أولا :الاستعداد الإيماني:
ودة أهم حاجة عشان مايبدأش رمضان وآجي أدور على قلبي ملقيهوش..وتلاقي الواحدة مننا عاملة جدول راااااااااائع من العبادات ولكن...فين قلبها؟؟!

عشان كدة لالازم ننضف قلبنا ف الاول...طيب ازاااااااي؟؟




هما حاجتين هاتركزي عليهم وشوفي النتيجة

أولهم :الاستغفار
طب نعمل ايه يعني؟
اولا هاتلزمي الاستغفار..احنا أهو بنبدأ شهر شعبان ..يعني معانا شهر تقريبا الا كام يوم
كل يوم هانستغفر على الاقل 1000مرة (ألف مرة)
واوعي تقولي كتير ...انتي لو بعد كل صلاه هاتستغفري 200مرة ودول مش بياخدوا 3دقايق على بعض هاتجيبي ال ألف مرة ف اليوم كله
وياريت تكوني مركزة وانتي بتستغفري على ذنوبك...بس افتكريها ..وشوفي احساسك بالاستغفار هايكون ازاي
تاني حاجة التوبة

واحدة بتقول واتوب من ايه يعني انا مش بعمل حاجة عشان اتوب منها ...ياااااااااا
لو تعرفوا يابنات احنا قد ايه مخطئين في حق الله وفي حق انفسنا والله نبكي ليل نهار على حالنا
يكفينا والله يابنات اننا نتوب من الغفلة وتضييع الوقت..ومن الغيبة كل يوم ف الموبايل مع صحبتك ولا قريبتك ومن تضييع الوقت طول اليوم ع النت
محتاجين نتوب من تقصيرنا مع ولادنا وبيتنا وأهلنا محتاجين نتوب من تأخير الصلاة ...........انتي بس فكري كويس هتلاقينا بنعمل بلاوي ومش داريانين.
فاضل كمان حاجة صغنونة هاتزوديها مع الاستغفار والتوبة في شهر شعبان وهي جدول صغير هانمشي عليه سوا من باب تحفيز الهمة كأنه تسخين كدة استعدادا لرمضان
وبكدة يبقى نضفنا قلبنا بالتوبة والاستغفار ودربنا جوارحنا على الطاعة

وآآآآآآآآآدي الجدول:
1.سبحان الله وبحمده 100مرة
2.استغفار 1000مرة
3.لا اله الا الله وحده لاشريك له له الملك وله الحمد وهو على كل شيء قدير100مرة
4.الصلاة على النبي 100مرة
5.أذكار الصباح والمساء
6.صلاة الضحى (ركعتين على الاقل)
7.القيام ولو بركعتين قبل النوم مع الدعاء
8.ورد القرآن بحد أدنى حزب (نص جزء)وبحد أقصى 10اجزاء يوميا
9.قراءة سورة الملك
10.السنن النوافل وعددهم اجمالا 12ركعة
11.ربع ساعة خلوة مع الله (تبتل) ودة اكيد لما عيالك وجوزك يناموا
12.التحلي بالاخلاق الحميدة في كل تعاملاتك




وكدة يبقى خلصنا الاستعداد الايماني وفاضلنا الاستعداد الدعوي و المنزلي
تابعوني ف المشاركة الجاية محدش يرد