هنا اخوانى واخواتى :]

ايه هو انا هخطب

هنا لأى حد عايز يتعلم انه يكتب قصه

لو حد حابب الكتابه ..وحابب انه يمسك قلم

يمسك وما يخافش

لاننا هنساعده وهنزرع الثقه جواه

انا اول قصه كتبتها كانت اسمها خنتوش فى بنتوش حاجه كدا

والناس شتمتنى عليها

بس الكلام دا مش هيحصل هنا

هنا هيكون فى الاساس اللى تبدا بيه عشان تكتب قصتك

ونصايح


ومقومات القصه

نبدأ بقااااااااااااااااااااااا ااااااااااااااااااااااااا اااا
(هيفضل الموضوع مفتوح لاى استفسارات)
(واى مساعده)



اولا القصه القصيره..........هى عمل ادبى يصور جانب من جوانب الحياه...او عده جوانب
يعنى جانب موقف معين ,,,,,,,,,او عده مواقف...تكتب القصه من اجل الوصول الى الفكره
يعنى الاحداث اللى بتحصل فى القصه دى وسيله للغايه الغايه هى الفكره
لو فى احداث فى القصه يعنى مواقف كتير من غير ما يكون فيها فكره يبقا انت بتضيع وقتك على الفاضى
ووقتى انا كمان :]

طيب.....ايه الافكار اللى ممكن تتبنى عليها القصه
اولا .....فكره زى الحريه يعنى انت عايز تكتب قصه عن الحريه
ممكن تكتب عن عصفروه طايره فى السماء اصطادها صياد حطاها فى قفص وتوصفلى حاله العصفوره النفسيه
وحاله الصياد النفسيه اللى اصطادها.......وبنفس الاحداث دى ممكن تكون فكرتك عن الديكتاتوريه (الصياد)

طيب ممكن تكتب عن الادمان وتوصف حاله المدمن(وانا عملت الحوار دا فى قصه مدمن)

طيب فى افكار كتير جدا.......امتى تكون فكرتك جامده جدا؟؟؟؟؟؟؟

لما بتكون مش مستهلكه
(الافكار اللى انا كاتبها افكرا قصصى)
يعنى ايه مش مستهلكه؟؟؟؟

يعنى ما تمش التعرض ليها من قبل
يعنى من ابداعك الخاص زى مثلا فكره جديده انك بتتكلم عن تعدد الشخصيات داخل الشخصيه الواحده

وترمز ليها بالوان يعنى البطل جواه اكتر من لون كل لون بيمثل جانب شخصيه جواه الشيخ والعاش والصايع والمدمن والفيلسوف و.......و.......و الخ

كدا ما تبقاش فكرتك مستهلكه

يعنى مش ينفع تكتب فكره مستهلكه؟؟؟؟

لا ينفع طبعا

بس ساعتها انت لازم تجدد الفكره دى
اذاى؟
يعنى تعرض الفكره المستهلكه(اللى تم التعرض للفكره من قبل ...يعنى اتعملت قبل كدا) باحداث جديده مش اتعملت
يعنى احداث مبتكره رغم الفكره المستهلكه هتكون انت جددت القصه بتاعتك واصبحت فكره مستهلكه تم تجديدها

طيب نرووووووووووح لمقومات القصه
يعنى ايه مقومات قصه

يعنى اذاى اعرف ان اللى قدامى قصه
الهيكل بتاعها (القصه لازم يكون ليها هيكل وجسم خارجى)

مقومات القصه

الموضوع........بتحكى عن ايه..(بعيدا عن الفكره) يعنى القصه دى بتحكى عن التاريخ عن تجربه خاصه عن تجربه تانس تانيه

الفكره.....يعنى انت عايز توصل لايه من كلامك دا كله...الاحداث اللى فى القصه بتوصل لايه؟ ...ولازم تبعد عن انك تحكى مباشره.......يعنى انت مش بتكتب مقال عشان تقلى انقذوا اطفال الشوارع...لا مش بتكون صريحه كدا ...انت تكتب واللى قدامك يفهم الفكره بطريقته....وانت ممكن تكتب عن فكره وغيرك يفهمها بطريقه تانيه..ودا اسمه النوع الفلسفى فى القصه القصيره.............زى الفن التشكيلى كل واحد بيفهم بعينه...والرسام كاتبها بعين تانيه

الحدث......اللى هى بتوصلك للفكره....الاحداث اللى فى القصه...ولازم يكون فيها عنصر التشويق والاثاره..عشان تشد اللى قدامك عشان يقرا......وكمان ممكن تضيف عنصر الغموض...بشرط انك تفهمنى فى الاخر...الغموض اللى كان فى البدايه

الحبكه.....يعنى يكون فى القصه عقده..الاحداث بتتشابك وبتتلخبط وبطلخبطى معاك...والدنيا تتقفل خالص...وبعدين تتفك

لازم يكون فى بيئه زمانيه ومكانيه...يعنى توضحلى احدث القصه دى على الارض فى السمه فى الغروب الصبح...وممكن يكون الزمن مفتوووووووووح...يعنى تقول فى وقت ما....او فى مكان ما,..,,بس تقول :]

الشخصيات...لازم يكون فى ابطال فى القصه...ياما بطل رئيسى...او بطل فرعى........
البطل الرئيسى هو اللى انت بانى عليه قصتك
الابطال الفرعين...مساعدين للبطل...عشان توصل لجانب من جوانب شخصيه البطل...او لجانب من الاحداث فى القصه

الاسلوب واللغه...لازم يكون فى القصه سرد......يعنى وصف للمشهد.......ودا بيبدأ لما تكون لسه جديد فى القصص بطريقه الراوى غالبا......يعنى مثلا .......انا اسير فى الطرقات ارى اشجار على جانب الطريق وعصافير تحلق فى السماء...الخ
او لما مش بتكون بضمير الراوى........يسير هو فى الطرقات التى يزينها اشجار على جانبه..وعصافير تحلق فى السماء..الخ

الحوار....يعنى الكلام اللى بيحصل بين الابطال.......زى ..يقول احمد وعلى وجه علامات استفهام تلتهمه"ماذا تقول؟؟؟؟
ولازم فى الحوار توصف ملامح البطل.....يعنى بيقول الكلمه اذاى ..انفعاله كان ايه؟؟.........احساسه..متعجب ..زعلان..سعيد

النهايه
ياما نهايه مغلقه.............بتجبلى الحل ...وانا قاعد فى مكانى
ياما نهايه مفتوحه..........تسبنى انا ادور على الحل.......بس لازم تكون راميلى ادوات فى الاحداث...راميلى طرف خيط عشان اوصل للحل لوحدى

احنا كدا خلصنا المقومات بس
اهم حاجه البدايه انت لازم تبدأ بمقدمه
يعنى ايه مقدمه
يعنى وصف للمشهد
الكاتب بيعيش الموقف...وبيتخيل للاحداث كانه شايف فيلم قدامه
هو احد ابطاله ...ان لم يكن كل ابطاله
عشان تعيشنى فى الجوا بتاعك دا
لازم توصفلى المشهد فى الاول(المقدمه)
مثلا...........يتحرك هو بهستيريه امام غرفه العمليات فى احد المستشفيات الضخمه يردد بكلمات"ولد.. بنت :]
دى مقدمه...وصفتلى انه فى مستشفى مستنى ابنه جوا...عيشتنى الحاله...التوتر ..الجو...ويبقا الواحد مبدع اوى لما يوصف الجو كله ......ممرضات تتجول فى المكان بعجله........مثلا يعنى

وفى نقطه كمان..........ما تخليش الوصف يغلب عن الفكره.
يعنى مش تقعد توصف لحد ما تخلينى امل....لازم توزن بين الفكره والوصف

وفى حاجه اسمها ايقاع القصه
ايقاع القصه...........هو السرعه والبطىء

حته سريعه.......مثلا...يتحرك بسرعه امام السيرات الصاروخيه....يجرى من امام سياره
ويجرى من امام اخرى...يلتفت يمينا ويسارا
سياره سريعه امامه
تبرق عينه برعب
و انقضى الامر



حته بطيئه...يسير هو فى طريق تمر به سيارت فخمه يقودها اناس يبدوا عليهم الثراء الفاحش
يجرى من امام السيارات السريعه وهو شارد العقل يتذكر امور شتى
نسى ان يلتفت يمينا او يسارا
ليسمع صوت سياره قادمه من خلفه
لتعلن له ان امره قد انقضى

فى حاجه بتساعد على بطىء الايقاع ..زى ثم...او الوصف الممل
وفى حاجه بتساعد على السرعه....ف ..فجرى فرأى سياره........او الوصف السريع

دلوقتى انا خلصت...او تعبت جدا.................لو اى استفسارات انا موجوووووووووووووود
اى حد بيفكر انه يكتب
او بيفكر انه يفكر انه يكتب
هيلاقينى هنااااااااااااااااااااااا ااااااااااااااااااا
مستنى تواجدكم

اللى عايز يتعلم الكتابه القصه انا هنااااااااااااااااااااااا ا