ساعات ببقى فرحانه أوى و فعز فرحتى بكون زعلانه أوى أوى


ساعات بحس إنى نكرة لإنى حاسه إن مليش لازمه فالدنيـــا


ساعات بقعد و أقول طب أنا إتخلقت ليه؟؟؟!!.. إيه الهدف ..؟؟ أنا هنا ليه عالكوكب ده..؟


ساعات بكون متفوقه و أحس إنى أكتر إنسانه فاشله فالعالم :to2to2:


ساعات بحس إنى قويه جدا و ممكن أعمل أى حاجة... و مع أول حاجة ببقى ولا حاجة


ساعات لما بفكر فالحب و عذابه بتصعب عليا نفسى و مش لاقية نهاية سعيدة زى ماعودتنا الأفلام


ساعات بتصعب عليا نفسى خصوصا لما أحس إن أقرب الناس ليا مش حاسس بيا


ساعات بحس إن الساعات زى السيوف فإيد الحداد كل مايسنها و يحميها تقطع فيا و تزيد الآهات


ساعات ببقى عايزه أعمل حاجة صح و فعز إستعدادى لعمل الصح بعمل الغلط..!!


ساعات كتير بتألم و بكون مجروحه و مع ذلك بكون ساكته و كأن السكون هايخفف الألم مع إنه بيزوده


ساعات بفكر و بتصور إزاى ممكن أبنى مستقبلى بنفسى من غير مساعدة من حد و مع أول عقبة
بقف و أسيب القلم و الورقة و أمشى


ساعات بكون بسمع أغنية و فجأة ألاقينى عايزه أسمع قرآن و بعدها بعشر دقائق
أغنية...قرآن...أغنية
زى مايكون جوايا إتنين و كل واحد بيشغل الحاجة اللى تعجبه و انا ماليش قرار..!!


ساعات بشوف الغلط(أقصد الغلط الإدارى و السلوكى) و أبقى محروقه من جوايا إزاى مش قادره أغير الوضع ده
و أكتشف إنى برتكب نفس الغلط بصورة أو بأخرى


ساعات بحس إن مصر دى هى السبب فالخنقة اللى أنا فيها بس برجع و أسأل نفسى(مش أنا مصريه برضو؟؟)


ساعات ممكن تحس إنى إنسانه كئيبه عشان بكتب الكلام ده لكن صدقنى أنا عادى بضحك و بستغرب و بسأل و بحاور
و بعيش لكن الساعات هى صراع بيدور جوايا بالساعات