طبعا كلنا عارفين اننا عايشين في عصر بتلعب فيه المحسوبية والواسطة دور كبير في حياتنا.. ومبقاش القانون بيطبق على الكل.. وبقى سهل قوي ان اللي بيخطيء يفلت من العقوبة لو له واسطة.. ومفيش حد فينا ممرش بتجربة اتظلم فيها أو ضاع حقه نتيجة لعدم تطبيق القانون على الجميع كما ينبغي…

يعني مثلا زميلك بيزوغ كل يوم من الشغل بدري وبياخد أجازات أكتر من رصيده .. وفي آخر الشهر بيقبض مرتبه ومكافآته كاملة .. وأجازاته بتتحسب يوم عمل عادي جدا والكل بيغمض عينه عنه لأن له واسطة و صلة بمسئول كبير في الشغل .. في حين إن حضرتك لما تروح عليك نومة مرة من كتر التعب ولا تتأخر في المواصلات وتروح الشغل متأخر.. يتخصم عليك تأخير آخر الشهر لأنك بتشتغل بمجهودك الشخصي وبس … بدون الاعتماد على أي وسايط..او مثلا شوفنا ف الكلية ان الاول عالدفعة لم يتم تعيينه لان ببساطة اخد مكانه ابن دكتور ولا ابن عميد ممكن يكون حتى كان شايل مواد قبل كده

أكيد طبعاً حتفضل طول الوقت تلعن الظلم والفساد وقلة الضمير اللي تخللي الناس تفلت من العقاب لمجرد ان ليهم واسطة.. وحتقعد تنتقد القواعد والقوانين اللي موجودة.. بس زيها زي قلتها وبتتطبق على الغلابة بس.. أما اللي له ضهر فمش ممكن ينضرب على بطنه..

طيب لو اتبدلت المواقع وبقيت انت المخطيء مش المظلوم.. تقبل يطبق عليك القانون وترضى بالعقاب …. ولا تاخدها على كرامتك وترفض الخضوع للقانون … وتحاول تشوف واسطة تشيل من عليك العقوبة؟!!

يعني مثلاً لما تروح تدفع مخالفات عربيتك.. وتتأكد بنفسك ان المخالفات دي انت عملتها فعلا .. تعترف بخطئك وترضى بالعقاب ولا ترفض انه يتطبق عليك القانون زي العامّة.. مع العلم انك تعرف واسطة تشيل لك المخالفات دي؟

طيب معلش سؤال تاني..
أساسا احنا ليه بنلتزم بالقواعد؟؟؟ … هل عن اقتناع داخلي والتزام شخصي؟؟؟…. ولا خوف من التعرض للعقاب؟؟؟

مستنية رأيكو.......

الموضوع منقول مع بعض التعديلات البسكوتية