انا اسمى هانى ..عجبتنى واحده معايا ف الكليه شكلها حلو اوى ومحترمه جدا وخجوله جدا وعمرها مامشت مع ولاد قبل كده .. وانا عمرى ماكلمت بنات قبل كده .. طب اعمل ايه ؟؟

فى يوم لقيتها قاعده لواحدها فى الكليه .. حبيت اطبق قاعدة الصديق وقت الضيق .. كلمت عمرو صاحبى عنها وشاورتله عليها .. قالى ماتروح تكلمها يابنى حد ماسكك ؟! .. قولته لا اصل انا محترم ومبحبش اكلم البنات كده عينى عينك ف الكليه لأنى مارضهاش لأختى .. قالى خلاص خليك كده تأمل فى جمالها كل يوم وخلاص
- انت هتهزر يا عمرو ؟ بقولك عاجبانى .. ايه الحل دلوقتى ؟؟
- تحب اروح اكلمهالك ؟
- لا يا عم انت عبيط .. كده هتستهفأنى .. ولا أقولك .. ماشى روح روح
-طيب يا عم .. استنى اما افكر ف طريقه حلوه افتح بيها كلام معاها ..

شويه كده وعمرو راحلها ووقف معاها وانا واقف من بعيد مترقب الموقف على احر من الجمر ..

شويه لقيته جايلى وبيقولى قشطه يا معلم دوس انت بقه انا ظبطهالك

- ازاى يعنى قولتلها ايه ؟؟

يا عم ملكش دعوه انت اهم حاجه تخش عليها بقلب جامد كده وتقولها انا صاحب عمرو وهى هتفهم علطول

المهم سيبته ووشى احمر مع ابتسامة فرحه وخجل مع بعض ومشيت نحيتها بخطوات ثابته ..
ولما وصلت قدامها ...

- سلامو عليكم
-وعليكم السلام
-انا هانى صاحب عمرو اللى كان واقف معاكى من شويه
-اهلا بيك
- الحقيقه انا معجب بيكى جدا بس كنت محرج اكلمك الفتره اللى فاتت دى .. وبصراحه كده انا عمرى ماكلمت بنات قبل كده عشان كده هتلاقينى متلخبط ف كلامى بس معلش بقه
سكتت ....
انا سكتت ....
دقيقة صمت مابينا كانها حداد على روح حد مات
وبعدين ..

انتى ساكته ليه ؟؟ فيه حاجه ولا ايه
لا مفيش ..هو صاحبك ماقلكش ولا ايه ؟
- لا ماقليش .
-انا متجوزه !!!!&&&&!!!

(وصف ملامحى بعد الكلمه دى) :
ازبهلال مع احمرار فى وشى مع سخونه فى جميع اجزاء جسمى ودخان وريحة شياط طالعين من شعرى .. مع ابتسامه صفرا مكتومه .. وبعدين قولتلها :
- والله ؟؟

هى (وهى بتضحك) : اه والله ههههههههههه
أنا(وانا بضحك برضه) : تصدقى ماقليش والله هههههههههههه
الف مبروك ههههههههههههههههههههههه
- الله يبارك فيك ههههههههههههههه

ببص ورايا على عمرو : لقيته واقف مع الشله بتاعتنا وكلهم بيبصو عليا وبيعيطوا من كتر الضحك

مشيت من قدامها براحه وحسيت وانا ماشى انى مغيب ومش دارى بنفسى وافتكرت المقطع اللى بيقول ( ابص لروحى فجأة لقيتى... لقيتنى كبرت فجأء كبرت .. تعبت من المفجأه ونزلت دمعتى) .. وحسيت ببروده غريبه فى جسمى مع ان الحته حر لحد ماعرفت بعدها بشويه ان البنطلون كان
مبلول!

ملحوظه .."دى قصة هانى مش قصتى