بسم الله الذى لا يضر مع اسمه شىء فى الارض و لا فى السماء
اخوانى و اخواتى الكرام ..... ازيكوا..... يا رب تكونوا كويسين .... و مصحصحين ..... و يا ريت اللى يقرا الموضوع يقول رأيه ..... عاجبه ولا لأ ..... بلاش حكاية بص و طل دى ... المهم خلينا فى موضوعنا اللى لسة ما بدأنهوش ...

الموضوع بيتكلم عن العلاقة بين التدين و النبوغ العلمى

للاسف الشديد لو جينا نبص على معظم المتدينين دلوقتى نلاقيهم علماء ..... بس فى امور الدين ..... وتلاقى معظمهم متعصبين و ليسوا محافظين زى ما بيقولوا .... خلوا بالكم من اللى باقوله ...بقول معظمهم .....

زى ما قلت معظمهم علماء فى امور الدين ...... لكن لو جيت تسأل واحد عنهم انت تعرف ايه عن تركيب مخ الانسان مثلا ..... تعرف ايه عن الميكانيكا ..... تعرف ايه عن المنطق ........ تلاقيه حتى ما يعرفش يرد الرد بتاع مرسى الزناتى فى مسرحية مدرسة المشاغبين ....... ايه السبب ؟؟؟؟؟ الله اعلم

لما نيجى نقلب على الوش التانى و نتكلم عن العلماء العظماء بتوع اليومين دول (بتكلم عن المسلمين ) نلاقي معظمهم نبغات ..... عقولهم ذرية ..... ماتلاقيش منها اتنين ..... انما دا فى مجال تخصصه ...فى المجال العلمى الدنيوى فقط ..... انما تيجى تبص على الجانب الدينى ليهم .... تنحسر .....
ايه دا يا عم الحاج دا بيصلى الجمعة بالعافية .... لو جيت تسأله تعمل ايه لو غلط فى عدد الركعات اللى بتصليها يقولك الله و رسوله اعلم .

هو دا الحال فى زماننا دا ..... دنيوى بدون دين ..... او دينى بدون دنيا .......

لكن يا جماعة دا ربنا ما امرناش بكدا .... دا ربنا قال فى كتابه الكريم انا يخشى الله من عباده العلماء معنى كدا ان اكتر ناس بتبقى قريبة من ربنا هم العلماء ...... بيتفكروا فى خلق الله ..... بيزدادوا ايمان كل ما يكتشفوا شىء جديد باذن الله .... هو لو ربنا ما ساعدهمش كان اى واحد منهم هايفقه شىء...... لكن للاسف ما حدش بيفكر من وجهة النظر دى ....الكل همه انه يبقى مشهور .... الكل همه انه يكسب كتيير .....مش مشكله ازاى المهم انه يكسب ...و بسرعه ...... حتى لو بالسرقة ......طبعا ..... ماهو لازم .... الشخص اللى يكون بعيد عن ربنا يقدر يعمل اى حاجة تغضبه ..... ماهو و العياذ بالله ناسيه ..... لكن رب العزة مش ناسيه ..... و بيمهله و يديه و يزيده .... لعل يرجع لصوابه لكنللاسف بيزيد ويتمادى
دا بقى يبقى حسابه كبييير اوى اوى عند ربنا ....... و هايشوف .

نرجع بقى لعم الشيخ المتدين المؤمن التقى القريب من ربنا اللى عارف فرضه و بيصلى الوقت بوقته ...... علامة فى امورالدين .... لا يفقه شىء فى امور الدنيا ...... شخص زى دا لما مثلا يسافر بلد زى انجلترا او امريكا .... اكيد هايختلط بالناس .... و نظامه و عاداته و تدينه هايلفت النظر ليه .... مين الجدع دا ... دا عم الشيخ كذا ...... دا مسلم .... الله ... دا باين عليه راجل كويس ..... بدأ الناس يتعرفوا عليه ييجى واحد منهم يسألوا فى اى شىء دنيوى زى اللى ذكرتها فوق ما يقدرش يرد عليه ..... فى رأيكم انتوا ايه الانطباع اللى هايتاخد عليه ؟؟؟؟؟ ....... اكيد زى ما معظم الغرب مصدق و شايف هايقولوا انه .... مسلم جاهل .... بينى و بينكم الكلمة دى اكره شىء على قلبى ..... و باسمعها كتير على التليفزيون و بنقراها كتير على النت بس للاسف فى الحالة المذكورة فوق يبقى عندهم حق ..... ما هو الدليل ادامهم ..... و آديك يا عم الشيخ نشرت ....بس نشرت انطباع سىء جدا عن الاسلام و المسلمين .... بالتاكيد بدون قصد ....

يا ترى ايه رأيكم ..... من الناحية دى بايظة و من الناحية التانية خربانة ....... بس خلينى اقولوكوا حاجة بسيطة كانت بتحصل زمان ايام الخلفاء ..... كان الخليفة يقوم بتكليف العلماء و الشعراء بتعليم ابناءه مقابل شىء معين ..... سيبونا من المقابل .... و خلونا فى اللى كانوا بيتعلموه ..... كانوا بيتعلموا الادب العربى (اللى معظم الطلبة بتتريق عليه ) اشعار فحول الشعراء (اللهم صلى على النبى على الفحول بتوع اليومين دول .... بحبك يا حمار... ) الفلسفة و المنطق (اللى الكل بيتريق عليها .... افلاطون مين و بتاع مين .....) الطب (ايه القرف دا ) الهندسة (يا عم انا فاضى ) الفقه و علوم السنه (يا عم الحاج انا مش فى الازهر ) حفظ القرآن ....... كانوا بيتعلموا دا كله على بعضه .... من سن 8 سنوات لحد سن 19 او عشرين سنه ..... بعد كدا يبقى ناضج و عاقل و يقدر يتحمل المسئولية ...... هم فين دلوقتى من الثانوية العامة ..... العلمى و الادبى .... العلمى علوم و العلمى رياضة ..... اللى يختار فلسفة و منطق و لاتاريخ ............ يا حلاوة ...... ايه الدلع دا يا اخى بالا خيبة بتضحك على ايه ......

سيدنا و سيد الخلق اجمعين حثنا على التفكر فى علوم الدنيا و دمجها مع علوم الدين .... بس للاسف مش عارف الاحاديث .....

ماعلش ... طولت عليكوا ..... كان فيه حاجة بس احب اقولها او بمعنى اصح اوضحها ....... زى ما فيه ناس مش ولا بد فيه برضه ناس كويسة و عارفة ربنا و متفكرة فى امور الدنيا و الدين ..... امثال لشيخ محمد حسان و اخوانه من الشيوخ العقلاء ..... العلماء بحق .... ما تخافوش .... لسة الدنيا بخير

اخيرا احب اضيف حديث لسيدنا محمد (ص) بيقول فيه عن اول 3 اشخاص هايدخلوا النار فيما معناه
ان اول من يدخل النار عالم و فقيه و شهيد ...... العالم لانه تفاخر بعلمه .... و الفقيه لانه تفاخر بفقهه امام الناس .... و الشهيد لانه ذهب و حارب لكى يستشهد و يقول عنه الناس انه شهيد

اشكر كل من قرأ الموضوع (من اوله لآخره ) والناس التانية.............................. اشكرهم برضه