أكلتي اليوم اسمها ( منزلة البيتنجان ) أو اختصارآ المنزلة

بتنعمل من البيتنجان المقشر و المقلي و المحشو باللحمة الهبرة المفرومة و المقلية , و مطبوخ بماء البندورة


بالأصل هالأكلة : فقط بيتنجان , و لكن بينحط معها بمرقتها بندورة مقطعة , أو دبس بندورة ( رب البندورة ) أو دبس و بندورة مع بعض , و شقف فليفلة خضرة , بتعطيها نكهة روعة




و لكن نحن منحشي مع البيتنجان , بندورة و فليفلة , فبيعطوا النكهة , و بيطلعوا كتييييير طيبين




الطريقة يا حبيباتي باختصار :




بيتنجان حجم صغير




نترك القمع بالبيتنجانة و نزيل فقط منه الأوراق النازلة


نقشر البيتنجان




نقليه بزيت غزير



بعد القلي نضعه على ورق نشاف الزيت


نفرم لحمة هبرة و نقليها بزيت مازولا مع ملح و كمون و أكيد بهار



نحشو البيتنجان باللحمة , و نحشو معه الكمية المرغوبة من البندورة و الفليفلة , و نضعها بالطنجرة , و نرش فوقها الملح بالكمية المرغوبة ( كما في الصورة )




نغمر الطنجرة بالماء ( متل الصورة ) و نضيف دبس البندورة بكمية مناسبة , و رشة بهار




نشعل تحت الطنجرة , و نغطيها , و عندما تغلي , نهدي النار و ننوصها عالأخير , و نتركها تغلي على النار الهادئة فقط ربع ساعة


و هي الطنجرة بعد الإستواء


( تقدم مع الرز المفلفل بالشعيرية )




في كام ملاحظة صغار

1. لازم نحط بالمرقة إما قطع بندورة , أو قطع بندورة و دبس بندورة , أو فقط دبس , و هالشي بيرجع لزوقك و خبرتك , بحيت تطلع طعمة البندورة و حموضتها مناسبة للكمية المطبوخة .

2. لازم تحطي فليفلة مع المرقة , يعني إذا ما حشيتي الفليفلة , جيبي قرن و قطعيه و حطيه بالطنجرة .

3. بهالأكلة , ما استعملنا البصل أبدآ , مع إني أنا من الناس اللي بيحبوا البصل و بيحبوا نكهته بالأكل و لكن في أكلات بدون البصل بتكون أطيب , و هالأكلة منهن

( أنا عم بحكي رأيي الشخصي , و بالنهاية , الأمر راجع لذوقك إذا بتحبي تحطي البصل , مع الحشوة )

بتمنى تكون أكلتي , نالت رضاكن

و تقبلوا وردي و ودي