السلام عليكم ورحمة الله وبركاته

كتير اوى بسمع الجملة دى
والنبي يا جماعه
اتكلموا ولو مرة واحدة عن إتيكيت تناول الطعام في العزومات....
لأني لما باتعزم عند حد باتكسف آكل!!!
وبصراحة بقوم وأنا جعانة
لأني باخاف إني آكل بطريقة غلط
والناس تضحك عليا!!!

طبعا إنتم عارفين إن مشكلة زي دي
ممكن إن أي حد يقع فيها
علشان كده إحنا عملنا عددنا النهار ده
عن إتيكيت تناول الطعام والمشروبات في العزومات

يلا نعرف مع بعض إزاي ناكل


الشوربة



لشوربة لها طريقتين للتقديم؛ إما أنها تتقدم من خلال فنجان صغير مخصص للشوربة، وفي الحالة دي مش هتلاقي مشكلة نهائي لأنك هتشربيها على طول من الفنجان مباشرة...

أو أنها تتقدم في أطباق الشوربة، وبكده هتستخدمي المعلقة، بس عايزاكي تاخدي بالك إنك ما تعمليش صوت وإنت بتشربي بالمعلقة، كمان ما تحاوليش تخلي المعلقة تحتك مباشرة بالطبق وتعمل صوت نتيجة الاحتكاك ده.

ومن الإتيكيت إنك تسيبي شوية شوربة صغيرين في نهاية الطبق.




ثانيا::

السلطات





لو قدمت لك وهي مقطعة قطعاً صغيرة يبقى ما فيش مشكلة إنك تاكليها بالشوكة أو بالمعلقة؛ لكن لو قدمت على شكل قطع كبيرة زي الأوراق الكبيرة للخس يبقى في الوقت ده هتستدمي الشوكة والسكينة علشان تقطعيها إلى قطع صغيرة مناسبة ليكِ.


ثالثا:الملاحة



بالنسبة لملاحة الطعام اللي من غير غطاء "المفتوحة" فدي ممكن إنك تاخدي الملح منها باستخدام طرف سكينة نظيفة وترشيه على الأكل... لكن لو كنتِ هتغمسي الطعام في الملح زي ما بيحصل في اللحوم هيكون كل اللي عليكِ هو وضع القليل من الملح على جانب الطبق الخاص بيكِ، وبالمناسبة دي أحب أقول لك إنك يا ريت ما تحطيش ملح على الطعام إلا بعد ما تدوقيه الأول وتشوفيه إذا كان محتاج ملح ولا لأ.

وخدي بالك إن الملاحة لو كانت بعيدة إنك ما تمديش إيدكِ فوق الطعام علشان تاخديها، وكل اللي تعمليه إنك تطلبي من الشخص اللي بجواره الملاحة إنه يقربها منك شوية.



رابعا ياحبايب قلبي ياقمرات(العيش او الفينو)



العيش سواء كان بلدي أو الفينو عادة لما بيتقدم في العزومات بيكون متقطع؛ لكن لو كان مش متقطع يبقى قطعيه أنت بإيدكِ قطعاً صغيرة على قد ما إنتِ محتاجة، واوعي تقطعي العيش بالسكينة

خامسا :لو انتى في مطعم واتقدملك بيتزا




طريقتين ممكن إنك تاكلي بيهم البيتزا..

الطريقة الأولى: هي إنك تاخدي شريحة البيتزا في الطبق الخاص بيكي وبالشوكة والسكين تبدئي في تقطيعها زي ما إنتِ عايزة.

الطريقة التانية: وهي إنك تمسكي كل شريحة وتاكليها بإيدك بدون الشوكة والسكينة، ويا ريت ما تعمليش الطريقة دي إلا إذا كنت معزومة على الفطار وسط مجموعة من أصدقائك.


سادسا:المكرونة الإسباجتي



انا عارفة إن المكرونة الإسباجتي دي بالذات حكايتها حكاية، وممكن إنك لما تلاقيها على السفرة تتكسفي وما تاكليش، بس ولا يهمك، أنا هاقول لك على كذا طريقة سهلة خالص ممكن إنك تجربيها -وإن شاء الله- مش هتلاقي مشكلة في أكلها.

الطريقة الأول: وهي إنك تحطي الشوكة في المكرونة وبعد كده تحاولي إنك تلفي المكرونة حول الشوكة بس خدي بالك إنك ما تكتريش في الكمية اللي على الشوكة.

الطريقة الثانية: هي إنك تستخدمي الشوكة والسكينة في تقطيع شرائط المكرونة إلي أجزاء صغيرة تقدري إنك تاكليها.

وبالنسبة لـ"صلصة" المكرونة فممكن إنك تستخدمي معلقة المائدة الصغيرة في وضع الصلصة على المكرونة.


كفاية عليكم لغاية كده
ولو عجبكم الموضوع لسه عندى طريقة اكل اللحوم والاسماك والحلويات وكله كله اى حاجة تطلبوها هتلاقوها

نوراااام