعد كدة الدرجة العلمية اللى انت عليها وبعدين الكورسات اللى معاك وبعدين التدريب سواء فى بنك او شركة وبعد كدة النهاية)


2-تانى سبب يخلى الاتش ار ما يتصلش بيك وهوة الكورسات اللى حضرتك حاصل عليها او خبراتك العلمية او المهنية بمعنى انى كتير بلاقى ناس بتاخد كورسات ملهاش علاقة بينا خالص وعلى سبيل المثال وليس الحصر تلاقى ناس بتاخد كورسات فى الفيجوال بيزك والجرافكس والفوتوشوب وكورس اتش ار وحاجات تانية ملهاش علاقة بالمحاسبة او بشغلنا الاساسى.........
بيفرق قوى مع الاتش ار انك تكون اشتغلت قبل كدة حتى لو فى مكتب محاسبة حتى لو سيلز حتى لو تدريب بس ..........فى اى مكان
انت عارف انك لو متدرب فى بنك وانت فى الكلية او حتى شركة بتميزك فى الاختيار عن الناس اللى ما اتدربتش

ودة لسبب بسيط جدا جدا
انت لو اشتغلت فى اى مكان او حتى ادربت دة معناه انك انتقلت من الحياة الاكادمية الى الحياه المهنية وراحت منك رهبة التعامل مع الناس ومعناه انك كل يوم بتقوم بدرى علشان تروح الشغل وبتلتزم بمواعيد معينة وبقوانين المكان اللى انت بتشتغل فية او حتى بتدرب فيه
تخيل بقى نفسك متعرفش ولا حاجة من دية هل ممكن الاتش ار يفكر انه يتصل بيك علشان يوجع دماغه مع واحد ""ابيض يا ورد"" زى ما بنقول بالبلدى ...............وما يعرفش حتى نظام العمل ماشي ازاى بس مش هوة دة كل حاجة ومش هوة دة الاساس

3-الحاجة التالته بقي وهية الانترفيو ودة الاساس اللى بتكلم علية"وهوة ازاى تبيع نفسك فى الانترفيو" واقصد بتبيع نفسك"انك ازاى تسوق نفسك،ازاى تخلى من نفسك سلعه تشبة الجوهرة والناس بتتلاهف عليها وعايزة تشتريها باى تمن" هوة دة اللى انا بتكلم عنه"
طبعا كلنا لازم نؤمن بان اى شغل دة رزق وربنا كاتبه لعبادة ولو ليك نصيب فيه اكيد هتاخده لو مفيش نصيب يبقى مكتوب لغيرك ولكن برضو كل شىء وله سبب والسبب انك تعمل اقصى ما عندك فى الانترفيو علشان تتقبل وربنا يكتبلك الخير فى شغلك الجديد

حجات لازم تكون عارفها وفاهمها ودارسها كويس قبل ما تروح اى انترفيو:
1-معلومات عن الاحداث الجارية خصوصا المالية وشوية سياسية زى الازمة العالمية وافلاس بنوك معينة وشركات تامين وحاجات زى كدة
2-تبقى عارف كويس وفاكر محتوى كل كورس انت اخدته لان ناس كتير بتاخد كورسات كتير ومن كترها بتنسي الكورس كان بتكلم عن اية لان فى الغالب الراجل بتاع الاتش ار بيناقشك فى اغلب محتوى السي فى وممكن يسالك عن الكورس اللى انت كاتبه............ وبالمناسبة"ممكن يسالك اية احسن مادة كنت بتحبها فى الكلية وجبت فيها تقدير؟"وخلى بالك السؤال دة مش من فراغ يعنى فى سؤال ديما بيبقى تابع لية وفى ديلة وهوة """"طيب كلمنى عن الجزئية الخاصة بكذا فى المادة اللى انت ذكرتها""ويبدأ يسالك فيها.............
3-اهم شىء بقي وهوة الاستعداد النفسي بمعنى انك تبقى مروق بالك ومش قلقان ولا متضايق من حاجة ولازم تكون واثق من نفسك وعندك ثبات عالى وتركيزك عالى........... برضو (الابتسامه الخفيفة ،الوقار،الذكاء فى التصرف، الثقة اللى مش زايدة عن اللزوم،جرىء،ودود،منظم فى كلامك،عارف هتقول اية ومش هتقول اية،خليك صريح وبلاش تكذب لانه ممكن يسالك سؤال فى اول الانترفيو ويقوله بصيغه تانية فى نهاية الانترفيو و انت مش واخد بالك وتجاوب باجابة مختلفة وكدة كلامك يبقى متناقض وبعد كدة "يلا السلامة"..........وبعدين يا اخى الكذب حرام(بلاش علشان الراجل خليها علشان ربنا) ههههههههههه

0000لا0000(لا تفعل الاتى):-
(لاللانفعال،لا للخجل،لا تكن احمق،لاتكن ثرثار يعنى ماتتكلمش كتير وتلوك على الفاضى وتبقى فزلوكة وتعمل فيها ابو العرييييف.......،تجنب الضحك فى مواقف لاتتطلب منك حتى الابتسامه،تجنب الهزار يعنى بالبلدى مش هوة دة المكان اللى الواحد ممكن فيه يستخف دمه)

هام وخطير جداجدا جدا

اياك ثم اياك ثم ايالك -مهما كانت درجتك العلمية وخبراتك العملية- انك تستخف بعقلية اللى قدامك مهما كان سازج فى نظرك واعرف كويس ان مفيش حد فى الاتش ار اهبل وبرياله.......وماتحاولش ابدا تحسسه انك احسن منه حتى لو انت كدة

ماتكنش كثير الكلام لان فى مثل بيقول"من كثر كلامه كثرت سقطاته"
كل كلمة طالعه من لسان ديما تكون بميزان لان الكلمه لها اتجاة من اتنين يا اما هتبقى ليك او عليك........
اعرف شخصية الشخص المحاور بمعنى انك تقرا تفكيرة وتعرف هوة عاوز اية ومركز على اية وفى الغالب ديما بيعرف طريقة تفكيرك وطريقتك فى الكلام وردود افعالك وتصرفاتك فى مواقف معينة وهوة ممكن يحط فى موقف اثناء الانترفيو من غير ما تاخد بالك او يحصل موقف بالصدفة ويشوف رد فعلك وعلى سبيل المثال وليس الحصر"دخل عليكم زميل واتكلم فى موضوع معين قدامك...................وقتها هيشوف... هل انت مركز معاه ولا مركز فى حاجة تانية وممكن يخليك تشارك فى الحوار ويشوف طريقة كلامك وتصرفك ورد فعلك
مثا ل تانى الموبيل رن وهوة مش عاوز يرد ويسالك ارد ولا لآ وبرضو هيشوف انت هتقول اية........
مثال تالت يولع سجارة (ودية مش بتحصل الا فى الاماكن النص كوم) ويسالك انت مضايق منها ولا عادى...........خصوصا لما يسالك فى اول الانترفيو انت بدخن ولالآ..............

ديما:

لازم يكون فيه اسئلة ذكاء واختبار تفكيرك وردود افعال ومدى تصورك وتخيلك للامور..........

حاول تجذب المحاور لمنطقة كلام انت حاببب تتكلم فيها وحاسس انك هتبدع فيها يعنى ارمى الكورة فى ملعبة وانت اللى تشوط.......انت بتحب البورصة وفاهم فيها كلمة عن كورساتك فيها واشرحله اللى حصل فى السهم الفلانى ولو كان حصل كذا كان ممكن نتجنب كذا..........ورايك مثلا فى حل المشكلة وسببها وازاى نعاجلها فى مصر ونواجهها ازاى لو حصلت تانى وهكذا.........


الاسئلة الشائعة

فى الغالب او بنسبة 90% فى اى انترفيو رسمى فية خمس او ستة اسئلة معروفين:
1-عرف نفسك
2-نفسك تبقى اية بعد خمس سنين او طموحك اية فى السنين القادمة
3-قول نقطتين ضعف ونقطتين قوة فيك
4-يسالك عن الحاجة اللى انت رايح تشتغل فيها يعنى لو خدمة عملا يسالك تعرف اية عنها لو عمليات يسالك عاوز تشتغل اية فى العمليات او تعرف اية عنها وهكذا
5-لية شايف نفسك مناسب للوظيفة دية وقولى الاسباب اللى تخلينى اقبلك معانا فى البنك او الشركة بتاعتنا
6-عاوز تسيب شغلك الحالى لية (دة لو كنت شغال قبل كدة)

طبعا مش اقل من ثلاث اسئلة من الخمسة لازم تتسالهم فى اى انترفيو.

انا برجح انى ما اجاوبش على الاسئلة لدية لان لو جاوبت اجابة معينة هتبقى Standard وتتحفظ ويبقى كل مصر بترد نفس الرد فى اى انترفيو فى اى مكان وفى اى وقت...............

وانا سايبها لتفكيرك وزوقك ياعم وانت وشطارتك

الانترفيو انواع:
1-انترفيو فردى(يعنى انت وحد من الاتش ار)
2-انترفيو جماعى(مجموعه من المتقدمين للوظيفة وحد من الاتش ار)
3-اكتر من محاور وانت لوحدك او معاك حد

من رايي اسهلم واحد من الاتش ار ومجموعه من المتقدمين لانك بتحس بالامان اكتر وممكن تستفيد من خبرة اللى قبلك وتتجنب الاخطاء اللى وقعوا فيها وكمان بتحس انك مش وحدانى والتركيز كله مش عليك لوحدك........

كل انترفيو على حسب الوظيفة اللى انت متقدملها ودة هيبان فى كلامى عن تجربتى الشخصية






[CENTER]
تجربتى الشخصية


انا اشتغلت فى اربع اماكن تقريبا فى اقل من خمس شهور
طبعا مستغرب وهتقول اية الهبل دة ........صح.........

هقولك على حاجة :ديما الانسان بيسعى للافضل وطالما انت شايف انك ممكن تشتغل فى اى حاجة فى اى مكان وفى وقت تحت اى ظرف (طبعا من غير من نغضب ربنا) يبقى انت كدة ولد تمام.

انا فى البداية كنت رافض انى اشتغل سيلز ولكن كنت غلطان !!!!!!!!!!
عارف لية؟؟؟؟؟؟؟
لان السيلز دة اكتر حد ممكن يتحط تحت ضغط شغل وضغط اعصاب ومعروف عنه ان يعرف يتكلم لانه اصلا بياع كلام وهنا يكمن السر ومش هقولك انى واد فت ومقطع السمكة وديلها واعرف كل حاجة (لا والله انا واحد غلبان خالص وكنت يدوب اعرف ارد على عميل فى مواقف عادية ) بس لما تندمج مع الناس اللى ليهم فى الكلام اكيد لازم هتتعلم منهم وهتلقط الصنعه زى ما بيقولوا..........................
الفايدة من الكلام دة اية..........
انى عاوز اقولك : المواقف الكتير اللى انت بتتحط فيها مع الناس و تقابل صعوبات ومشاكل وبعون الله تحلها دية فى حد ذاتها خبرة كبيرة جدا وتخليك تدخل اى مكان وتتكلم بمنتهى الشجاعه والجراءة ومنتهى الثقة


الاربع اماكن اللى انا اشتغلت فيهم:-

1-سيتى بنك (سيلز) سابقا
2-HSBC(سيلز او ممثل مبيعات الخدمات البنكية الشخصية لانو ماكنش سيلز بس) سابقا
3-شركة اتصالاات (011) خدمة عملاء دولى سابقا
4-البنك الاهلى المصرى (تيللر) حاليا


اكيد انت ملاحظ ان كل دول Brand Names يعنى مش بيقبلوا اى حد وانا مش بقول كدة علشان اكبر او اعظم من نفسي لا سمح الله
لا انا بقول كدة علشان اكيد فى اسباب خلتنى اتقبل فى الاماكن دية على الرغم من انهم اوتسور ماعدا الاهلى طبعا
اولا توفيق ربنا وكرمه الغير عادى وفضله عليا (احمدك واشكر فضلك يارب وديمها علينا نعمه)

ثانيا :زى ما ذكرت فوق انى كنت مظبط السي فى بتاعى واتعلمت كتير من الناس اللى حوليا ومن المنتدى هنا وكل مكان بروحة او شغل بعرف حاجة جديدة بالاضافه للعامل النفسى والثقة ورغبتى انى اكون انسان كويس ذو قيمة.......الخ

تعالو بقى للاحداث اللى تمت فى كل انترفيو من الاماكن الاربعه اللى دخلتهم:
يلا بينا:-[/CENTER]


سيتى بك:
عملت حوالى سبعه انترفيو فى يوم واحد فى ست ساعات
تخيل مدى الضغط على الاعصاب والارهاق الذهنى من كتر التركيز والانتظار
المهم
دخلت مع اول واحد وسالنى عرف نفسك و اية الكورسات اللى اخدتها وتعرف اية عن السيلز وهتعرف تبيع ولا لآ ووالدك شغال اية ومعاك عربية ولا لآ؟
دخلت مع التانى ونفس الاسئلة اللى فوق وزود عليها وقالى معاك موبيل.........قلتله اة......قالى بيعهولى
دخلت مع الثالث وسالنى عاوز تشتغل معانا لية وعرفت منين اننا محتاجين ناس وولع سجارة وقالى مضيقاك ولااطفيها ...................................ربنا يسامحك يالى فى بالى......................روح منك لله
دخلت للرابع وسالنى نفس اسئلة الاول وزود عليها انت متوقع تاخد مرتب كام
ودخلت للخامس ونفس الاسئلة وزود عاوز تبقى اية فى الكام سنة اللى جاية
وهكذا لغاية السابع
وعرفت انى اتقبلت فى نفس اليوم والحمد لله




تعالى بقى لل HSBC

ادخل الموضوع دة وانت تعرف اية اللى حصل بالتفصيل!!!!!!! اضغط هنا بس لما تخلص قراية الموضوع دة


وبعدها اتقدمت لشركة اتصالات وكنت مقدم لخدمة عملاء لانى فعلا تعبت من السيلز وضغط التارجت والسوق مقفول زى ما انتوا عارفين علشان الازمة العالمية فقررت اسيب السيلز واروح خدمة عملاء فى اتصالات بس ما اقدرش انكر فضل السيلز عليا انوا غير حياتى وعرفت منه حاجات كتير ودة طبعا بعد فضل ربنا عليا.


المهم عملت اتنين انترفيو فى اتصالات
وكانوا كلهم بالانجلش (عرف نفسك تعرف اية عن خدمة العملا هتعمل اية لو عميل شتمك.....لية عاوز تسيب الشغل ......مع انك بتشتغل فى مكان له اسم وسمعه كبيرة وبعد كدة دردشنا بالعربى)


وفى النهاية بقي
البنك الاهلى المصرى

عملت حوالى تلاته انترفيو
الاول كان كله انجلش
1-عرف نفسك
2-اية خبراتك واحكى عن طبيعه شغلك
3-عاوز تسيب الشغل لية
4-عاوز تشتغل معانا فى قسم اية
تانى انترفيو كان لذيذ قوى وبالعربى:
كان واحد اسمة استاذ هشام ودردش معايا............ يعنى ما يعتبرش انترفيو وسالنى كام سؤال على السريع
من الابلكيشن بتاعى (انت اشتغلت اية فى HSBC و CitiBank واية كانت مهامك ومسؤلياتك وعاوز تشتغل فين قلته فى العمليات او خدمة العملا او تيللر............... وخلصنا الانترفيو على كدة)
وبعدها جيت فى يوم تانى وسالنى انت عاوز تشتغل فين بالظبط ورتب اولوياتك فى الاقسام........... قلتله عمليات وبعدين ائتمان وبعدين تيللر وبعدين خدمة عملا)
المهم قالى طيب لو قلتلك سيلز بحكم خبرتك هتوافق) قلتله لا مش هقدر ادخل فى كارير السيلز تانى لانى جربتة فى بنك من افضل البنوك واقل بنك فى مصر من حيث السمعه وبرضو تعبت جدا بسبب ضغوط التارجت وارهاق الاعصاب دة فقالى الوضع عندنا مختلف غير برة....قلتله برضو لآ ..............قالى طيب المتوفر حاليا تيللر (موافق ولا تستنى شوية لغاية ما يجيلى بوست تانى ) قتلته اوك موافق على تللر)
المهم دخلت تانى لمستر هشام وحاول يقنعنى بالسيلز وانا مصمم ومش موافق والمهم مضى على الاوفر انى ابقي تيللر وقالى براحتك طالما مصمم والحمد لله ربنا كملها على خير
وعقبال كل الناس وربنا يكرمك كلكم

منقول من منتدى دى فى دى عرب