الحمد لله خبطنا
تحت بطاطنا
يا محلا رجعة ظباطنا
من خط النار
يا اهل مصر المحمية
بالحرامية
الفول كتير والطعمية
والبر عمار
والعيشه معدن
واهي ماشية
اخر اشيا
مادام جنابه والحاشية
بكروش وكتار
*******
ح تقول لى سينا وما سينا شي
ما تدوشناشي
ما ستميت اوتوبيس ماشي
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار
*******
الحمدلله وأهي ظاطت
والبيه حاطط
في كل حته
مدير ظابط
وإن شالله
حمار
ايه يعني فى العقبه جرينا
ولاّ فـ سينا
هيّ الهزيمة تنسّينا
اننا احرار
*******
ايه يعني شعب فـ ليل ذلّه
ضايع كله
دا كفاية بس اما تقول له
احنا الثوار
الحمد الله ولا حول
لمصر الدولة
غرقانة فى الكدب علاولة
والشعب احتار
*******
وكفايه اسيادنا البعدا
عايشين سعدا
بفضل ناس تملا المعدة
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار
*******
- أحمد فؤاد نجم