مباحث الأحوال المدنية يا حضرات بوزارة الداخلية .. كشفت عن واقعة تزوير من 51 سنة ... يعني من عمر بابا حد فينا ....

ست عجوزة فلسطينية سابت جوزها المصري بين قوسين الثري وكانت حامل وقتها .. بعد بقى ما ولدت بسلامته .. حبت

تكيد لعمو .. إللي هوه جوزها فنسبت الواد بسلامته لأبوها ... يعني الواد بقى أخوها وجده بقى أبوه

إستقروا سيادتهم في الأردن من الـ 50 سنة دي.. بس شوف بقى حكمة ربنا يا مسلم .... شوف حكمة ربنا يا مسلم ..

أبوه الحقيقي مات ... بين قوسين توفى أبوه ده إيـــــــــــــه؟ أبوه الحقيقي إللي قولنا ساعتها بين قوسين الثري
قامت أخته قالتله إني مش أختك .. أنا أمك ........ وأبوك مش أبوك ده يبقى جدك ..

يعني إنت مش أخويا .. إنت إبني .. من الآخر يا وااااد .. أبوك الحقيقي .. بالسلامة يا قلبي..

محتاجين من سياستك ترجع مصر علشان تدورلنا على حيلة نقدر ناخد فيها حقنا في الميراث

رجع الواد لمصلحة الأحوال المدنية علشان يسقط القيد .. ويقفش شهادة ميلاد منسوبة لأبوه المصري الحقيقي بين قوسين برده الثري
وأثبتلهم في الأوراق المزورة إن مرات أبوه تبقى هيه هيه أمه

قام عم اللوا جمال باشا دحروج مدير مباحث الأحوال المدنية شك وإرتاب .. وقال في باله زي كده ( إه يا لهوي )

وعملولهم شوية تحريات كده .. عرفوا فيها الحقيقة .. وكمان بعد مواجهة الواد وأخته .. قصدي الواد وأمه .. يووووه الواد ومرات أبوه ..

بعد مواجهة المتهم والمتهمة كده أحسن !! تولت المباحث إجراءاتها ...


مراسلكم من سرادق عزاء بين قوسين الثري المصري
أسامة أحمد
نجع العيلة .. قطاع الأخبار