كل سنة وانتم طيبين

رمضان على الابواب
اول حاجة فعلا ندعي ربنا ان ربنا يبلغنا رمضان وما يحرمنا منه لان فيه ناس كتير كانت موجودة رمضان اللي فات ومش موجودة السنه دي اتوفت الله يرحمهم جميعا
ربنا يبلغنا رمضان جميعا وما يحرمنا من فضله ولا من رحمته
تاني حاجة لازم نفكر ونسال نفسنا شوية اسئلة

انتو عارفين ان اللعيبة بتوع الكورة قبل الدوري لازم يعملوا معسكرات علشان رفع اللياقة البدنية معسكرات اعداد

وزمان التجار في أي حاجة بتخص رمضان زمانهم بيستعدوا للشهر ده
اللي سافر الصين يجيب فوانيس واللي بيشتري بضاعة بالجملة وبيخزن ومستنى الشهر ده

طيب اهل الايمان اللي عاوزين يكسبوا من شهر رمضان ؟
مش عاوزين مكسب مادي احنا عاوزين مكسب روحي ومكسب حسنات نحطها في حصالتنا عشان لما تتفتح يوم القيامة كل واحد يفرح بحسناته
لازم نفكر ونشغل نفسنا دلوقتي عشان منكونش زي التلميذ الفاشل اللي بدا مذاكرة ساعة الامتحان ما بدا

وعشان كده لازم نفكر نعمل ايه في رمضان وازاي نستعد للشهر ده

اولا من ناحية الاستعداد للشهر الكريم ده لابد كل واحد فينا يقف مع نفسه شوية ونراجع اعمالنا

اولا نعرف ان فيه عرض شرا
والشاري فيه هوا ربنا سبحانه
والبايع فيه هوا انا وانتا وكل مسلم
والحاجة اللي عليها البيع والشرا هيا نفسك ومالك
والتمن هوا الجنة اللي فيها مالا عين رات ولا اذن سمعت ولا خطر على قلب بشر
مهما شفت من جمال الجنة اجمل
ومهما سمعت من وصف عن شئ جميل الجنة اجمل
ومهما اتخيلت بتفكيرك من جمال برضه مش هتقدر توصل لجمال الجنة

مين مننا مستعد يبيع ؟
طبعا كلنا مستعدين نبيع لان اصلا النفس والمال دول مش ملكي دول ملك اللي خلقني
يبقا ربنا بيشترى اللي يملكه من العبد وكمان بيديله تمن عليه
الله اكبر
ايه الكرم ده
والتمن مش أي تمن دي الجنة

بس استنى ؟
اللي بيعرض سلعة عشان حد يشتريها لازم يزينها
هل انا وانت شايفين نفسنا تنفع ان ربنا يشتريها على ما احنا عليه
لازم نشوف زينة تزينها ومفيش احسن من زينة الايمان

رمضان جاي فرصة نزين نفسنا بزينة الايمان عشان يقبلنا ربنا ويشترينا
وعشان كده لازم نفكر في شئ مهم جدا
مش ممكن يكون رمضان ده اخر رمضان نكون موجودين فيه ؟
ممكن ولا لا ؟
تتصوروا ممكن
يا ما ناس اصغر مننا واجمل مننا واقوى مننا واغنى مننا وكانت صحتهم احسن من صحتنا وصحينا الصبح قالولنا فلان مات او فلانة ماتت
وفيهم كتير مش بحادثة ولا غيره سبحان الله

يبقا لازم نستغل رمضان ده احسن استغلال
وقدامنا شهر كامل
نعمل فيه معسكر الاعداد
ايه اللي بيحصل في رمضان من كتير مننا كل سنة ؟
نبدا الشهر عاوزين نصوم كويس ونصلى قيام ليل تراويح ونختم اكتر من مرة ونذكر ربنا في كل وقت ونغض بصرنا عن الحرام ومش عاوزين نتفرج على التليفزيون
ويعدي كام يوم تلاقي كل ده ينزل خالص
مش بنقدر نكمل عارفين ليه ؟
نقص لياقة بس مش لياقة بدنية لا لياقة روحية
طيب نعمل ايه
نبدا معسكر الاعداد
نرجع نفتح المصحف ونقرا أي عدد من الصفحات
بس نعمل حاجة
نقرا عدد قليل اول يوم ونحاول نثبت عليه وكل يوم نحاول يا اما نقرا نفس العدد او نزود حاجة بسيطة بس مننزلش عن العدد اللي بدات بيه وكل ما نطلع درجة نثبت عليها
تاني حاجة نقلل من التليفزيون او أي شئ بيشغلنا نقلل شوية بشوية عشان لما ييجي رمضان نكون استعدينا
تالت حاجة نحاول اننا نذكر ربنا عدد معين ونبدا باذكار ما بعد الصلاة وكلنا عارفينها وبعد كده لما نثبت عليها نزود تاني ومننزلش
رابع حاجة نصوم ولو يوم في الاسبوع في شهر شعبان
وممكن نزود بالتدريج يعني ممكن ناخد اتنين وخميس عشان نتعود على الصيام وزي مانتم عارفين ان صيام يوم واحد تطوع ربنا يبعدنا بيه عن النار سبعين سنة
طيب والبنات اللي ممكن يحصل لها توقف اكيد بترجع تبدا من جديد ؟
بسيطة
مش هتعرف تقرا ممكن تسمع نفس المقدار
وذكر الله مالوش حاجة تمنعه تبقا مفيش مشكلة
اللي عاوز اقوله عشان منتعبش في رمضان ونعرف نستفيد منه

اتظروا بعض الاقتراحات التانيه للأستعداد لرمضان

يارب تكونوا استفدتم وحسيتم انه قرب واننا لازم نتغير