حالم برؤياكي
الكل باصرينك .. وحدايا لابسة نقاب
وبخيرك اتدفوا .. وتغطيني بتراب
بتدلعي في الكل .. وتخليني عابر
وتقولي مصبرتش .. واديني اهو صابر
ماهي هي كده بالعقل
هاحكي لمين حبي .. غير لاللي حبيتها
مخنوق بأشجاني مع اني خبيتها
ع الكل الّاها .. قوم هي قسمتها
ع الكل الّايا .. جات عندي ودارتها
ليه تدوري فيّا عذاب
..................
لما تغيب شمسك
عيني بكت امطار
وف وسط غياباتك
نورت عيني نهار
بتموجي ليا بنار !!
عارفاني اني بخاف؟!
ولا اني بعرف اكش
ده القلب ياماه شاف
لساكي برده مشافش
ماهو نفسي نا شوفك لاجل ما نعرفني
وبإيه ارد يا ناس لو حد وقفني
ده بطاقتي تكسفني
الاسم : مسموشي
السن : عمر طويل بس معشتوشي
عملي ميعرفنيش وكفوفي مشافوشي
واقامتي جبرية .. سجن مالوهش حيطان
قالوا عليه دنيا .. والدنيا ناقصة امان
فاكر كده عرفته
واني كده عشته
وبرده معشتوشي
.................
و لإمتى دلعك بس
ماهو برده نفسي احس
اني كما حبيت
منك انا اتحبيت
بس انتي معذورة
م اللي جرى فيكي
لساكي مكسورة
وانا بلوم فيكي
طب ده الملامه تجوز بين ناس بيتحابوا
فما بالك انه عتاب ولو انه ورا قلبه
ليكي يا محروسة
ياللي انتي اوطانه
وان كان مهوش مرتاح
فالصبر له اوانه
صابر على حكايتك
مستني ضحكايتك
ويبص في مرايتك
يقدر يشوف نفسه
ويارب ما ف نفسه
تبقى كده نهايتك
................
1/1/2012