واحد صاحبنا عنده انترنت كافيه فى وسط البلد .. في يوم من الايام دخلت عليه ست خواجايه .. وقعدت علىجهاز بتاع نص ساعه ، وبعيدن ندهته بقرف وقالت له _ بالانجليزي طبعا _ " مش عارفه انتم يا مصريين ما فيش فايده فيكم ابدا.. ما الاقيش اى حاجه عن الادب الانجليزي ؟!! الانترنت عندنا فى امريكا حاجه تنيا خالص ، فيه كل حاجه فى الدنيا .. نصيحه منى اتصل باى حد صحبك فى امريكا يبعتلك انترنت امريكانى بدل الانترنت المصري التعبان ده .

صاحبنا التانى شغال مهندس فى شركه من الشركات مقدمه الخدمات ، كان قاعد فى حاله لقى واحد محترم داخل عليه لابس بدله وكرافته وشايل فى ايده شاشه كمبيوتر 17 بوصه وراح حاططها قدامه على المكتب ، وقال لصاحب الشركه : من فضلك نزلى انترنت على الكمبيوتر بتاعى .

فياليوم نفسه دخلت عليه السكرتيره وقالت له ان فى واحد اعد بيتخانق بره ومصمم يعمل محضر للشركه فى البوليس ، فقالها " دخليه لما نشوف عاوز ايه ده كمان !!"

دخل راجل محترم تانى ولابس - برضه _ بدله وكرافته ، وقال له :

مستحيل انا لازم اعمل بلاغ ضد الشركه .

- ليه بس يا استاذ ؟ حصل ايه ؟!

- ابني امبارح دخل على موقع منالمواقع الـ.. الـ.. قليله الادب .. مع انى منبه على المهندس زميلك ما ينزلش اى مواقع من دي علىالانترنت بتاعى .

المهندس الغلبان لسه بيحاول يتفاهم معاه ، رن جرس التليفون . رفع السماعه لقي واحد لابس بدله وكرافته برضه .. بيقول : من فشلك ابعتلى اتنين انترنت فى 14 شارع محمود حنفى _ المهندسين .

تانى يوم جاتله مكالمه عجيبه جدا .

العميل : لا مؤخذه يا استاذ.. عندي استفسار صغير .

المهندس : تحت امرك .

_ ابني امبارح كان فى موقع متحف اللوفر .

_ وايه المشكله ؟؟

_ المشكله انه قعد نص ساعه فى الموقع ده تفتكر ندفع فاتوره تليفون مباشر قد ايه ؟؟؟؟

_ مش هتدفع مباشر خالص.

_ ازاى مش الموقع ده فى فرنسا ؟

_ يا استاذ الموضوع مش كده ، مفيش مباشر فى الانترنت .

_ مش معقول .. بس انا متاكد ان شركه الاتصالات هتخلينا ندفع مباشر .

المهندس قعد يحلف له ميت يمين لكن الراجل ما صدقوش ، وقفل السكه ، وبعد شويه اتصل بيه تانى !!

العميل : معاك حق .. انا اتصلت بشركه الاتصالات دلوقتى وقالولى انهم ما بيحسبوش مباشر على الانترنت ، بس انا عندي سؤال تانى .

المهندس : افندم .

العميل : تفتكر البريد السريع الدولى بياخد كام على الايميل ؟!!

اخر حاجه بقي

واحد صحبي كان داخل انترنت كافيه وكان معاه ديسك ، حطه على الترابيزه ، فجأه لقي البنت الى جانبه من فضلك ما تحطش الديسك بتاعك جنب الديسك بتاعى .

- حاضر بس ممكن افهم ليه ؟!!

- معلش يا استاذ .. اصلى بخاف من الفيروسات .. ايه ضمني ان الديسك بتاعك ما علهوش فيروس ممكن يعدي الديسك بتاعى ؟

البنت كانت حلوه اوى .. بص فى عينيها وقال لها " بعد الشر ان شالله ديسك الى يزعلوكى ! "

وربنا يحمينا جميعا من الامراض قادر يا كريم .

( منقول من مجه اون لاين العدد الثالث مع بعض التعديلات (