الموقف الاول

كنت راكبة المواصلات وفجأة لاقيت اللى جنبي بتكلمنى

هي : أنتى رايحة فين يا حبيبتي؟
انا : مروحة يا حاجة
هي : انتى مرتبطة؟
انا : لا لسة ......... ادعيلي
هي : بتعرفي تطبخي وتغسلي؟
انا : دة انا لهلوبة فى عمايل المطبخ والحمد لله
هي: بتعرفي تقري وتكتبي؟
انا : دة انا معايا ماجستير وباحضر دكتوراة
هي : ما.... ايه؟ ........ على جنب يا اسطي نزلنى هنا





موقف تاني

رن جرس التليفون وجريت ارد عليه لاقيت زميل والدى

هو : السلام عليكم ورحمة الله وبركاته
انا : وعليكم السلام ورحمة الله وبركاته
هو : بابا موجود؟
انا : لا يا عمو ....... نزل يصلى فى المسجد وزمانه جاى
هو : مخطوبة يا حبيبتي؟
أنا : لسة يا عمو
هو: وانتى اسمك ايه بقى يا عسولة؟
أنا : اسمي رشا
هو: اسمك جميل .......... فى سنة كام يا حلوة؟
أنا : معايا ماجستير وباحضر دكتوراة
هو: طيب ربنا معاكي ....... متنسيش تبلغي بابا انى اتصلت بيه ولو نسيتي يبقى أحسن ....السلام عليكم



الموقف التالت

مخنوقة وعاوزة اغير جو ......... نزلت مع قريبتي ورحنا النادي نغير جو واحنا فى النادي لاقينا شاب زي القمر جاى علينا


القمر ... قصدى الشاب : السلام عليكم ورحمة الله وبركاته .... حضرتكم مشتركات جداد فى النادى؟
قريبتي : لا يا بني .... خير فى حاجة؟
الحليوة : ابدا يا طنط .... بصراحة ومن الاخر انا معجب ببنتك وباخلاقها وعاوزة اتقدم لها ..... ممكن بس اعرف مؤهلها؟
قريبتي : معاها ماجســـــــــــ .........
أنا : معايا اعدادية







بسم الله الرحمن الرحيم

أزيكم يا اخواتى؟

يارب تكونوا بخير

دردشتي النهاردة بتحكي عن مأساة بتتعرض لها كل بنت اجتهدت وشدت حيلها عشان ترفع راس اهلها ومشت في الدراسة واخدت الماجستير والدكتوراة

هايجي عضو يقولي " كل شيء قسمة ونصيب" .....
والله انا واثقة ومؤمنة بالله عزوجل وعارفة ان كل شيء بميعاد وعمري ما هاعترض على قضاء الله .......
لكن انا فعلا مستغربة من حال بنات كتير ومش عارفين يتجوزوا لان عيبهم الوحيد مؤهلاتهم العليا

طول عمري اعرف ان البنت بتترفض عشان اخلاقها لا سمح الله مش كويسة .......
جمالها مش اد كدة ........
مش من عيلة كبيرة ( دي العيوب اللى سمعت عنها )
لكن ان معاها ماجستير ودكتوراة دي بصراحة مش عارفة لها حل




اتمنى تشاركونى حيرتي وحيرة كل بنت مجتهدة وطموحة

ومتنسوش تدعولى

الاقي ابن الحلال اللى يقبلني بشهادة الاعدادية