يا ترى فاكرين صاحبنا المثقف اللي اترزع علقه سخنه من المعلم؟

لو مش فاكرينه يبقى تابعوا القصه دي وانا هبقى اجيب لكم الجزء الاول من القصه



المثقف داخل القهوه مكسر ومدشدش من العلقه الاخيره

المثقف بابتسامه واسعه:السلام عليكم يا اخوانا.

رواد المقهى:وعليكم السلام ورحمه الله وبركاته.

عم فتحي يهب من على المقعد:اهلا وسهلا يا استاذ غيبتك طالت علينا_ينظر للمعلم نظره جانبيه_ربنا ينتقم من اللي كان السبب.

المثقف وهو يجلس:زي بعضه يا عم فتحي المسامح كريم.

المعلم بصياح:انت بتقول حاجه يا جدع انت.

المثقف مرتعدا:لا ابدا يا معلم انا بس بسلم على الناس اللي موجودين.

المعلم:طيب خد بالك من نفسك احسن الهوا يطسك.

المثقف ينكمش في مكانه.

عم فتحي:معلش يا استاذ حقك علينا,بالمناسبه يا ترى ايه اللي بيحصل في العالم دلوقتي؟

المثقف:بصراحه يا اخوانـــ.......!

المعلم مقاطعا:بقى شوف يا واد انت كلمه تانيه بالنحوي ومش هيكون فيها مستشفى المره دي,هتطلع على القرافه عدل.

عم فتحي:صبرك بالله يا معلم,هو الراجل لسه قال حاجه؟

المعلم:انا بس بنبهه احسن يغلط وانت عارف الغلطه بفوره.

عم فتحي:اتكلم يا استاذ بس بلاش نحوي وحياه ابوك احسن الراجل ده شراني وانا عارف كويس.

المثقف:طيب انا هتكلم النهارده عن مخيم نهر البارد والمشاكل اللي بتحصل فيه.

المعلم:نهر البارد دي شكها كده بالنحوي.

المثقف مذعورا:لاا والله نهر البارد دي حته في لبنان,والله العظيم مش بالنحوي ولا حاجه.

عم فتحي بضيق:متسيب الراجل يتكلم براحته يا معلم,وانت يا استاذ اقعد ومتخافش مش هيعملك حاجه,واد يا سنقر هات واحد شاي على حسابي للاستاذ.

سنقر:وعندك واحد شاي وصايه على ميه بيضه للاستاذ المثقف على حساب عم فتحي وصلحه.

عم فتحي:كمل يا استاذ.

المثقف:انا هتكلم عن اللي بيحصل في نهر البارد في لبنان.

المعلم:وهو ايه يا اخويا اللي بيحصل في نهر البارد دي؟

المثقف:الحكايه يا معلم ان موجود هناك مخيمات للاجئين الفلسطينين في المنطقه دي.

عم فتحي:ودي فين الحته دي في لبنان,انا سافرت لبنان كتيير اوي وعمري ما سمعت عن الحته دي.

المعلم في سره:بقى انت سافرت لبنان كتيير يا معفن ده انت ابعد حته رحتها حمام بيتكوا.

المثقف:دي حته صغيره كده كده في شمال لبنان.

عم فتحي:كمل يا استاذ.

المثقف:المهم ان في المخيم ده قامت جماعه اسمها فتح الاسلام وكانوا بيقولوا انهم جماعه اسلاميه وبداوا يحاربوا الحكومه والجيش اللبناني.

سنقر: والجماعه دي تبع مين بقى يا استاذ.

المعلم:الله الله بقى سيادتك سايب الزباين يتنططوا وقاعد تتساير معانا هنا.

سنقر:لا ابدا يا معلم انا كنت معدي بالصدفه.

يجري سنقر مبتعدا وينصرف الى تاديه عمله

عم فتحي:لا فعلا يا استاذ الجماعه دول تبع مين؟

المثقف:محدش يعرف هما تبع مين بالتحديد بس في ناس بيقولوا انهم تبع تنظيم القاعده بس الحكومه اللبنانيه بتقول انهم تبع المخابرات السوريه وهما عايزين يدمروا الاستقرار في لبنان.

رجل يجلس على طاوله اخرى وقد لفت الموضوع انتباهه:بس الحكومه السوريه بتتبع النظام العلماني يبقى ازاي الناس دول بيتعاملوا زي المنظمات الاسلاميه وبيفجروا نفسهم.

المثقف بفرح:بس الله ما شاء الله يا استاذ واضح انك متابع.

الرجل بخجل:لا ابدا بس بقرا الجرايد كل يوم,وانا اسمي مصطفى.

المثقف:اهلا وسهلا بيك يا مصطفى,بالنسبه لسؤالك فالحكومه اللبنانيه بتقول ان القيادات بتاعت الجماعه بس هي اللي تبع سوريا وبقيت الناس اللي بيحاربوا دول مخدوعين باسم الاسلام وبيقولوا ان الدليل على كده ان في ناس من السعوديه جت علشان تحارب مع جماعه فتح الاسلام وبعد كده مشوا لما لقوا ان قيادات الجماعه بيدوروا على اهداف سياسيه محليه.

مصطفى:بس ازاي الناس اللي بيحاربوا دول فلسطينين ويكون ليهم علاقه بسوريا.

المثقف:لا ابدا هما مش فلسطينين هما قوات متتعده الجنسيات اكترهم سوري وفيم فلسطينين ولبنانيين وعرب.

عم فتحي:طيب والحرب اللي بينهم دي يقالها قد ايه؟

المثقف:دي بقالها كتير اوي داخله على الاربع شهور دلوقتي.

المعلم:طيب والحرب دي هتخلص امتى؟

المثقف:الحرب دي خلصت خلاص امبارح والجيش اللبناني كسب المعركه والحرب كلها ومعدش في حاجه اسمها فتح الاسلام خلاص.

عم فتحي:والله احسن,انا مش عارف ايه العالم اللي اهم حاجه عندها انها تضرب استقرار البلاد اللي زي لبنان دول.

المعلم:اهم غاروا في داهيه.

عم فتحي:انت معودنا كل مره انك تتوقع حاجه هتحصل في العالم.

المثقف:اتوقع حدوث خلافات حاده على المدى القريب بين الرئيس التركي الجديد عبدالله غول وبين التيار العلماني المتشدد في تركيا.

المعلم:بس قفشتك,الجمله الاخيره دي كانت بالنحوي,امسكه يا سنقر.

المثقف وهو يجري خارجا من المقهى:يا راجل حرام عليك قرفتني في عيشتي,انا مش هاجي هنا تاني.

المعلم:لا هتيجي وهنشوف.


تمت الحلقه الثانيه وجاري اعداد الحلقه الثالثه.