السلام عليكم ورحمة الله وبركاته


أومليت البطاطس طريقه حلوه اوى

تنفع للفطار أو العشاء أو الغدا كمان لو حابة تغيري اللحوم والأسماك

وطعمها يجنن

المقادير عبارة عن :-

بطاطس
بيض
بصلة متوسطة
فص توم
بقدونس
كريمة طبخ ((ممكن تستغني عنها وتحطي حليب))
زيت
ملح وفلفل وبهار وكاري وشطة


طبعا كمية البطاطس والبيض والبقدونس حسب الرغبة

نيجي للطريقة

بسم الله

أولا تقشري البطاطس وتقطعيها مكعبات متوسطة وتسلقيها في ماية وكمون

يدوب تستوي يا قمرات وتصفوها بلاش تتهري منكوا ،،، زي كده



تحطي شوية زيت في طاسة وعليهم البصل وعلى النار



شوحيهم شوية وانزلي عليهم بفص التوم المفروم لحد ماتشمي ريحة التوم



وبعدين انزلي بالبطاطس المسلوقة



وسيبيها تتشوح مع البصل والتوم عشان تاخد النكهة وتظبطي الملح والفلفل وحطي شوية بهارات وكاري



هي أصلا تتاكل كده من الطاسة


اهم حاجة انك تاخدي بالك ومتخلصيش على البطاطس وانت واقفة


وبعدين تجهزي بقى في طبق بعيد كده

البيض وعليه الملح والفلفل وكريمة الطبخ أو اللبن وتضربيهم بالشوكة كويس



كريمة الطبخ

دي عبارة عن قشطة سايلة ولو انت في مصر هتلاقي منها جهينة وهاتلاقيها في السوبر ماركت الكبير

لو في دول الخليج هتلاقي منها المراعي بتلاقيها في الهايبرات

نرجع لموضوعنا

وبعدين ضيفي البقدونس للبيض



وحطي خليط البيض على البطاطس على نار متوسطة بس بلاش تقلبي



وغطي الطاسة وسيبيها ما بين 8 إلى 10 دقائق

لحد مايحمر قعرها

وهو كده استوى والقعر أحمر



بعدين حطيه تحت شواية الفرن عشان الوش ياخد اللون الأحمر



هو مش بياخد وقت في تسويته خااااااااالص



والطعم خررااااااااااااااااافة



وينفع يتحط على العشا والفطار ومعاه بطاطس محمرة







وألف هنا وشفا يا فتوكاتي


ملحوظة صغنونة :-

لو هاتعمليه في الفطار يبقى جهزي لحد تشويح البطاطس
وبعدين حطيه في التلاجة
ولما تصحي الصبح ضيفي البيض والاضافات اللي عليه
وسوي الأومليت

في حفظ الله