السلام عليكم ورحمه الله وبركاته

انا جيت تانى وموضوع رائع تانى وجامد جدا تانى معلش بقى مانا قاعد والأفكار نازله تفرفر على دماغى هعملكوا إيه يعنى إستحملونى

ولا ليه تستحملونى ليه هو انا مواضيعى وحشه ولا إيه

قبل ما اتكلم فى الموضوع ليا طلب من المشرف على هذا القسم ومشرفين العموم لو سمحتوا اطلب عدم نقل الموضوع للركن الإسلامى ولهذا الطلب سبب وهو إن إللى انا عايز يوصله الموضوع ده شباب وشابات مبيدخلوش القسم الإسلامى كتير او مبيدخلوهوش اصلا بعد إذنكوا فلو سمحتوا هخرق النظام هذه المره وأوعدكم إنى مش عارف إن كنت هكرر هذا الموضوع مره اخرى ولا لاء

انا بس عايز علشان أبتدى الموضوع اسأل سؤال ...... سؤال حلو كده ومتتسرعوش فى الإجابه ....

يعنى إيه لا إله إلا الله ؟؟؟؟

إصبروا يا إخواننا علطول كده جريتوا ع الكيبورد وهتكتبوا هو مش انا إللى بكتب الموضوع ولا إيه لما تكتبوا إنتوا أكتب انا إيه بقى !!!! حاجه عجيبه والله

طبعا كلنا عارفين إن معنى لا إله إلا الله يعنى (لا معبود بحق إلا الله) عظييييييييييييم جدا طيب ماشى إحنا بنقر بقولنا لا إله إلا الله إن لا معبود بحق إلا الله يعنى لا رازق إلا الله يعنى مصرف للأمور غير الله يعنى لا متحكم فى هذا الكون وما بعده وماقبله غير الله يعنى لا حاكم إلا الله .... صح

إستنوا إستنوا إنتوا بتقروا أى حاجه اكتبها كده وخلاص إرجعوا شوفوا آخر حاجه كتبتها

أيوه هى دى إللى اقصدها تحديدا لا حاكم فى الكون كله إلا الله مش كده ولا حد بيقول غير كده ؟؟؟!!!

طيب انا خلصت الجزء الأولانى هدخل فى الجزء الثانى وهو
تعالى كده يا أخى او يا أختى لما أسألكوا سؤال هو لما الواحد فينا بيشترى موبايل من نوكيا بيروح يجيب مثلا كتالوج بتاع تليفون أرضى علشان يعرف هيشغل إزاى التليفون النوكيا ولا بيبص فى الكتالوج بتاع نوكيا ؟؟؟ واحد هيهزر ويقولى لا هبص فى كتالوج سامسونج ده انا اقوله بلاش تكمل الموضوع يا باشمهندس وقوم من هنا

طيب ليه هبص فى كتالوج نوكيا ؟؟؟ علشان هى الشركه المصنعه يعنى هى إللى عارفه تفاصيل كل حاجه فى التليفون ده هى إللى عاملاه مش كده

طيب ولله المثل الاعلى .. الله سبحانه وتعالى هو خالقنا وهو اعلم بينا مش كده وربنا جل فى علاه أنزل لينا (كتالوج) لكل امور حياتنا .... أه والله

انا اسف هو مش كتالوج هو حاجه كده يااااااااااااااااااااه جميله اوى يا جماعه فيها حل لكل حاجه وفيها تفصيل لكل صغيره وكبيره .... هو خالقنا اعلم بينا وهو إللى شرّعلنا الشريعه إللى تتوافق مع الإنسان وبما إن الله خالقنا يبقى مينفعش اروح لأى حد تانى يشرعلى او يعملى قوانين علشان امشى عليها

طب ليه ... ماهو انا كده ابقى روحت جيبت كتالوج التليفون الأرضى علشان استخدم نوكيا ....
يعنى انا سيبت شريعه الخالق سبحانه وتعالى وروحت ادور على حد تانى يعملى قوانين والغريبه إن الحد التانى ده إنسان زييى زيه لا يملك لنفسه ضرا ولا نفعا ... عامل فيها فلوطه ورايح يشرع من الآخر ويعمل قوانين

حتى لو كان اعلم اهل الأرض عمره ما قوانينه هتبقى زى شريعه خالقنا الله سبحانه وتعالى عمره ما هيعرف إيه يناسب الإنسان وإيه ميناسبوش زى ربنا سبحانه وتعالى بل حتى لن يستطيع الوصول لواحد على مليون من الشريعه يا إخوانى والله

طيب انا عايز اقول إيه بقى
معلش انا رغاى شويه وطولت بس اكيد بعد ده كلوا عايز أقول حاجه مش بدرب صوابعى انا ع الكتابه

عايز اقول إننا بما إننا بنُقر إن لا إله إلا الله وإللى منها قولنا أنه لا حاكم فى الكون إلا الله وكمان فصلنا إن مافيش حد يقدر يشرعلنا ولا يحددلنا قوانين حياتنا وتنظيما غير الله سبحانه وتعالى يبقى كده معندناش مشكله نهائى فى إن الحاكم يحكم شريعته فى أرضه وكونه كله لأنه الأنسب والأقوى والأفضل لبنى آدم

عظييييييييييييييييييييييي ييييم اوووووووووووووى إننا وصلنا لحد كده النهارده
انا لو كتبت حرف تانى الناس هتفصل منى علشان كده بكره هكمل بس خليكوا فاكرين إننا وصلنا لنقطه ممتاااااااااااااااااااازه وبكره بإذن الله هنكمل شويه حاجات كده مع بعض

وبالنسبه للأخ إللى بينفخ ويقول إن الموضوع طويل اوى انا شايف وعارفك وهجيب قشطه كده وساعتها هقعدك ع المنتدى تقرأ مواضيعى كلها وتعلق عليها كمان يا برنس

والله الموفق