السلام عليكم
كان ياماكان يا ساده ياكرام مايحلى الكلام الا بذكر النبى عليه الصلاه و السلام
كان فيه دبدوب صغنن عايش مع ماما و بابا وكان زعلان اوى انه مالوش اخوات وكان بيقعد مع مامته بس و مبيكلمش حد


وفى يوم طلع لوحده من غير ما يقول لماما وراح عند الدباديب الصغننين و لا قى دبدوب عسول كده شبهه راح لعب معاه


قعدوا يلعبوا سوا و نسى خالص انه مش استاذن من ماما و ان ما ما هتقلق عليه و بابا هيزعل منه
وبعدين صاحبه قالوا يلا بينا نروح نلعب مع صحابى عند البحر هنلعب و نهيص و صحابى دول هيحبوك اوى
راح قالوا ماشى انا موافق انا نفسى العب مع دباديب كتيييير من سنى
وراحوا رايحين عند الدباديب التانيين بس هما كانوا مستاذنين من ماماهتهم و محدش كان خرج من غير ما يقول لماما غيره هو وبس


فضل يلعب و الوقت اتاخر و ماما قلقت عليه و قعدت تدور عليه فى كل حته


وبابا كمان ماسابش حته مادورش فيها


وفى الاخر بابا شافه مع صحابه من فوق الشجره كانوا تعبانين من كتر اللعب فناموا و نعسوا على شجره صغنونه جنب البحر



بابا راح جابه و اخده البيت و كان زعلان منه خالص خالص و لما روحوا بقى ماما مسكته و ضربته حته علقه




وهو يقولها خلاص حرمت مش هعمل كده تانى و هى تقوله انا خفت و قلقت عليك خاااااالص و ماما قعدت تعيط جامد




وهو قالها انا اسف ياماما اوعدك عمرى ما هعمل كده تانى انا خلاص عرفت ان ده غلط بس انا يا ماما دبدوب وحيد وبحب العب مع الدباديب الصغننين و بحب اخرج و اتفسح و انتى و بابا مشغولين عنى طول الوقت و انا زهقان




ماما راحت واخداه فى حضنها وقالتله يا عنيا حاضر انا و بابا هنهتم بيك خالص و هنخرجك و نفسحك و هسمحلك تخرج مع صحابك تلعب بس لازم تستاذن منى و من بابا وما تتاخرش بره و ما تروحش بعيد



وفعلا ماما بقت توديه فى كل حته و تروح البحر معاه و الغابه كمان


ولما يتعبوا من اللعب كانوا بيناموا فى الغابه سوا

وتوته توته فرغت الحدوته يا حلوييييييييين
ياترى اتعلمنا من الحدوته ايه ؟ اكيد اتعلمنا اننا ما نروحش اى مكان من غير ما نستاذن بابا و ماما عشان ما يقلقوش علينا و كمان عشان ما يحصلناش اى حاجه وحشه لا قدر الله