المشهد الأول قسم الشرطه:
- لو سمحت يا عمو عايز اطلع بطاقه انتخابية :]
- عمو.....! عمو إيه يابنى انت في محل بقال؟ وبعدين بطاقه انتخابية إيه؟
- الانتخابات على الأبواب وكنت عايز أدلي بصوتي في الانتخابات اللي جايه
- تدلى بصوتك ليه؟ انت عندك كام سنه؟
- 20سنه
- خلاص معاك بطاقه؟
- ايوة اتفضل
- ايه دى يابنى دى بطاقه قديمه أنا عايز بطاقه رقم قومي
- اللي هي ايه؟
- من اللي الناس صورهم فيها تحس إنها متخلفة عقليا
- ايوه عرفتها... ودى منين حضرتك؟
- حلوة حضرتك دى ....هاقولك يابنى تتعمل ازاى....(وش وش وش وش )..فهمت؟
- ايوة شكرا...دى الوصفة سهله...دى الوصفة هايله
- طيب ... مع السلامة يا ابو عمه مايله
المشهد الثاني أوبريت الليلة الكبيرة....آسف في السجل المدني:
وأنا ماشى أمام شباك السجل المدني آلاف من المواطنين يتدافعون لمحاولة الوصول إلى أول الصف
الذي لم يبدء أحد في تنظيمه وكل منهم يمنى نفسه إن يبص له موظف السجل المدني انشاالله حتى بقرف
وبعد 5ايام من الزحام وصلت لموظف السجل المدني وقدمت له الورق
- كنت عايز اطلع بطاقه رقم قومي
- ماقدرشى أصورك في البطاقة وانت مربى دقنك طلعه كده دى محتاجة إذن من أمن الدولة*(1)
- أنا مش مربى دقنى ده هي اللي طلعت على بال ما وصلت لك أنا في الصف من 5 أيام
- عموما لف لى احنا عاملين حسابنا (مستديرا إلى شخص بالداخل_يا على جهز الموس )
دخلت المكتب من الداخل واكتشفت إن مش مجرد على بس اللي بيحلق جوه ده فيه كمان فريده الكوافيره
اللي بتعمل ماكياج للسيدات وفورمه شعر قبل ما يتصوروا للبطاقة
- لو سمحت مين اللي هيصورنى؟
- أنا طبعا
- انت برده يا على...!
- بلاش غلبه..بص للكاميرا..اطلق خيالك في العنان..بص العصفورة..خلاص
- ممكن أشوف الصورة ....يمكن تكون مش حلوه
- يلا ياله من هنا...اللي بعده
بعد أسبوعين في السجل المدني تانى
- لو سمحت البطاقة بتاعتى هاستلمها النهارده
- هات الوصل ..يلا يابنى بسرعة..انت بطيء ليه
- أنا مادد ايدى بالوصل من الصبح انت اللي مش باصص خالص
- خلاص ( بعد ساعه ونص ) امسك البطاقة
كان نفسي أشوف صورتي بس بعد ما دققت فيها شويه والحق يقال تحس إنها شكل البنئادمين بالظبط
المشهد الرابع قسم الشرطه:
- لو سمحت حضرتك طلبت منى بطاقه الرقم القومي عشان تطلع لى بطاقه انتخابية
- ااااه افتكرتك....خد ال 50 ورقه دول املاهم وبعدين ارجع لى
وبعد ساعتين:
- البطاقة الانتخابية اهيه..بس ابصم لنا هنا بصوبع رجلك الكبير..ايوه هنا
- بس كده خلصت
- لا لسه ابصم لنا هنا بودنك اليمين
- ودنى ايه يا حضره الظابط؟؟؟!!!
- ايوه ودنك..انت ما تعرفش إن بصمه الودن مش ممكن تتقلد انت ما بتقراش ادهم صبري ولا ايه؟
- زي ما حضرتك عايز(و أخيرا البطاقة... دلوقتى هاأدى الواجب الوطني لوحدى)
المشهد الخامس لجنه الانتخابات:
- انت ياله رايح فين؟؟؟
نظرت خلفي بدهشة من صاحب الصوت الغليظ ...تقريبا هوة بلطجى.. وبلعت ريقي ..وبكل شجاعة
- رايح أصوت في الانتخابات
- لو ما مشيتش دلوقتى هاخليك تصوت مكانك..روح بيتكم ما حدش داخل اللجنة دى يعمل حاجه
أنا الفلوس اللي قابضها قابضها عشان امنع أي حد يدخل اللجنة
- (بصوت منخفض هامسا لنفسي) ايه ده بلطجى وكمان أهبل..لا دى احلوت قوى
-انت لسه واقف يابن ال..........( املأ مكان الفراغ بكلمه مناسبة -ثانوية عامه 98)ش
- أنا ماشي خلاص مش رايح اللجنة (اهيء ..اهيء .. اهيء)
اصحى الساعة بقت 12
- كويس انك صحتينى من النوم يا ماما كنت باحلم بكابوس..بس كويس إني صحيت عشان ارجع
للعصر بتاعنا تانى (أزهى عصور الديمقراطية)
منقول