السلام عليكم ورحمة الله وبركاتة
نبدأ بسم الله الرحمن الرحيم
في حاجة اكيد كلنا ملاحظينها وواخدين بالنا منها وفي ناس مش واخدين بالهم او واخدين بالهم وعاملين نفسهم مش واخدين بالهم بمعنى انهم عاملين من الهند وراكنيين الفيل برة على الباب طب هيفضلوا عاملين نفسهم مش واخدين بالهم لحد امتى او لو هما مش واخدين بالهم فعلا يا ترى هياخدوا بالهم امتى
..
طب ممكن حد يفهمني اية المشكلة دلوقت ، بس ازاي حد هيفهمني وانا نفسي مش فاهم
طب اذا كانت المشكلة تكمن في مسئلة المفهومية فدي امرها بسيط
انما لو المسئلة بقى حاجة تانية فتبقى هي دي المشكلة
واكيد وبالطبع محدش لسة وصل للي انا عايزه
طب هحاول ابسط الموضوع شوية لعل وعسى نقدر نتوصل لحل يرضي جميع الاطراف
نتخيل كدة لو احنا عندنا مجموعة اطفال ، شوية الاطفال دول كل يوم نضربهم ونبهدلهم ونطلع عينيهم ويبقوا من غير عينين اكيد مش هيعرفوا يعيطوا علشان عينيهم طلعت خلاص ، مش كدة ولا اية.

شايف نظرات الحيرة بدأت تشتغل
طب خلينا منطقيين شوية ونتكلم بالعقل انا مبكتبش هنا الا لما يكون في حاجة مش عاجباني دة امر اكيد
اذا انا معترض.
شايفك ياللي بتقول معترض على اية ولو صبرت خمس دقايق هتعرف انما دايما كدة احنا مستعجلين ، ودي تاني مشكلة الاستعجاااااال
طب وهي فين المشكلة الاولى اساسا ، بس خلينا واحدة واحدة واحنا هنفهم.

....
اللي بيحصل دة اية السبب فية؟
بصراحة معنديش فكرة بس انا في كذا حاجة خايف منهم بصراحة
اول شيئ اللهو الخفي يعني دة مثلا زي الاشكيف والعفريت بتوع زمان؟
تاني شيئ الايد الخفية ، دي بقى حكايتها حكاية
فاكرين ابو رجل مسلوخة ، رجع تاني بس بايد مخفية المرادي
يعني لما كان الطفل زمان يدوخ امه وابوه ويزعجهم ومايعرفوش يناموا يروحوا قايلينله بس لحسن ابو رجل مسلوخة جاي
يروح الواد مسروع ونايم على طول.
دلوقت الوضع اتغير تماما ، بقت الايد الخفية هي اللي بتلعب الدور دة
دانا نفسي بقيت اخاف منها ، كل واحد يتخيل كدة نايم على السرير لا بية ولا علية ويبص جمبه يلاقي ايد خفية بتتسحب
لا وبعد كدة بقى نلاقيهم عاملين مبيد بشري مسمينه الايد الخفية رشة واحدة من الايد الخفية تقضي على اجدعها بشرية
ولو بصيت للموضوع من الاساس هنلاقي في عامل مشترك بين اللهو الخفي والايد الخفية
اية هو بقى ؟؟؟؟؟
الخفاااااااااااااااء
مش عارف لية مصرين انه شيئ مختفي ، يعني العفريت طلعله مثلا واتحرق قدامه وخد البودرة بتاعته وطاقية والعلبة دي فيها اية والشغل دة ولا اية بالظبط
ولا هو اختفى لوحدة؟؟؟ ما علينا مش قصتنا دلوقت

....
طب اية تالت حاجة بقى؟
الطرف الثالث
طول عمرنا عارفين ان اي شيئ لية طرفين التالت بقى جه منين
انا اقولكم
لو بالفرض معانا حتة قماش ليها طرفين زي ما اتفقنا
انا ماسك ناحية واي حد تطوع ومسك الناحية التانية
وفي اتنين واقفين ورانا واحد منهم بيحمينا من التاني علشان التاني لو مسك طرف من حتة القماش هيقطعها
اوم اية يجي واحد تاني معاه مقص ويروح قاصص حتة من القماش من غير ما ناخد بالنا واحنا نفوجئ بانها بتتقطع حتة حتة لان خلاص طالما اتقطع منها حتة صغيرة واتشدت اصبح ليها طرف تالت وهيكمل قطعها
طب السؤال هنا!!!
انت ياللي بتحمينا كنت فين لما اللي جه قطع ده دخل في وسطينا هي مش شغلتك انك تمنعه ولا اية
ياسيدي انا مش مخونك بس انت اللي بتجبرني على كدة
ريحني وقولي فلان هو اللي قطعها ، لكن متقوليش طرف تالت وتسيبني كدة محتاس في الزحمة اجيب كرمبو انا ولا اية يعني.
....
طب لو اعتبرنا انك مخدتش بالك مرة طب والتانية ماشي بردة هنعدي لكن حوالي 15 مرة وكل مرة افظع من اللي قبلها
لا كدة انا بكل صراحة اشك فيك.
طب ياسيدي بلاش تقولي يمكن دة سر عندك ، خيط حتة القماش وحسسني انك بتحميني لحسن كدة الوضع بقى خطير خصوصا لو حياتنا بتتعلق بحتة القماش دي
....
بيتهيالي كدة احنا دخلنا في متاهات كتير وبردو موصلناش للنقطة اللي احنا عايزينها
عارفين الوضع دة بيحسسني باية
كاننا ماشيين على سير بنفس سرعته لكن للاسف عكس اتجاهه
مهما مشنا عمرنا ما هنتحرك الا في حالة من الاتنين ياما السير يقف وبالكاد هنوصل بعد تعب واجهاد ممكن نوفره على نفسنا لو فضل السير شغال واحنا غيرنا اتجاه سيره علشان يوصلنا صح
والاسوء من ده كله اننا نقف في مكاننا والسير يقعد يرجع فينا لحد ما نقع من علية واللي بيقع من على السير مش هيعرف يطلع تاني
هه يلا دنيا وكلنا زوار فيها ومحدش هياخد اكتر من نصيبه
هسيب كل واحد يحط النهاية اللي هو بيتخيلها وفي النهاية اللي كاتبه ربنا هو اللي هيكون

...
يعني عليكي شايفك بتغرقي وكل اما حاول امد ايدي وانقذك الاقي اللي بيشدني ويرجعني تاني
.....