دراكولا عاش ونابه طول
شبع من دمنا مص
وكان بيحول ع البنوك عدل
كراتين فلوس تترص
فضل يسحب لما جالنا فقر
واحنا ضعاف قلالات حيله
قدام الشريطه والنجمه
والنسر والصقر
ماهما دول اعوانه
حراسه واحبابه
وولاده وكلابه الى سرقونا
ولا حد شاف ولا حد بص
ناس ركبت الكارو
وناس ركبت الباص
والى بياكل شاورمه
اما الى عنده ضمير وزمه
غداه فول وحزمه خص
والى كان يقول ليا حقوق
يا يعتقل
يا يموت مشنوق
او فى قطر الصعيد محروق
ياكان لسانه طويل واتقص
ومع كل ده كان فينا ناس كتير
الى وهب دمه لمصر
نفسه فى التغيير
مخافش من دراكولا
ولا من امنا الغولا
ونزل التحرير
وادوا دورهم بالنص
يرحل دراكولا وكل المصاصين
يرحل العسس والبصاصين
ويرحل العملا والخاينين
وتفضل مصر لولادها بس
وعشان الوطنيه ضرورى تتحس
لازم الخروف نسأل الخروف عن ثروته
ونشوف ايه كبر فروته
ونجهز المقص
والدم من تانى يجرى فى عروقنا
فداكى يا مصر
ونروى ارضك بدمنا
يطرح محبتك فى القلب
بس مش قبل ما نحاكم دراكولا
مش قبل ما نحاسب الخروف
ونعاقب الكلب
ماياما ناس اتحاسبت ومكانش ليها ذنب