دي صورة واحد يعتبر أشهر " منتحل شخصيات " في العالم
انتحل صفة اكتر من 500 شخص حول العالم
أغرب حاجه عملها , انّه كان بيختار العائلات الي ضاع منها ابنها من مده طويله ويعمل نفسه انّه ابنهم الي ضاع وبالفعل نجح وعاش مع عائلات في بيوتهم على انّه ابنهم
____________________

اشهر واقعه ليه كانت في 1997 و اتعمل عليها كذا فيلم ...

الراجل كان في اسبانيا و اقنع السلطات في اسبانيا انه " مراهق امريكي " عنده 16 سنه ,وان عائلته في أمريكا وهوّا ضايع منهم من 5 سنين وانه اتخطف من أمريكا وميعرفش هوّا وصل اسبانيا هنا ازاي

وبالفعل كلموا الناس الي بيقول انهم عائلته وقالولهم ان احنا لقينا ابنكم تعالوا خدوه , وبالفعل اخدوه من اسبانيا وعاش معاهم في امريكا وطلعوله جواز سفر أمريكي وبقى بيروح المدرسه وعملوا معاه حوارات في التليفزيون هناك في امريكا عشان يحكي ازاي اتخطف واتعمل معاه ايه هناك في اسبانيا , طبعا اعد يألفلهم حكايات عن انه ازاي اتخطف واتعذّب وتم اغتصابه وكل الناس صدّقت
___________________

السلطات هناك في امريكا ابتدوا يشكوا في انّه مش هوّا بسبب ان شكله يقول انه اكبر من 16 سنه وهوّا في الوقت ده كان عنده في الحقيقه 23 سنه

حاولوا يعملوا تحليل DNA ليه ولعائلته ولكن عائلته رفضت لأنهم وصلوا لمرحلة اقتناع انّه هوّا ابنهم ومستحيل يبقى حد تاني

السلطات قدّمت اثباتات لعائلته انّه مش ابنهم , ولكن العائله مازالت متمسّكه بيه وبأنه ابنهم , هنا السلطات شكّت في العائله وانها ممكن تبقى وراء اختفاء الطفل الحقيقي " ابنهم "

جابوا امر من المحكمه بالتحليل ... واثبتوا انه مش ابنهم وقبضوا عليه و اتحاكم واتسجن 6 سنين ,و السلطات معرفتش تثبت حاجه على عائلته في موضوع اختفاء الطفل الحقيقي
____________________

اتعمل فيلم وثائقي في 2012 عن الواقعه دي واسمه The Imposter
وابطال الفيلم همّا اصحاب الواقعه الحقيقيين " النصاب "و" العائله الي اتنصب عليها " , وطالعين في الفيلم بيحكوا الحكايه .

النصّاب" فرنسي الجنسيه " اسمه الحقيقي : Fredric Bourdin
وبيقول انه كان بيعمل كل ده عشان كان نفسه يهرب من الواقع الي هوّا عايش فيه .. ونفسه يبقى عنده عائله تحبّه .. وانّه مكنش عنده طفوله لانه اتولد معندوش عائله ومعندوش اب وميعرفش حتى اسم ابوه ... وبيقول انه ميعرفش حاجه عن والده غير انه " مهاجر جزائري " ..

وهّوا ساب النصب دلوقتي وعايش في فرنسا واتجوّز وخلّف