بسم الله الرحمن الرحيم





السلام عليكم ورحمة الله

إزيكم يا شباب

والله وحشتونى وحشة ما بعدها وحشة,


بقالى كتير مادخلتش ... من أيام حملة قول نعم عشان ربنا يحبك,
وبعدين بدأت المشغوليات بأة وشغل الأونطة بتاع الجامعات والسنوات الأخيرة وكدا "مانتو فاهمين"
واهو عقبال عندكم كلها 3 شهور و أبدأ الامتياز, يعنى اوفيشيالى (عادى ف النص كدا) هابأى داكتور أو توكتوك على رأى واحد صاحبى ماتعرفوهوش


وعاوزكو تعرفو أنى (واعوذ بالله من كلمة إنى) قائم بدور سياسى وطنى تنظيمى استراتيجى محورى "لولبى" غاية فى الأهمية والخطورة فنفس الوقت لأنى (وبلا أنعرة) زعيم حزب طلبة الطب المصريين ف ال MUS

وبعد إجماع الاراء ما بين جميع الاعضاء فى الحزب, قرروا ترشيح رئيس الحزب (اللى هو أنا طبعا ) فى انتخابات مجلس الشعب والشورى ورئاسة الجمهورية كمان, عشان لو واحدة خابت التانية تصيب ولو التانية خابت برضو, يبقى التالتة ترشق بعون الله

للعلم بالشئ الحزب دا عدد أعضائه واحد ورئيسه واحد ورئيس لجنة السياسات فيه واحد والمدير التفنيذى بتاعه واحد وسكرتير المدير واحد وكوووووول الناس اللى فيه واحد, وكل دول أنا اللى بامثلهم


شوفتو بأة التعب والمجهود الخااارق اللى باعمله


ع العموم أسألكم الدعاء ربنا يتمها على خير ف الأشهر القليلة اللى جاية قبل التخرج ... وبالنسبه للدور السياسى سيبوهولى, أنا لهااااااااااااااااااااا
ما تدعوليش فيه وركزولى الدعوة من فضلكو على التخرج


حاجة أخيرة لصيحو... أتمنى مايبوظليش النظام والسبوبة اللى بناكل منها عيش ف النجع, بمعنى: مش كل عضو جديد ييجى يروح ف فثوة يقدمله شيح وماعرفش ايه
... اخى الفاضل المشاريب والأكل والذى منه دا تخصصى عشان ما نقطعش على بعض, فمن فضلك ماتقفلش باب رزق بنسترزق منه, اومال العيادة هاشغلها ازاى يا ناس ماينفعش كدا

أتمنى لو ماشافش كلامى دا حد م الغفر يا خوالنا يبلغهولو, اهو احنا زمايل برضن ويا بخت مش عارف مين كدا

على كل حال كل سنة وانتو طيبين بمناسبة أو بدون مناسبة وربنا يستر


تحياتى لأحلى نجعاوية

أحبكم فى الله