لما نفكر مره نختار من غير عشوائيه
بعيد عن اى مصلحه شخصيه

نختار لينا قائد صاحب شخصيه
يطلع فى الخرابه بغرابه جنيه
والقائد تطلع امه امريكيه
ونرجع نتوه ما بين باقى الاختيارات
مين كان بيقدر يقول للفساد لأ
ومين ركب على ثورتنا و ومين نزل مظاهرات
ومين صادق ومين خان فلول ولا اخوان
لسه مش عارفين نتغير
هتدى صوتك لمين؟؟؟
سعد باشا زغلول ولا سعد الصغير
ونرجع تانى لأول القضيه
العنب اهم ولا الاهم الحريه
ولما طبال يترشح دى تبقى قمه الديموقراطيه ؟
ولا ناتج للفتره الأنتقاميه
ولعبه العسكر والحراميه
طبله وكراسى موسيقيه برلمانيه
مين عميل ومين صافى النيه
ياترا الحقيقه فين
وانا اطلع فى الاخر منين
ياخوفى اسحب ورق الترشيح
اكتشف ان ابويا كان مهراجا وامى هنديه
وجدتى سابت المانيا فى الحرب العالميه
واكتشف ان السكر مش فى النمليه
وان البنزين هيتباع على الروشته فى الصيدليه
بس طلاما الشيخ بيتقل شانه
وكل من هب ودب يتريق على دقنه
حتى لو امى طلعت هنديه
مصر هتفضل دوله دينيه
وعلى جثتى لو بقت ليبراليه