هل سألت نفسك كيف يمكن ان يخدعنا الصنايعية و العمال اثناء قيام البعض منا بأعمال البناء و التشطيبات
فى منازلنا ؟؟؟
هل سألت نفسك كيف يمكن انان نتجنب مثل هذه الخدع ؟؟


سوف نعرض عليكم الان بعض طرق العمال و الصنايعية فى الاحتيال و النصب عليكم و سرقة الاموال و المون
بس بقى تدعولى على المعلومات اللى قعدت اجمعهالكم من المهندسين و بعض الصنايعية المحترمين و ياريت تنشروا المعلومات دى على قرايبكم و اصدقائكم عشان الجميع يستفيد منها ..


نبدأ بعمال المسلح
==========
لو انت لسه بتبنى بيت أو عمارة أو فيلا اكيد هتشترى حديد تسليح و بهد ما تجيبه بتخزنه بيقوم بعض العمال بالاتفاق مع الخفير اللى بيكون بيحرس الحديد و الاسمنت بسحب عدد من الاسياخ و انت مش موجود و طبعا لان سيادتك مش بتراجع على الحديد أو بتعد وراهم بتلاقيهم مقلبينك فى حوالى نص طن بالميت .. عشان كده لازم تتابع الحديد و تعده باسستمرار و تعرف عدد الاسياخ اللى بتتبقى كل يوم .


نجارين الابواب و الشبابيك
===============
طبعاً سيادتك بتروح تتفق مع النجار و مش بتهتم بنوع و شكل بالخشب لانه هو اللى بيروح يشتريه بنفسه و طبعا لا بيشترى و لا بيهبب الا حاجات بسيطة و هوه بقى يقوم عاملك الابواب تجميع من كل فيلم اغنية .. يعنى بدل ما يعمل الباب حته واحدة بيجيب الحتت اللى بتكون فاضلة عنده و بيقعد يلحمهم فى بعض و بعد كده يديهم معجون و يدهنه اسطر و طبعا انت لو مش خبير هاتدخل عليك عادى جداً .. و لو عرفتها هيقولك يا بيه ده انا مطعملك الباب بوصلات و حتت زان و بلوط عشان يبقى متين و شديد و يستحل معاك .. و بعد كدا تلاقى ولادك مع اول قفلتين جامدين للباب تلاقيه نمل و اتفزق من بعضه عشان كدا اكد على النجار انه يعملك الباب حته واحدة و لازم تشوفه قبل الدهان هوه و الشبابيك عشان تشوف و تطمن .
شــامــم ريحــة شيــــاط
الكهربائى
=====
و ده بقى المصيبة الكبيرة و اللى ممكن ينصب عليك فى الاف من الجنيهات و انت مش داريان بحاجة ... أول حوار ممكن يعمله عليك هيقولك تعالى نشترى الطلبات من عند الحاج فلان " اللى هوه مظبط معاه من وراك " حاجته أصليه و مضمونه و رخيصه و سيادتك تروح معاه و يلبسوك فى انواع مضروبه من الاسلاك و المفاتيح و بنفس اسعار الحاجة الاصلى .. مش كده و بس و بيزود عليك فى السلك يعنى ممكن يشيلك فى الشقة الواحده لفتين سلك بحوالى ألف جنيه و لما يجى يسحب السلك فى المواسير اللى حوه الحيطان يخلى الصبى بتاعه يقف جوه اوضة تانية و يقعد يسحب منه و يلف السلك على وسطه تحت القميص او التيشيرت بتاعه و انت فى الاوضه اللى بيدخل منها الكهربائى السلك فى المواسير واقف معاه وشايفه بيحط السلك فى الحيطة قدامك و لو شافك اكلتها و ماحسيتش يقولك هنحتاج سلك تانى و تروح تجيبله و يقلبك برضه عشان كده * نصيحة منى ليكو لازم قبل ما تشترى الحاجه تروح تسأل عند كذا حد و تجيبها من محل معروف و مضمون و تشوف الماركة مطبوعة على السلك و تراقب الكهربائى و اى صبى معاه كويس .


السبــاك
=====
و ده برضو هيحاول يخليك تشترى البضاعة من واحد تبعه ذى الكهربائى و هيجيب طلبات اكتر من اللى هوه محتاجها .. يعنى بدل ماهى عايزه عشرين نبل يجيب تلاتين و وصلات و حرف تى و غيره و يجى يخنصر الزيادات و يخبيها فى المنور و ينزل و هوه مروح ياخدها و يرجعها للبائع و ياخد فلوسها .. عشان كدا لازم تراجع و راه قبل ما يقفل على المواسير حوه الحيطة و تعد اللانبال و حرف التى و الاكواع و كل الوصلات لحسن يكون مخنصر منك ..
شــامــم ريحــة شيــــاط
مبيض المحارة
========
و ده بقى فى الغالب مش هيسرقك لكنه غالباً ما بيطلسق الشغل و يعمل الحاجه اللى تتعمل فى ساعة فى نص ساعة عشان يخلص و يشوف غيرك و الكارثه الكبيرة انه ده بالذات لما شغله ما بيكونش مظبوط بيضيع كل حاجة .. يعنى مثلاً لو عمل المحارة فيها عالى و واطى انت مش بتاخد بالك منها الا بعد البياض لما الحيطان تنور تلاقى الحيطه مكرشه " يعنى فيها عالى و واطى و ممكن تلاقى موجة فى الحيطة و الحاجات دى بتشوه المنظر و مالهاش علاج .. كمان لو مبيض المحارة قفل شغله و خلى ملمس المحارة الخارجى " خشن " احب ابشرك ان المعجون اللى المفروض تستعمله قبل البياض هيتضاعف يعنى بدل ما تجيب بــ 200 جنيه معجون هتجيب بــ 500 جنيه ...
عشان كده لازم تقول لمبيض المحارة قبل ما يبدأ شغله انك هتستلم منه الشغل بالليل و على لمبه نايلون .. يعنى تجيب سيادتك لمبة نيون و تيجى بالليل تحطها بشكل رأسى على الحيطان و تمشيها واحدة واحدة على الحيطه و انت لوحدك هتكتشف اى عيون بشكل واضح و ساعتها لازم تخليه يصلحها و الا هتبقى ظاهرة بعد ما تبيض .. و كمان ممكن تقوله انك هتستلم المحارة بالــ " إيده " و الإيده " دى عبارة عن عصايا الومنيوم على سكل متوازى مستطيلات بتتحط على الحيطة و تبص لو فيه فرق منور مابينها و بين الحيطه تعرف ان فيه عيب على طوووول


النقاش " او المبيض
===========
و ده برضو ممكن ينصب على سيادتك بنفس طرق الكهربائى من أول شراء المون " المعجون – الطلاء " و خلافه عن طريق تاجر تبعه .. لكنه غالباً بيطلب طلاء اكتر من اللى انت محتاجه خصوصاً طلاء آخر وش " اللى بيسموه الكيموتون " و ده بيكون غالى جداً يعنى الجالون أو " البستله " الواحدة بتعدى الــ 350 جنيه و تبقى انت قاعد و تلاقى النقاش يدى الصبى بتاعه " قله " و يقله انل املى القله دى ياد من تحت و يبصلك و يقولك لامؤاخذه يا استاذ اصلى انا ماشربش غير من القله و الواد الصبى يملى القلة كيموتون و ينزل يفضيها تحت السلم فى جركن تبعه و يلسعك فى الاخر فى حوالى 2000 جنيه .. و لو لقاك مفتح و عارف الشقه هتاخد قد ايه طلاء فى الحالة دى مش هيطلب شراء جوالين زيادة بس هيقلبك برضو بس عشان ماتكتشفش السرقه هيحط على الباقى من الكيموتون ميه " ماء " و عشان لونه ما يخفش هيحط عليه دقيق و مش هتاخد بالك الا بعد حوالى شهر هتلاقى البياض على الحيطان بدأ يشقق و يقع حبه حبه .... عشان كده لازم تتابع النقاش و صبيانه كويس أوى ...


و ياريت تنشروا المعلومات دى على قرايبكم و اصدقائكم عشان الجميع يستفيد منها ..