"يا ايها الذين امنوا كتب عليكم الصيام كما كتب علي الذين من قبلكم لعلكم تتقون" صدق الله العظيم








.(السلام عليكم)






في هذا الجدول اليومي لرمضان نحاول قدر الاستطاعة ان نخطو علي خطي الحبيب (صلي الله عليه وسلم) والهدف منه ان نكون في صحبه (صلي الله عليه وسلم) في الجنة إن شاء الله .

--------------------------------------------------------

1- انت والصلاة :

يقول رسول الله(صلي الله عليه وسلم) :

" من غدا الي المسجد او راح اعد الله له نزلا في الجنة كلما غدا او راح "

انا عارف اننا كلنا بنصلي الحمد لله لكن بما اننا في رمضان لازم نصلي الصلاه علي وقتها ....... يعني ايه ؟؟؟؟؟

يعني اول ما الاذان يقول الله اكبر ...... لازم ابقي في المسجد علي طول .

اما بقي السيدات فتجري علي السجادة وتحاول تصلي في جماعة ( مع امي مع بنتي مع جارتي ....) .



في العادي ان الحسنة بعشرة امثالها ... وبما اننا في رمضان بيتضاعفو سبعين حسنة ......

كدة ممكن نعمل معادلة بسيطة جدا:


* الفرض في رمضان بيساوي :

10(الحسنة بعشرة امثالها) x 70 ( ثواب رمضان ) 27 x
( ثواب الجماعة ) = 20,000 حسنة للصلاة الواحدة الفريضة ...... يبقي 20,000 حسنة x5 (صلوات) = 100,000 حسنة .

100,000 حسنة x30 يوم = 3 مليوووووووووون حسنة !!


يا خبر كل دول علي الفرائض بس!!!!!!! يارب يا كريم .


--------------------------------------------------------








2- انت والتراويح :

يقول رسول الله (صلي الله عليه وسلم) :

"من قام رمضان ايمانا واحتسابا غفر له ما تقدم من ذنب "

تخيل تخيل القران وانت واقف !!!!! ده طبعا لما نصلي في المسجد التراويح وطبعا السيدات والبنات داخلين في الموضوع ده ..... الحقيقة يا جماعة المسجد بيكون حميل جدا في رمــضــان .

--------------------------------------------------------

3-انت وصلة الرحم :

يقول رسول الله (صلي الله عليه وسلم) :



" ليس الواصل بالمكافئ ولكن الواصل اذا قطعت رحمة وصلها "


يعني احاول اكلم عائلتي كلها وابدأ بمن انا علي خلاف معهم .
علشان اكون ممن يصلون رحمهم وادخل ضمن الحديث ده .

يقول الرسول (صلي الله عليه وسلم) :



"لا تتنزل الرحمة علي بيت به قاطع رحم " !!!!!






--------------------------------------------------------

4 – انت والدعاء :

يقول رسول الله (صلي الله عليه وسلم) :



" للصائم عند فطره دعوة لا ترد "

احوال اركز علي كذا دعوة معينين .... وادعي بهم طول رمضان وعلي فكرة الصحابة كانوا بيعملو كدة .. فا اللي بيحصل معاهم كان انه لا يأتي رمضان الذي يليه الا و الدعوات كلها بإذن الله مستجابة !!!! وناس كتير جدا في هذه الايام جربوها و كانت النتائج مبهرة . ادعي لنفسك واسرتك واصحابك ومتنساش تدعي للمسلمين في العراق و فلسطين . افضل وقت للدعوات بعد الافطار ولو خمس دقائق وطبعا بين الاذان والاقامة وعند السجود .

السنن في رمضان : طبعا المفروض في رمضان علي اد ما نقدر نصلي السنن ..... نحاول نجبها كلها اذا امكن .
وهما سهلين اوي ومش كتير يعني :
السنن المؤكدة هي :

*ركعتين قبل الصبح .
* 4 ركعات قبل الظهر و2 بعده ( او العكس ) .
* ركعتين بعد المغرب .
* ركعتين بعد العشاء .

شوفتوا اهي سهلة اهي .... طب في حاجة بأه ممكن تسهلها علينا اكتر .........
لو صلينا السنن ان شاء الله كلها خلال 30 يوم ربنا يكتبلنا حوالي 30 مليووووون حسنة !!!!........رقم كبير فعلا !!!!! ومننساش حاجة مهمة ان الله يضاعف لمن يشاء .
عارفين كمان ممكن كل يوم يتبنيلك بيت في الجنة !!!

يقول رسول الله (صلي الله عليه وسلم ) :



"من صلي اثنين عشر ركعة غير فريضةبني له قصر في الجنة"

--------------------------------------------------------





5- انت والقران :

يقول رسول الله (صلي الله عليه وسلم ) :



"من قرأ حرف من كتاب الله فله به حسنة لا اقول الم حرف ولكن ألف حرف ولام حرف وميم حرف"





يعني ايه ...... يعني الحرف الواحد بحسنة !! اه طبعا الحسنة بعشر امثالها و السبعين ضعف في رمضان ( ومننساش ان الله يضاعف لمن يشاء تاني ) .....
يعني "بسم الله الرحمن الرحيم" بـ13,300 حسنة !!!!!
يا رب يا كريم .


ملحوظة : الجزء فيه تقريبا 7,000 حرفا يعني تقريبا 148,000,000 حسنة .

طب ايه رأيكو نقرأ القران كلة ولو مرة واحدة ... ويا سلام لو نويت قرأته مرتين .

--------------------------------------------------------

6- انت والصدقة :

* عن ابن عباس رضي الله عنه كان رسول الله (صلي الله عليه وسلم ) اجود الناس مايكون في رمضان - حين يأتيه جبريل فيدارسه القران – وكان يأتيه كل ليلة فلرسول الله اجود بالخير من الريح المرسلة "


الحقيقة يا جماعة الصدقة تطفئ غضب الرب فنحاول نركن فلوس علي جنب للصدقة بس ... ولو 50 جنيه وافكهم جنيهات ...و ادي اللي يسأل اللي مبيسألش . ادور علي الاقارب الفقراء في العائلة واديهم فلوس وهدوم و احسسهم انهم مش اقل مننا ....... اشارك في الجمعيات اللي بقت كتيرة اوي في البلد .

--------------------------------------------------------

** نصائح غالية :

* ياريت كل امهاتنا يحاولوا انهم يقللو الوقفة في المطبخ شوية علشان يلاقو وقت وميشعروش بتعب للصلاه او القران مش لازم كل يوم 10 اصناف ممكن نقلل منهم 3 او 4 اصناف .

وياريت نحاول نساعدهم علي قد ما نقدر وناخد نية افطار صائم .

* الطلبة اللي بيذكروا لازم نحاول نعمل توازن بين المذاكرة والعبادات لان ربنا ميرضاش ان احنا نترك مذاكرتنا و التزمتنا ناحية المدرسة او الجامعة ونكون مسلمين ضعفاء .
يعني اروح التراويح واذاكر كويس واقرأ القران في الطريق الي الجامعة مثلا .

* ومننساش طبعا الغيبة والنميمة ... ومتنسوش انكو صايئمين ......حتي بعد الفطار!!! .... اصل عينك صايمة وودنك صايمة وكلك صائم عن ما يغضب الله في رمضان .

--------------------------------------------------------

ويقول الله تبارك وتعالي :


"وما تقدموا لانفسكم من خير تجدوه عند الله هو خيرا واعظم اجرا "صدق الله العظيم


.................................................. .

اللهم من اعتز بك فلن يذل
ومن اهتدي بك فلن يضل
ومن استكثر بك فلم يقل
ومن استقوي بك فلن يضعف
ومن استغني بك فلن يفتقر
ومن استنصر بك فلن يخذل
ومن استعان بك فلن يغلب
ومن تركل عليك فلن يخيب
ومن جعلك ملاذه فلن يضيع
ومن اعتصم بك فقد هدي الي صراط مستقيم
اللهم فكن لنا وليا ونصيرا
وكن لنا معينا ومجيرا
انك كنت بنا بصيرا


يا الله




مع تحياتي .....