+ إنشاء موضوع جديد
النتايج 1 إلى 10 من 29

الموضوع: ليه ايام زمان كانت اجمل يرحم زمان وليالى زمان !!

مشاهدة المواضيع

المشاركة السابقة المشاركة السابقة   المشاركة التالية المشاركة التالية
  1. #1
    نجعاوي هيعدي الصورة الرمزية زمان وليالى زمان
    تاريخ التسجيل
    May 2012
    الدولة
    نصى اسكندرانى ونصى مصراوى ايووووه يا جدعات
    العمر
    33
    المشاركات
    376

    الاصلي ليه ايام زمان كانت اجمل يرحم زمان وليالى زمان !!




    زمان وليالى زمان وأيام الزمن الجميل

    بصوا يا جماعه انا هفضفض هنا شويه لان الواحد اليومين دول جواه كم مشاعر وفيض احاسيس لو خرجت من جواه هتغرق اهل الارض كلهم جميعا ومحدش يفهمنى غلط الله يكرمكم
    الموضوع باختصار هو عن زمان وليالى زمان وايام الزمن الجميل اقصد تحديدا من جيلنا احنا اواخر التمنينات واوائل التسعينات ايام ما كنا اطفال
    ليه ساعتها كل حاجه كانت جميله وعذبه ورقيقه والناس اهدى واكتر مسامحه من دلوقتى وكنا كمان اكتر محبه لبعض كمان ليه زمان فى الفتره دى كانت كل حاجه فى عنينا سهله وجميله وملهاش زى فى الوجود لدرجه اننا فى وقتها كنا فاكرين ان ده اخر مراحل التطور الحضارى للجنس البشرى لاكان فى موبايلات ولا وجع قلب ولا زحمه ولا دوشه ولا غيبه ودسيسه زى دلوقتى ولا كثرة عربيات كمان اغانى زمان كانت جمييييييييييييييييييييييي يله ولحد دلوقتى احنا حافظينها عن ظهر قلب
    قولولى بالله عليكم حد يقدر ييجى عليه عيد سواء كان العيد الصغير او العيد الكبير من غير ما يسمع اغنية فى يوم الوقفه ياليلة العيد انستينا حد يقدر هنا ينسى وقع ترانيم الغنوه دى جوه قلبه وهو صغير ويسلام بقا على اول يوم العيد حد يقدر ينسى
    اغنية العيد فرحه واجمل فرحه تجمع شمل قريب وبعيد لصفاء ابو السعود يااااااااااااااااااااااه قد ايه الحياه وقتها كانت حلوه وجمييييييييله وياسلام بقا على اغنية صفاء ابو السعود برده بتاعة الاجازه يلا نقضى اجازه سعيده ونشوف حاجه جديده مفيده
    يانهاااااااااااااار ابيض عليها اما كنا نسمعها عشان ساعتها نعرف اننا فى الاجازه وننطلق للنادى واللى يروح يعمل مغامره هنا ولا هنا طبعا انا اقصد بالمغامره اما كنا نجمع نفسنا ونتفق قبلها بيوم على وقت نتلاقى فيه ونروح على بين فلان الفلانى لان هن
    اك شجرة توت لازم نعمل عليها حمله ونصفيها ياااااااااااه واما بقى حد من اهل البيت يحس بينا ويطلع يزعق زعقتين كده واحنا كل واحد ياخد ديله فى سنانه ويقول يافكيك واحنا كلنا رعب لكن بيتقلب لضحك اما نتجمع فى المكان رقم اتنين وهو مكان التلاقى بعد ما نتكشف حد يقدر ينسى ده يا جماعه ولا حد يقول انه معملش كده وهو صغير
    ونرجع تااااااااااانى لايام المدرسه والصحيان الممل بدرى واحنا بنسمع اغنيه بالسلامه يا حبيبى بالسلامه بالسلامه تروح وترجع بالسلامه وبعدها برنامج فؤاد المهندس كلمتين وبس ساعتها اول ما الواحد يسمع الموسيقى بتاعته يطير على المدرسه عشان عارف انه كده اتأخر على الطابور ونقف على البوابه وييجى استاذ الالعاب يضربنا عصايتين على الصبح فى عز البرد
    حد ينسى ماما ساميه ودبدوبه التخينه ولا ماما نجوى وبقلظ وياخرابى على الكابتن ماجد يالهوىىىىىىى اما كنا نقعد قدام التليفزيون اربع ايام متصله مفيش حد يبربش عشان بس نستنى شوطه كابتن ماجد تروع عند جون رعد وتدخل فى فريق بسام
    ولا مازينجر ياسلالالالالالالالالالالا م على كلمه ماهر افتح يا ماااااااااازنجر انااااااااا معاك وياسلام بقا على فوازير عمو فؤاد حد يقدر ينساها


    اقول ايه ولا ايه ولا ايه

    والله انا فى قمة حزنى واسفى وندمى انى كبرت ووصلت للحال اللى احنا فى ده من تردى فى القيم وقسوه فى المشاعر وتقدم حضارى ممل وبتندم على ايام الزمن الجميل الإتعلمنا فيه المسامحه والحب والاحترام والقيم والرجوله
    وبدل ما كنا بنتعلم اننا نحب نهر النيل والقناطر بعد اغنية محمود يس المشهوره بتاعه هيلا هيلا فى القناطر رحله جميله فى القناطر واتعلمنا ازاى نغسل ايدنا الصبح ووشنا من اغنيه صفاء ابو السعود بتاعه اصحابى وصحباتى هنا ومحلك سر بصو وشوفو حجاتى انما ايه فى السر
    واتعلمنا اننا نحوش وندخر القرش الابيض اول ما سمعنا اغنية لبلبه حصالتى ليها كرش احنا سمعنا ده واتعلمناه واثر فينا من صغرنا والوطنيه اما سمعنا اغنية محمد ثروت كل بلاد الدنيا جميله لكن اجمل من بلدى لا
    ومفيش حد يقولى ان اغنية سعاد حسنى بتاعة البنات البنات الطف الكائنات غيرة مفهومنا تماما عن البنت ودورها فى الحياه
    دلوقتى بقينا نسمع بوس الواوا وليك الواو وبقينا نسمع اوسو نوسو بابا ومدرى ايه

    بجد انا محطم نفسيا ومنهار معنويا واسى على زمن فات لدرجة انى كل يوم ليا ساعه كامله مخصصها انى اسمع حجات زمان دى لانى عندى اكتر من الف كليب عندى على اللاب توب لحجات زمان دى وبسترجع مشاعرها وايامها الحلوه
    مع العلم انى عايش عصرى ده بكل مباهجه وزخرفه عندى احدث موبايل واحدث لاب توب وعندنا بدل العربيه اتنين لكن كل ده زينة الحياة الدنيا حاجاة بارده مفيهاش اى احساس او اى روح حجات بعملها لكن وانا مش حاسسها وده اللى تاعبنى اوى فياترى هل الاحساس دده انا لوحدى فيه ولا جيلى كله زى كده ولا انا غلطان ولا بقول كده عشان الواحد ممكن يكون رومانسى شويتين ولا ايه
    وده اللى بيخلينى اقول

    يرحم زمان وليالى زمان

    وياريت اللى عنده اى ذكرى لايام زمان الجميله يدخل يقولها يعنى غنوه شقيه من بتوع زمان اما كان طفل وبيسمعها على طول حجات زى كده يعنى وياريت نعمل جروب اسمه ليالى زمان خاص بكل ما هو قديم ونديم لنا من ايام الطفوله الجميله

    وفعلا قديمك نديمك



    رد بالفيس توك يا معنمممم

    التعديل الأخير تم بواسطة صقر مصر ; 16th May 2012 الساعة 10:36 PM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •