الفيسبوك مليان قلش دمه خفيف عن كوريا الشمالية :) فحبينا نتكلم شوية جد:

كوريا الشمالية دي ظاهرة تستحق الدراسة ..
هي أكثر دولة مغلقة في العالم برغم اننا في القرن الواحد والعشرين ..
الدولة تعداد سكانها 24 مليون نسمة ..
منهم مليون ونصف مواطن فقط عندهم موبايلات ..

عندهم شبكة مغلقة (إنترانت) بديلة عن الانترنت لجميع المواطنين للتواصل فيما بينهم وتصفح المواقع الكورية المحلية .. والإنترنت بمعناها زي عندنا متاحة بتصريح خاص ومراقبة لضمان إن أنشطة الأفراد اللي بيستخدموها لا تخالف القانون بتاعهم ..

المواطن الكوري الشمالي ممنوع من التنقل داخل كوريا والعيش في أي مدينة دون إذن من أجهزة الدولة .. وكمان بديهي هيكون ممنوع من السفر خارج كوريا! .. لكن القاعدتين ليهم استثناءات بحسب القوة الاجتماعية أو السياسية أو المادية للشخص أو لما بيكون الشخص موظف في الحكومة ويتحتم عليه السفر للخارج ..

الكوريين ممنوعين من مشاهدة أي قنوات أجنبية أو يقروا جرائد غير محلية .. وكل وسائل الإعلام حاليا إما مملوكة للدولة أو لشركات أصحابها مقربين من الدولة .. والاستثناءات برضه بتكون لكبار الموظفين في الدولة أو الأغنياء أو اللي بيعيشوا على الحدود مع الدول الأخرى فبيقدروا يلقطوا وسائل إعلام تلك الدول ..

طبعا مفيش حاجة إسمها هناك تظاهر أو اعتراض إلا طبعا المظاهرات اللي بتكون ضد كوريا الجنوبية أو سياسات الغرب تجاه كوريا .. واللي بيقل عقله مباحث أمن الدولة الكورية الشمالية بتعمل معاه الواجب .. فيه هناك عدد يقدر بأكثر من 150 ألف معتقل سياسي بتهم متعددة لمعارضة النظام والمساجين بيروحوا معسكرات مغلقة عشان يعيشوا فيها خلال فترة سجنهم .. بالمناسبة من التهم اللي ممكن تتسجن عشانها: مشاهدة فيلم كوري جنوبي ..

وآخر معلومة نحب نقولهالكم .. إن اللي بيحكم البلد دي .. مواليد 1984 ..