السلام عليكم ورحمة الله وبركاتة
ازيكم جميعا يارب تكونو فى احسن حال
..
الواحد كده ساعات بيجى عليه وقت يكون زمن قصير كده يعنى تقديريا هنقول ثوانى المهم بعدنا عن اللى عايز اقوله عايز اوضح يعنى ان الانسان ممكن يغلط فى وقت من الاوقات ويفكر

وانا قاعد كده بفكر مع نفسى فى كام موضوع مش عارف مصدرهم الحقيقة بس هم مهمين جدا
لقيت انى فعلا لو حكمت على الامر من البداية هكون غلطان
طب تعمل ايه ياد يا ابوحميد ، مفيش غير حل واحد انى اتريس
بس الموضوع صعب هنتريس ازاى ، خلاص فى حل تانى اللى ميعجبنيش اقتله على طول
0000.gif" border="0" alt="" title="Kar0000" class="inlineimg" />
لقيت نفسى عمال اكلم فى نفسى ونفسى شكلها قرفانه منى ومش عايزه تكلمنى قولت لا لازم الكلام ده حد يشاركنى فيه طب يا ترى مين اللى هيقدر يستوعبنى ويستحملنى ويفهم انا عايز ايه بالرغم من انى مش عارف اساسا ، مفيش غير انى انزل الشارع واشارك الناس ويشاركونى وطبعا الرد الطبيعى هيكون ادوشنا ياعم واحنا نشاركك احنا ورانا حاجة ، اوك ماشى يلا نتشارك يمكن نوصل لحل يرضى جميع الاطراف ويحقق المصالحة بين جميع الاطراف ويوحد جميع الجهات .

بس فى حاجة احنا مش هنمشى بالمعدول لا هنمشى بالمشقلوب يعنى هنرجع وبعدين نبقى نيجى تانى
الموافق على هذا القرار يتفضل برفع يده موافقه
لا كان زمان الكلام ده دلوقت احنا اللى نقول ايه الموافقه وايه اللى مش موافقه بالعند بقى مش موافقه هنمشى بالمعدول.

بس عندنا مشكله صغيره ياترى ايه هى تعالو نوقف المواطن الغلبان ده ونسئله
الا قوللى لو سمحت بما انك ماشى مبوز ورازع الميه وحداشر على خلقتك ومكشر على الصبح يبقى اكيد عندك مشكلة ياترى ايه هى
حسبى الله ونعم الوكيل هما اللى عملو فينا كده هما اللى جابونا لورى
معلش انا آسف انى قاطعت سعادتك بس هما مين دول
هو فيه غيرهم بس لو اشوف واحد فيهم هقتله هقسمه نصفين
ياعم طب ساعدنى وقوللى مين هما يمكن نوصل لحل مع بعض
هم شباب الفيس بووك
مالهم ياعم ماهم شباب زى الفل مش احسن ما يقعدو على القهاوى ويشربو شيشة
ياريتهم بيشربو شيشة كانو اتعلمو المرجلة كانو حسو بالفقرا اللى زى حالاتى
ياعم اهدى بس كده وصلى على النبى هم اذوك فى ايه
بقالى شهرين مش عارف اصرف المعاش بتاع ابويا
طب هم مالهم تصرفه ماتصرفوش ايه دخلهم
لا ازاى ايه دخلهم وهم اللى عطلو الدنيا بعد الثورة اللى عملوها
يا راجل اتقى الله بقى الثورة اللى عملوها هى اللى عطلت الدنيا بردو ولا الناس هما اللى معطلينها
لا هم اللى عطلوها
ياراجل حرام عليك دول رجعولك كرامتك بعد ما اتداس عليها 30 سنه
ياريتها مكانت رجعت مكنا عايشين وزى الفل كانت ايه المشكلة بس
معلش فى الكلمة انت بتشتغل ايه
ها..لا انا قاعد مريح شوية اليومين دول
مريح اااااه وعايش ازاى بقى لما انت مريح اليومين دول
على معاش ابويا اللى مش عارف اصرفه حسبى الله ونعم الوكيل
لا استنى هو خدوهم بالصوت لا يغلبوكو
انت عندك كام سنه
ها..عندى 32 سنة
32 سنة ومعتمد على معاش ابوك وعايش انت ومين بقى
عايش انا ووالدتى
طب مش عيب عليك لما تبقى عندك 32 يعنى لسه شباب ووالدتك اكيد ست كبيرة وليها مصاريفها
سيبلها المعاش ودورلك انت على شغلانه
اااااه ياجمبى المرض بعيد عنك ساعدنى دانا عاجز ومش قادر
الله الله الله الله ايه ده مانت كنت زى القرد من شوية خلاص العجز صابك دلوقت
مش انت اللى بتقوللى دورلك على شغلانه ادينى رايح استرزق اهو
اهلا وكمان متسول لا على الحال ده لسه قدمنا كتير
بقولك ايه يلا اتكل على الله من قدامى لانك نرفزتنى

هذا هو القدر يا اخوانى اول واحد اقابله احبطنى وجابلى اكتآب
طب انا عندى حل جميل جدا احنا نرتقى شوية يعنى نطلع على اى شركة خاصة
ونشوف النظام فيها ايه
توكلنا على الله
ايوه الشركة دى شكلها نضيف واكيد الناس اللى جوه نضاف جدا ندخل كده فى الخبينى ونتابع من بعيد

يا منى تعالى ردى على التليفون وانتى يا مى روحى قابلى العميل اللى بره وانتى يا دنيا هتنزلى تروحى المشوار ده وتستلمى الحاجة دى
اوك يافندم
مين اللى على التليفون يامنى
ابدا ده واحد عايز يقدم على شغل
يادى القرف يادى القرف

هو ده الناس دول شكلهم عندهم مشكله اما ادخل احاول استفسر
احم احم صباح الخير يافندم
يادى القرف يادى القرف
سلامو عليكم
وعليكم السلام ياسيدى عايز ايه
لا ابدا اصل شايف حضرتك متضايق فحبيت استفسر بس
بمناسبة ايه انت مالك انت
هدى اعصابك بس اعملى ليمون يا منى
انت مالك انت بمنى وزفت
بص اصل انا موظف فى مركز الابحاث وجاى اعمل بحث عن حالة الموظفين هنا
ااااااه يا اخى خضيتنى افتكرتك جاى تدور على شغل لاكن الحمد لله
اللى فهمته من كلامك ان باب التوظيف مقفول دلوقت والناس بردو بيتقدمو
يعنى مش بالظبط
طب كلم منى جاية
خير يامنى فى ايه
يافندم البنت اللى ادينالها ميعاد امبارح جاية تعمل انترفيو
اه طب خليها تدخل للاستاذة سامية تعمل معاها الانترفيو
انتر فيو هو مش باب التوظيف مقفول بردو
لا يا سيدى انت فهمت غلط اصل احنا هنا بنوظف بنات بس
بتوظفو بنات بس ااااااه قولتلى بقى وليه بقى ان شاء الله
ده الطبيعى دلوقت فى كل الشركات
هو كمان بقى طبيعى واضح انى مغيب وايه اللى خلاه طبيعى يعنى
يعنى البنات افضل فى الكلام مع العملاء ده غير ان اجرهم اقل
ايوه بس احنا عندنا نسبة بطالة عالية جدا نشغل الشباب اللى محتاجين الاول وبعدين نشوف الاجر
ياعم انت بتكلمنى انا احنا شركة خاصة روح كلم المصالح الحكومية ماهى كلهم طالبين بنات بردو
طب والشباب يروحو فين يقطفو ملوخية يعنى ولا ايه وبعدين مش كل حاجة ترموها على المصالح الحكومية انتو لازمتكو ايه
احنا يهمنا فى المقام الاول مصلحة الشركة
مصلحة الشركة طب والمصلحة العامة متهمكش
وايه اللى هيضر المصلحة العامة فى انى اشغل بنات
لا ان البنات تشتغل مش هيضر المصلحة العامة اللى يضرها ان الشباب يقعدوا فى بيوتهم
لما انت تقفل فى وشهم الباب وغيرك يقفل فى وشهم الباب وغيركو وغيركو هيروحو فين لازم يبصو لبره وبعدين نرجع نقول خلينا فى بلدنا علشان نبنيها ونعمرها طب ادوهم فرصه
انت شكلك كده مبتشجعش عمل المرأة
بغض النظر عن وجهة نظرى فى الموضوع لان فى الاول وفى الاخر هى وجهة نظر شخصية فقط
انا من وجهة نظرى ان الست اهم حاجة ليها هو بيتها
بس دى مش اكتر من وجهة نظر
يعنى انت مش ممانع ان البنات يشتغلو
لا طبعا مش ممانع انا مين علشان امنع او لا
اذا يبقى من حقنا منطلبش غير بنات

لا حول ولا قوة الا بالله
لا حياة لمن تنادى اجيله يمين يجيلى شمال اروحله شمال يرجع يمين تانى
ماتتصوروش الراجل ده تعبنى قد ايه فى الكلام راجل مستفز كده وبعدين ماهو راجل اهو اشمعنى هو
يلا ما علينا

شكل اليوم اتضرب ايه ده ايه ده
انت ياعم انت انت ياعم
ايوه يا بيه بتزعق ليه
بيه ايه بس ونيلة ايه ايه اللى انت عملته ده
عملت ايه بس هو انا ارتكبت جريمة لامؤاخذه
اه ارتكبت جريمة جيت ركنت الشنطة اللى كانت فى ايدك جمب الحيطه وسبتها ومشيت
يعنى اوديها فين بس
ياعم مفيش صناديق زبالة خالص
لا فى بس على اول الشارع وانا مش قادر امشى
يعنى نجيب لسيادتك ليموزين تنقل جنابك لحد اول الشارع علشان حضرتك ترمى شنطتك الجميلة فى الصندوق
وليه التعب ده كله مانا رميتها وخلاص
واضح انى هبذل مجهود علشان افهمك
يا سيدى الفاضل انت مش عايز بلدك تبقى نضيفه وجميلة
عايزها طبعا
طب بترمى الزبالة هنا ليه
ما الناس كلهم بيرمو خلاص شنطتى انا هى اللى هتبوظ الدنيا
بكره اسمع الجمله دى
ياسيدى مالكش دعوه بالناس خليك فى نفسك
لما انت تروح لحد اول الشارع ترمى الشنطة دى وجارك شافك وانت رايح
هيتضايق من نفسه وبالتالى هيقلدك فينعكس الامر على جميع سكان منطقتك
فتصبح منطقتكم نضيفة وجميلة وهكذا فى جميع المناطق
ايوه بس احنا بنرمى هنا من زماان
انا آسف بجد انا آسف انى اتكلمت معاك
سلام

اووووف راجل غبى
انا هروح لانى فعلا تعبت من الناس دى
بس لازم نقول تقرير بقى
المشكلة اللى عند الناس حاليا
بعض الناس هم اللى مفتعلينها
يعنى واحد زى بتاع المعاش ده يقولك الثورة جابتنا لورى لا هو اللى عايز يبقى ورى الثورة بتشد لقدام بس اللى عايز يطلع معاها والباقى بتسيبه مكانه وبتبعد علشان كده بيحس انها جابته ورى على ما اظن انه راجل ممكن يشتغل اى شغلانه وده مفيش اكتر منه
..
طب نيجى لواحد خريج عايزين نشغله
هنا مشكلته كبيره شوية لانها بعيدة عنه كل اما يروح يقدم فى شركة يقولوله بنات بس
طب هيعمل ايه الراجل هيقعد فى بيتهم وبالتالى بردو هيشعر بنفس الشعور انه رجع لورى
بس ده علاجه عدم اليأس والدعاء ويسعى لان الشغل مش هيخبط عليه وهو قاعد فى البيت
وربنا مش هيسيبه لان ربنا عارف انه اجتهد وسعى ودور ودعى واستخار وقال انا توكلت على ربنا
فان شاء الله هيرزقه
لاكن الناس بتوع الشركات الخاصه والعامه والمصالح الحكومية
اللى بيصرو فى طلبهم للبنات فقط ويسيبو الشباب كده
ومستغربين ان عندنا نسبة بطالة عالية وبنقول ليه الثورة محلتش المشكلة دى
فا كل اللى نقدر نقوله نطلب من الناس دى انهم يسيبو المصلحة الخاصة ويبصو للمصلحة العامة شوية وربنا يهدى
..
اهم شيئ بقى الناس بتوع اللا مبالاه دول اكتر ناس يغيظو يرمو الزبالة فى الشارع ويرجعو يقولو بص الشارع عامل ازاى اصل بتوع الزبالة مبيعدوش
طب ما ترميها فى مكانها وهم يعدو تسمع بقى الكلمة المستفزة طب مالناس كلها بترمى هنا يعنى الكيس بتاعى هو اللى هيوسخ
..
او مثلا فى المترو انا عارف ان فى ناس كتير مبيهتموش باللى هقوله ده او تكاد تكون اقلية اللى بيهتموا
المترو فيه ابواب للصعود وابواب للنزول
ليه منستخدمهاش صح والله هنرتاح ولا هنحس بزحمة ولا اى حاجةبردو لما نتكلم مع حد يقول مالناس كلها بينزلو من اى حتة ياريت كل واحد يخليه فى نفسه وبس والله هنرتاح اوى
..
والعربيات تبص تلاقى طريق اتجاه واحد وماشى فيه عربيات ست اتجاهات
الله اعلم ازاى
ولو الطريق وقف دقيقة واحد بس تلاقى اللى جايين عكس عمالين يزمرو عايزين يمشو مستعجلين
ولو بالليل يقلبو نور
وبردو لو تجرأت انك تكلم حد هتسمع الجملة المفيدة مالناس كلهم بيعملو
..
ياريت بس ماننساش ان ربنا قال لا يغير الله ما بقومٍ حتى يغيرو ما بانفسهم
لو نعمل بالايه دى هنرتاح كتير وهنلاقى اجوبة على اسئلة كتيرة جدا
واحنا فعلا مش هناخد خطوة للامام غير لما نتغير من جوه
ياريت اللى يستفيد بمعلومة او نصيحة مايبخلش بيها على غيره ويستحمل لو اتهان او حد اتريق عليه
وان شاء الله الامور هتتحسن وهتبقى احسن من كده بكتير
شكرا