ملخص محاضرة يا كسلان لفضيلة الشيخ محمد حسين يعقوب

بسم الله الرحمن الرحيم
يتحدث الشيخ في هذه المحاضرة عن التوبة من الكسل وبدأ يذكر كيفيه العلاج من الكسل وذلك بعشرة أشياء هي :

1. قال سبحانه:( يؤتى الحكمة من يشاء ومن يؤتى الحكمة فقد أوتى خيرا كثيرا) وندخل في هذه المشيئة بالصمت والفكر وقطع الشهوات.

2. قال سبحانه: (والله يؤتى ملكه من يشاء) وندخل في هذه المشيئة بالتواضع والشكر.

3. قال سبحانه: ( يدخل من يشاء في رحمته والظالمين اعد لهم عذابا أليما ) وندخل في هذه المشيئة بالتضرع والبكاء والاستكانة والانطراح.
4. قال سبحانه: ( وإن خفتم عيلة فسوف يغنيكم الله من فضله إن شاء ) وندخل في هذه المشيئة بالرضا وتنفيذ الأوامر.

5. قال سبحانه: (فيكشف ما تدعون إليه إن شاء ) وندخل في هذه المشيئة بدوام التبصيص والدعاء.

6. قال سبحانه: (ثم يتوب الله من بعد ذلك على من يشاء ) وندخل في هذه المشيئةببغض المعاصي والندم والتملص والاعتذار.

7. قال سبحانه: ( ويرزق من يشاء بغير حساب ) وندخل في هذه المشيئة بالتقوى وحب الله.

8. قال سبحانه: (يغفر لمن يشاء ويعذب من يشاء وإليه تقلبون ) وندخل في هذه المشيئة بالخوف والرجاء.

9. قال سبحانه: ( ويهدى من يشاء إلى صراط مستقيم )وندخل في هذه المشيئة بحفظ العهد والوفاء.

10. قال سبحانه: (نرفع درجات من نشاء) وندخل في هذه المشيئة بالعلم والإحسان والإنابة.


يا كسلان

إن الحمد لله احمده تعالى واستعينه واستغفره وأعوذ بالله تعالى من شرور أنفسنا ومن سيئات أعمالنا من يهده الله فلا مضل له ومن يضلل فلا هاد له واشهد أن لا اله إلا الله وحده لا شريك له واشهد أن محمدا عبده ورسوله اللهم صلى على محمد وعلى آل محمد كما صليت على إبراهيم وعلى آل إبراهيم انك حميد مجيد اللهم بارك على محمد وعلى آل محمد كما باركت على إبراهيم وعلى آل إبراهيم انك حميد مجيد.

( يا أيها الذين امنوا اتقوا الله حق تقاته ولا تموتن إلا وانتم مسلمون)( يا أيها الناس اتقوا ربكم الذي خلقكم من نفس واحدة وخلق منها زوجها وبث منهما رجالا كثيرا ونساء واتقوا الله الذي تسائلون به و الأرحام إن الله كان عليكم رقيبا)(يا أيها الناس اتقوا الله وقولوا قولا سديدا يصلح لكم أعمالكم ويغفر لكم ذنوبكم ومن يطع الله ورسوله فقد فاز فوزا عظيما)

أما بعد:

فإن اصدق الحديث كلام الله تعالى وإن خير الهدى هدى محمد " صلى الله عليه وآله وسلم" وان شر الأمور محدثاتها وكل محدثة بدعة وكل بدعة ضلالة وكل ضلالة في النار ثم

إما بعد:

فأولا إخوتي في الله، إني والله أحبكم في الله و أسأل الله جل جلاله أن يجمعنا بهذا الحب في ظل عرشه يوم لا ظل إلا ظله "اللهم اجعل عملنا كله صالحا واجعله لوجهك خالصا ولا تجعل فيه لأحد غيرك شيئا".
أحبتي في الله كنا بالأمس نتحدث عن استقبال رمضان" اللهم بلغنا رمضان اللهم بارك لنا في شعبان وبلغنا رمضان" وذكرنا هنالك أن الله "جل جلاله" افتتح لنا شهر شعبان بموعظة بليغة وهي وفاة أحد إخواننا نسأل الله يرحمه رحمة واسعة كانت موعظة في الصميم

رسالة حقيقية لكل منا أرسلها الله
" عز وجل" يقول له ها هو ذا أصح منك جسما وأصغر منك سنا وأضبط منك عقلا وأطول منك أملا فجأة وفي لحظة واحده مات ، مات وترك كل ترتيب ترتيبه لعمرة رمضان وترتيبه لحجة الإسلام وترتيبه لمستقبل الأولاد وترتيبه لمستقبل المعيشة ترك كل شيء علي رغم أنفه في لحظة لم يكن يتوقعها أو ينتظرها إنها رسالة لي ولأمثالي

يقول الله
" عز وجل"لنا فيها كفوا عن الغفلة ولذلك قلت بالأمس أن أول واجب للاستعداد لرمضان ( التوبة) " اللهم تب علينا توبة نصوحا اللهم تب علينا توبة ترضيك "وليست التوبة كما تفعل دائما تبت أستغفر الله أو تظن التوبة من النظر إلي المتبرجات أو التوبة من الكذب أوالغيبة والنميمة إنني أريد التوبة هذه المرة من حياتك التوبة من نمط الحياة الذي نعيشه التوبة من نمط التفكير الذي نفكر به التوبة من الآمال العريضة التي نعيش لها التوبة من حياتنا ككل التوبة من هذه الحياة إننا نريد حقا أن نتوب .

عشتم معنا من عاش معنا في موتة هذا الأخ الكريم اثني عشرة ساعة من الثانية ظهرا إلي الثانية صباحا ننتظر الدفنة فكانت هذه الساعات موعظة ، موعظة مقصودة مرادة من ربنا" سبحانه وتعالي" لكي نظل هذه الساعات نفكر ونتدبر كيف جرى هذا الأمر؟ كما قلت بالأمس ظهرت فضائح في أحوالنا إنني لست أتكلم عن الأخ أسأل الله أن يرحمه رحمة واسعة بانت عليه حسن الخاتمة في امور كثيرة جدا بفضل الله" عز وجل"

نرجو أن يكون من أهل الجنة نسأل الله أن يرزقه ذلك

وإنما نتكلم عن أنفسنا هل لو مات أحدنا اليوم كان هو بدل فلان هذا يبقي الوضع إيه؟ وكما ذكرت لك فلان هذا اصح منك جسما وأصغر منك سنا وأشد أطول منك أملا فكيف لو كنت أنت!
إننا نريد أن نتوب والتوبة هذه المرة تكون توبة عمل إن الله
"جل جلاله "حين أرسل لنا هذه الرسالة في بداية شعبان في مدخل رمضان في أول الاستعداد رسالة موجهه حقيقية واقعية وقد أردت أن يدخل كل منكم ليقبله في رأسه بعد تغسيله ليظل هذا المنظر في ذهنه بقية حياته أن تراه وقد انتهي

وقلت علي القبر دفن بعد كده فين فلان؟ فين فلان؟ خلاص مفيش فلان، كما ذكرت بالأمس ممكن واحد مرض فين فلان ؟ربنا يشفيه، واحد ضل فين فلان ؟ربنا يهديه، واحد سافر فين فلان؟ رينا يجيبه، أما اللي أتقفل عليه بالطين فين فلان ؟خلاص مفيش فلان.


أخشي أن تدفن قبل رمضان "اللهم ارزقنا حسن الخاتمة" لا تعلق آمالك ولا يطول ولا يطول أملك وأبدا منذ الساعة توبة حقيقية من هذه الحياة هذا النمط في التفكير الذي نعيشه إننا نريد ونريد ونريد هموم وآمال واطروحات تقطع في لحظة لم تكن تنتظرها تنتهي في لحظة لم تعمل لها حسابا إنني حتى اليوم كل يوم أستقبل المكالمات كل يوم أستقبل ناس دا كان كلمني أمس الساعة اثنين بالليل كان بيطلب كذا دا كلمني امبارح الساعة اثنين الظهر كان عايز كذا دا قالي بتاع المدرسة دا كان بيحجز لبنته السنة اللي جايه في المدرسة مش دخول مدارس السنة دي دخول المدارس بتاع السنة الجاية "سبحان الملك"

إذن زى ما قولتلكوا إن هذا الرجل ماكانش عامل حسابه انه حيموت دلوقتي ، موت دلوقتي مش في دماغه هذا زمان كثيرا في دروسنا ذكرت لكم قلت لكم أحسننا حالا النهار ده اللي بيقول يعني هو الموت بيجي كدا الواحد عنده دلوقت 35 قول كمان عشرين سنة، الأحسن منه أحسن واحد فينا يقول الواحد يعي ويرقد قد شهر وبعدين يموت يعني مش منتظر إن يموت دلوقت حالا كد اهه ،لأ منتظر انه يموت دلوقت حالا اهه ورأيناها بأعيننا جاهز ولا ورآك بلاوي سوداء محتاج تتوب منها هذه البلاوى.

أولها: نعالجه الليلة التوبة من الكسل

أيها الإخوة إننا حقيقة في هذه الأيام نعانى كسلا شديدا ما اقصد ش بالكسل الفتور اللي الإخوة اللي بيقول لي عندي فتور لا لا دا في كسل حقيقي كسل كسل بمعني كلمة كسل إنني حين أنظر إلي رسول الله" صلي الله عليه وسلم "وهو رسول الله يعني لما تيجي تصور الرسول "صلي الله عليه وسلم "القائد الأعلى للقوات المسلحة الرئيس مثلا في مجتمع المدينة ده الرسول "صلي الله عليه وسلم"( يسمع المسلمون ضجة فيخرجون فيجدون رسول الله راجع عائدا علي فرس بغير سرج ولا لجام ويقول لن تراعوا لن تراعوا لن تراعوا )يبقي هم سمعوا الضجة علي ما بدأوا يفكروا في إيه!كان الرسول راح ركب فرس من غير سرج ولا لجام عارف يعني ايه فرس من غير سرج ولا تفهم دي خالص فرس من غير سرج ولا لجام

يعني أي حد يقع من عليه هتمسك في ايه ايه اللي سندك حاطط رجلك على إيه مفيش حاجة دا راكب الرسول علي الفرس كأني به فداه أبي وأمي ما تصلى عليه
" صلي الله عليه وسلم"
عابط الفرس من رقابته وطياره علشان كده سيدك الرسول ما تصلى عليه "صلي الله عليه وسلم" يقول ايه( إن وجدناه لبحرا )هو ايه؟ الفرس لقيناه بحر
انتم مش معايا صلي علي الرسول بيقول إن وجدناه لبحرا الفرس دا لقيناه بحر يعني طيارة عارف اللي بيقول العربية تدوس علي البنزين تزغدها ولا تنغزها نغزة تطير هي كدة إن وجدناه لبحرا وإن وجدنا لبحرا مش واحد مشي بقى علي ستين ولا علي مائة أو مائة وعشرين ده مشي علي مائتين علشان يلاقي الفرس ده بحر قبل الناس ما تفكر تخرج كان الرسول خرج ورجع هي دي معني العمل وعدم الكسل.

النهار ده والله متزعلوش مني ولا ازعلوا لما تشوف الشباب اللي بيدورلوا علي حته يركن ظهره، اللي بيدورلوا علي حته علشان يمدد رجليه ،اللي يدورلوا علي حته علشان بعد ما خلص صلاة، اللي يقعد في الدرس شوية رجليه نملت رجليه تقلت،
فين الرجاله فين الناس فين الناس البنى آدميين فين المسلمين
كسل كسل مقيت الأمة كلها بتعاني منه لا حد عايز يتحرك ولا حد عايز يعمل حاجة بس قاعدين نقول يارب اللهم اهلك الظالمين بالظالمين وأخرجنا من بينهم سالمين مش عايزين نعمل حاجة يارب خبطهم في بعض وإحنا نقعد نتفرج عليهم هو كد ما حدش عايز يعمل حاجة داخل رمضان وعندنا أمل أن تعتق رقابنا في رمضان
" اللهم أعتق رقابنا في رمضان" عايزين نعالج الكسل مرض الكسل ما إحنا داخلين رمضان علي نفس الأمل.

ايه رأيك يا عم ياسر أنت تصلى بالناس القيام السنة دي تلات أجزاء في الليلة لأ أنا ادعيلى ادعيلى بس، طب ايه رأيك يا محمد أنت، طب اعملها أنت يا عم ياسر، يا شيخ عبد الله ،يا حسنين، يا محمود ورع كاذب كسل.
محضر ايه لرمضان ؟ ايه برنامجك لرمضان ؟أنا قلت امبارح إن إحنا لازم يبقى لنا برنامج ما ينفعشى ناخد الأمور كده على غفلة يبقى في برنامج في رمضان حتى في الدعاء قلت كده امبارح قلت لازم تذاكر دعاء تقعد تحفظ أدعية ها تقولها لازم تقعد تفكر كده أنا ها طلب ايه علشان كده أنا عايز في علاج الكسل النهار ده أقول لكم عشر نقط عشر نقط العشر نقط دول بيتكلموا عن ايه إن ربنا" سبحانه وتعالى" وعد بأشياء على الاستثناء وعد بعشرة أشياء على الاستثناء يعنى لمن شاء كتيير مننا بيمر بالآيات دية ويقعد يقول يارب يعنى مثلا ايه ربنا "سبحانه وتعالى" يقول ايه (يؤتى الحكمة من يشاء ومن يؤتى الحكمة فقد أوتى خيرا كثيرا )يؤتى الحكمة من يشاء أنت عمرك طلبت الحكمة فكرت فيها هيه عندك تتبع بس لكلمة ايه لمن يشاء وبعدين ازاى نحصل إن إحنا ندخل في المشيئة ديه؟ ندخل في ايه؟ في من شاء دول هما من شاء دور موش ناس من الناس ولا لأناس من الناس من شاء .ربنا" سبحانه وتعالى" مثلا يقول ايه( ويغفر لمن يشاء )مين من يشاء دول؟( ويرزق من يشاء بغير حساب) مين دول؟ مثلا ايه( نرفع درجات من نشاء) مين دول؟ نجيبها ازاى؟ هيه ديه أنا باقول إن دي بقى علاج الكسل الكسل انك أنت قاعد.

كنت قولتها في وصف المقربين "نسأل الله عز وجل إن يجعلنا وإياكم منهم "في وصف المقربين انك أنت لما تسمع وصف الرجال تعمل ايه؟ يعنى لما سمعت حديث النبي ما تصلى عليه النهار ده "صلى الله عليه وسلم " "صلى الله عليه وسلم" عمل فيك ايه حرك فيك ايه هيه دي القضية .

فاكرين زمان قلت لكم قصة المصحف إن في راجل كان مرآته مريضه وعنده عيال غلابة تعبانين وسابهم وسافر دوله من دول الخليج علشان يجيب له شوية فلوس فأول ما وصل راح جايب جواب وراح حاطط فيه فلوس كتيير وبعتهم لابنه وقال لابنه في الجواب اعمل كذا وكذا وكذا وكذا وسوى كذا فلما جه الجواب للواد جواب من أبويه حبيبي روح قلبي جواب جواب أبويا وبدأ يحضن الجواب ويبوس في الجواب وبروز الجواب في برواز دهب كبير جدا وكل يوم ينزل البرواز يبوسه جواب أبويا، رجع أبوه لقي البيت أتهد والولية ماتت ايه يا بنى اللي حصل؟ قال له ماتت ليه؟ ما معناش فلوس والفلوس اللي أنا باعتها لك قال له فلوس ايه ! قال له : الجواب ،قال له :جواب ايه ،أنا كل يوم بابوسه ،قال له :يا بنى أنا موش باعته لك علشان تبوسه أنا باعته لك علشان تعمل بيه. هو ده المصحف اللي كل يوم بنعمل ايه بنبو سه ونبروزه ونعلقه ونزخرفه ونحطه قدامنا في العربية نحطه ورآنا ،

لكن ربنا ما نزلناش القران ده علشان ايه علشان نبوسه علشان نبروزه ده بعت لنا القران ده ليه علشان ايه علشان نعمل بيه تعمل ايه هو ده بقى العمل عايز عملي في القران.

أول حاجه هيه الآية( يؤتى الحكمة من يشاء ومن يؤتى الحكمة فقد أوتى خيرا كثيرا) أنا عايز أركز على كلمة من يشاء إن تدخل في من يشاء دول شرف إن أنا لما اسمع من يشاء يبقى ايه أنا شاء الله أن أكون من أهل الحكمة ازاى العلماء يقولوا : فاطلبوا الحكمة بالصمت والفكر وقطع الشهوات .

أظن في خطبة قديمة أوى زمان على المنبر كده أول ما طلعت قلت اهو أنا نفسي كان يحل لي أو أستطيع إن أنا اكشط دماغك وأدخل جوه نافوخك أشوفك بتفكر في ايه دلوقتي وأنا داخل الخطبة كده وماشى في وسط الناس طريق طويل لحد المنبر وقاعد ابص في الناس كده الناس دي بتفكر في ايه !الوقت اللي هما قاعد ينه ده بيفكروا في ايه بتفكر في ايه ؟ ولا حاجه صح كده ولا حاجه هيه دي تجسيم لكلمة الغفلة إنك أنت تبقى قاعد ساكت كده ما بتفكرشى في حاجه دي اسمها ايه؟

بقى اسمها ايه؟ موش سامع الغفلة فوق يا عم آه هيه دي اسمها الغفلة انك تبقى قاعد ساكت لا بتعمل حاجه ولا بتفكر في حاجه، الإمام الجوينى يقول
أنا لا أحل أن تضيع منى لحظه في غير عمل حتى إذا استلقيت لأنام أجيل فكرى فيظل فكرى يعمل حتى وأنا نائم ) قال لك أنا ما بضيعشى لحظه من عمري بتضييع أد ايه يا عم محمد في ناس كده قاعد يلف بتعمل ايه يا بنى أنت بنضيع وقت بتضييع! وقت بتضييع وقت !،واحد فوجئت الساعة تلاته بالليل تلاته ونص كده بيتصل بالتليفون يا بنى ده وقت اتصال
قال والله أنا قلت كده أجرب لاقيت نفسي قاعد قلت أجرب لاقيت نفسك قاعد لاقيت نفسك قاعد الساعة تلاته ونص بالليل قبل الفجر بساعة حد يلاقى نفسه قاعد! المفروض تلاقى نفسك بتعمل ايه بتعيط على حالك بتندب على خيبتك قاعد تصلى وتبكى له وتدعى له موش لاقيت نفسي قاعد قلت أه .

نرجع تانى لموضوعنا( يؤتى الحكمة من يشاء) عايزينك تدخل في المشيئة ديه بإيه بالصمت والفكر مأساتنا كتر الكلام مأساة بنتكلم كتيير أوى و كتر الكلام ده فيه زى ما العلماء عدوهم ألف آفة ألف ألف معصية في كتر الكلام ألف. واحد و تلات أصفار موش بالمبالغة لأ بالعدد ألف آفة في كتر الكلام اقل ما فيها التصنع للبشر زى ما قلت لكم قبل كده إنك تقابل محمد حسين السلام عليكم أزيك وحشتني وهو ما وحشكشى تبقى كداب بحبك وأنت ما بتحبوش تبقى كذاب التصنع للبشر بالكلام إنك أنت تتصنع في كلمة ماهياش كده يعنى ايه إنك تقولها بحيث تحمل معنى أكبر من اللي هيه فيه في الحقيقة ده أقل معصية في الكلام ديه أدنى حاجه،
الصمت ولذلك العلماء بيقولوا إن أول طريق العلم الصمت إنك تسكت علشان تسمع أسكت علشان تفهم أسكت علشان تفكر لكن دود ودو طول ما أنت في الكلام كده الوش اللي في دماغك ده ها تفكر امتى الصمت وموش الصمت والغفلة الصمت وإيه والفكر ،
( أوصاني خليلي بتسع أوصيكم بها حديث معاذ ابن جبل الضعيف أن يكون صمتي فكرا ونطقي ذكرا ونظري عبرة ) كل المعاني دي حلوة أوى زى الفل بس الحديث ضعيف معلشى معلشى لكن أن يكون صمتي فكرا السكوت السكوت موش سكوت غفلة لكن سكوت ايه فكر .

أنا قلت لكم كده امبارح إن الواحد ممكن أحيانا يحتاج إنه يفكر اكتر من انه يقرا يعنى لما أكون أنا كان نفسي أتكلم النهار ده عن عمرة رمضان إيه رأيكم نقلبها خليها المرة الجاية إن شاء الله إزاى نعمل عمرة رمضان أحيانا لما تكون في العمرة هناك أحيانا قبل ما تطوف أحيانا ممكن الواحد يمسك إيه كتاب يقرا شوية ادعيه علشان يجهز نفسه ها يدعى في ايه أحيانا تحس إن لما يقرا بيشتت ذهنه لأمش عايز أقرا عايز اقعد كده أفكر ها قول لربنا إيه يبقى الصمت مع الفكر وقطع الشهوات الشهوات العاجلة موش إحنا قلنا كده في الأول ولا قولناها ازاى الصمت مع الفكر وقطع الشهوات صلى على الرسول" صلى الله عليه وسلم "الصمت مع الفكر وقطع الشهوات الشهوات الشهوات دي هيه مصيبة الدنيا مصيبة الدنيا

أنا موش عايز أجيب سيرة أخونا اللي توفى كتيير يحسن تفكروا إن الحاجات دي بتنتقصه لأ ده أنا بس باستفيد من الوضع هو الراجل زى ما قلت راجل فاضل و الموته موته طيبه ووجهه كان طيب على الغسل وريحته طيبه في إيدينا والدفنه كانت في وقت جوف الليل في وقت التنزل الإلهي اللي ربنا بيستجيب فيه الدعاء فده تدبير الملك له كانت موته زى الفل أحسبه مات على خير لكن أنا باستفيد بس باستفيد باستفيد حته ايه قطع الشهوات

إن معايا خمسة فيزا كارت ليه طب ليه خمسه قولي يعنى ايه فيزا كارت طب بلاش أنت ما تعرفشى يعنى ايه فيزا كارت أنا عايز أقول لك أنت ياللى الشهوات عندك كثرة المعارف عمال تتعامل مع ده وده وده وده شهوه أنا باحا ول اطلع من إطار اللي أنت رسمه إن الشهوات شهوة البطن والفرج لأ في شهوات كتيير اخطر من ديه فعايز تؤتى الحكمة علشان تدخل في المشيئة اقطع الشهوة اقطعها خالص .

إحنا كنا بنتكلم قبل رحيل أخونا الله يرحمه رحمه واسعة عن موضوع الهوى والشهوات وكيفيه الوقاية أنا بحبكم في الله وباعتبر إن اللقاءات اللي بعد رحيل أخونا ده إن ربنا أمهلنا وأدانا فرصة نكمل فأوعى ماتكملشى ده إمهال والإمهال عادة ما بيبقاش طويل أوى دي فرصة كام يوم الحق نفسك .

2.التانيه علشان ما نطولشى بس عايزين نلم العشرة دلوقتي حالا التانيه قال" سبحانه وتعالى":( يؤتى ملكه من يشاء )(والله يؤتى ملكه من يشاء) أوعى تفكر إن أنا ها حط ملك وان النهار ده عايزك تبقى رئيس جمهورية أو تبقى أمير أو تبقى وزير لأ لأ لأ (والله يؤتى ملكه من يشاء) عايز أوسع القاعدة شوية في موضوع ملك تؤتاه في القلوب ملك تؤتاه على نفسك ورعيتك أنا قلت كذا مرة واتنين و تلاته و أربعه وخمسه وعشرة في الفترة الأخيرة ديه ترددت يجى خمسين ستين مرة إن أنا عايز رجل جدع جريء صريح يقوم يقف يقول لي مرآته بتحكمه ليه مرآته مماشياه ليه وما حدش طبعا قام ولا حد قال لي لحد دلوقتي ،لكن القضية هيه ديه إنك في بيتك على مرآتك وأولادك سلطانك إيه، على أمك وأخواتك سلطانك إيه ،على جيرانك وزمايلاك سلطانك ايه، على أصحابك وحبا يبك سلطانك إيه،( والله يؤتى ملكه من يشاء)

نجيبها منين ديه؟ بالتواضع والشكر تواضع!( من تواضع لله رفعه) والله معاني نفسنا نتكلم فيها والله يعنى إيه التواضع؟ أنا كنت ناوى فعلا أدخل لكن هيه موتت صاحبنا أنا لسه كنت بشبه دلوقتي من ساعت ما مات الراجل ده وكأن حد خابطنى على نفوخى" ربنا يعافينا وإياكم ويرزقنا وإياكم حسن الخاتمة" كنت عايز أتكلم أكمل باقى الدرة المنقودة في إحياء معالم من الإسلام مفقودة فاكرين من خمسة عشر سنه الدرة المنقودة في إحياء معالم من الإسلام مفقودة أتكلمنا ساعتها عن الإيثار وعن موش فاكر كام حاجه كنت عايز اعمل حاجه عن المروءة المروءة اللي هيا الجدعنه هيا الجدعنه الرجولة الشهامة المروءة و دلوقتي بدا لي موضوع التواضع العلماء يقولوا( حد التواضع انك كلما رأيت أحدا تيقنت انه أفضل منك)

حد التواضع تعريف التواضع انك كل لما تشوف حد تقول اهو ده أحسن منى كل لما تشوف حد تقول وده كمان أحسن منى وده أحسن منى وده أحسن منى ده التواضع التواضع انك ماتشوفش انك أحسن من حد ولا أفضل من حد ولا اجدع من حد ولو شفت إن أنت أحسن من حد ده اسمه الكبر قال رسول الله:
( الكبر بتر الحق وغمت الناس)

غمت الناس احتقارهم وازدرائهم انك تشوف نفسك أحسن منهم غمت الناس لذلك العلماء دايما يقولوا ايه (إن الله عز وجل أخفى أوليائه في عباده لكي لا تحتقر احد) مين الولي؟ مين؟ ماتعرفش ماتعرفش مين؟ ممكن يكون ده أو ده أو ده أو ده أو ده ماتعرفش مين فعشان كده ممكن تحتقر حد (لا يسخر قوم من قوم عسى أن يكونوا خيرا منهم) ماتعرفش مين ده مين ده اصل الأمور مش بالمظاهر( إن أكرمكم عند الله اتقاكم) اتقاكم اللي هيا التقوى والتقوى محلها الرسول قال:( التقوى هاهنا وأشار اللي صدره)

طيب أطلعها منين هنا علشان أشوف أنت اتقى ولا أنا اتقى أنت اتقى ولا ده اتقى دي جوا في القلب ما حدش يعرفها فإذا ما تقدرش تقول مين أحسن من مين ما تقدرش والله والله غلطنا فيها كتير غلطنا فيها كتير أوى حين ظننا إن فلان أحسن من فلان، وان فلان أحسن الناس، وان فلان اجدع، وفلان اتقى، وفلان اعلم ،وفلان أدين وفى الآخر طلع كله ده غلط اصل الأيام بتكشف فضائح الفتن
" اللهم نجنا من الفتن يارب" هيا دي مصيبة الدنيا بقى لما تبتلى تتقال كدا( الناس سواسية فإذا جاء البلاء تفرقوا تمايزوا تبينوا تباينوا )إما بينزل بلاء" اللهم عافنا من كل بلاء ونجنا من الفتن ما ظهر منها وما بطن"

لما ينزل البلاء بتبان بقى بتبان الحقائق بتظهر كل واحد بيبان على حقيقته فالشاهد انك أنت لو حبيت ملك انك أنت تبقى راجل صاحب ملك صاحب سلطان في الدنيا دي تعمل ايه تواضع خليك متواضع ربنا" سبحانه وتعالى" قال:( أذلة على المؤمنين) ذليل للمؤمن، نمره أتنين الشكر( وإذ تأذن ربكم لان شكرتم لأزيدنكم )بدون استثناء مش لمن شاء لازيدنك والتانيه( فاذكروني أذكركم) ما فيهاش بردوه لمن شاء اذكروني أذكركم مباشرة.

3. التالته الرحمة" اللهم أدخلنا في رحمتك" قال" سبحانه"
يدخل من يشاء في رحمته والظالمين اعد لهم عذابا أليما )وقال" سبحانه" :آية جميله أوى بتاثرنى دايما( يختص برحمته من يشاء) شوف كلمة ايه ؟يختص الرحمة دي خصوصية بيخص بيها أناس" اللهم انزل علينا الليلة رحمة من عندك اللهم انزل علينا في ليلتنا هذه رحمة من عندك اللهم إنا نسألك رحمة من عندك تملئ بها قلوبنا"رحمه الرحمة يختص إذن لو ربنا أداك رحمه تبقى دي ايه اختصاص يختص برحمته من يشاء أجيبها منين دي؟ أه يقولوا بالتضرع والبكاء والاستكانة والانطراح بالتضرع والبكاء والاستكانة والانطراح أنطرح على باب الملك عارف سيدنا جبريل في الحديث الطويل لما الرسول ما تصلى عليه وصل إلى الرفيق الأعلى قال ايه
فرأيت جبريل منطرحا كالحلث البالي )


كال ايه؟ كالحلث البالي الحديث في صحيح مسلم كالحلث البالي عارف يعنى ايه الحلث البالي؟ الحلث اللي هو الفراش الحاجة اللي بتتفرش في الأرض فمن كتر الدوس بالرجلين ايه اتهرت بالى اهو كان منطرحا كده منطرح كده آه فأنت لما تكون منكسر يجبرك قولت لكم الكلام ده قبل كده إن في الإسرئليات سيدنا موسى قال يارب أو سيدنا داود و الإسرئليات زى ما انتوا عارفين لا نصدقها ولا نكذبها إلا إذا أتى من شرعنا ما يؤكدها فنؤكدها قال ايه
يارب أين أجدك أين أجدك ؟قال :يا داود أبغيني عند المنكسرة قلوبهم من أجلى ) تلاقيني فين ؟ عند المنكسرة قلوبهم من أجلى تأكيد هذا في شرعنا في حديث النبي ما تصلى عليه " صلى الله عليه وسلم" :(أن الله يوم القيامة يقول لعبده عبدي مرضت فلم تعدني ،فيقول العبد إيه :فكيف أعودك وكيف أعودك وأنت رب العالمين ،يقول أما علمت أن عبدي فلان مرض فلم تعده أما علمت أنك لو عدته لوجدتني عنده ) أما علمت أنك لو عدته ايه لوجدتني عنده يبقى ربنا عند مين ؟ عند المنكسرة قلوبهم من أجله المريض عادة منكسر القلب ،عند المنكسرة قلوبهم من أجلى ،فلذلك الرحمة كثير من الناس يقول لك رحمة ربنا واسعة ، الملك" سبحانه وتعالى" يقول ايه
ورحمتي وسعت كل شيء فسأكتبها للذين يتقون ) واسعة آه بس لمين ؟ لمين ؟ .

حفص صاحب القراءة مش بنقرا برواية حفص عن عاصم حفص ده واحد قرأ عليه ألم نشرح لك صدرك فبكى لحد ما أغمى عليه ، قالوا له : الله بكيت في غير مبكى بتعيط على إيه؟ فقال :ما الوزر الذي أنقض ظهر رسول الله ؟ ، مش ربنا بيقول للنبي ما تصلى عليه ايه :(ألم نشرح لك صدرك ووضعنا عنك وزرك الذي ايه ؟ طب سيدنا النبي ايه الوزر اللي أنقض ظهره أمال أوزارنا تعمل ايه بقى في ظهورنا بكى الراجل لما أغمى عليه ،
التانى بكى بردوا لما سمع قول الله "عز وجل":( وسارعوا إلى مغفرة من ربكم وجنة عرضها السماوات والأرض ) فبكى وانتحب قالوا ما يبكيك لقد بكيت في غير مبكى هذه آية رجاء بتبكى على ايه ؟ فقال : ما ينفعونا عرض السماوات والأرض إن لم يكن لي فيها موضع قدم . ، عرضها السماوات والأرض آه بس أنا مش فيها أفرح بإيه، فكذلك رحمة ربنا واسعة طب وإيه ها يفيدك إيه إذا ما كانشى يخصك منها شيء يخصك منها ايه

أنت عايز رحمه التضرع والبكاء والاستكانة والانطراح، قيل لثابت الغنانى : داوى عينك على شرط ألا تبكى ، قال : وما خير في عين لا تبكى ، هو العين لما ما تبكيش يبقى لازمتها إيه لازمتها ايه ايه لازمة عينك في الدنيا إذا ما بكتشى ايه لازمة قلبك إذا ما انكسرشى ، لسه باكتب في قصة الالتزام الراجل التايه ده لما رجع يصلى لما صلى أول مرة في حياته يحس انه له قلب في حاجه دقت هنا آه ايه لازمته إذا ما دقش فالبكاء الاستكانة الإنطراح ودول معناهم طول المكث انك أنت تفضل قاعد،

يا جماعه الرحمة اللي بنطلبها من ربنا
"اللهم ارزقنا رحمه من عندك " محتاجه شغل محتاجه عمل إحنا بنتكلم دلوقتي خليكوا فاكرين على طول واستحضروا المعنى اللي بنتكلم فيه علاج الكسل دواء الكسل التوبة من الكسل أوعى تسمع الكلام وتروح تنام توب توب بقى من الكسل اللي أنت فيه اعمل حاجه لو حتى تعيط اى حاجه تبكى على نفسك .

4.نمرة أربعة الغنى قال" سبحانه وتعالى" :( وإن خفتم عيلة فسوف يغنيكم الله من فضله إن شاء ) الغنى وأنا اقصد الغنى هنا غنى القلب الرسول قال كده ما تصلى عليه" صلى الله عليه وسلم " :(يا أبا ذر إن الغنى غنى القلب وان الفقر فقر القلب ) إن الغنى غنى النفس غنى القلب أتكلمنا زمان عن غنى النفس وقلت لما تلاقى واحد عمال يدور يجيب هنا وهنا وهنا و عايز ديه و عايز ديه و عايز يعمل ديه ويسوى ديه رجل فقر ده اسمه راجل فقر الغنى الغنى الراضي الغنى اللي بيقوله عليه عندنا في الفلاحين عينه مليانه قلبه مليان حتى ولو ما عند وش هو ده الغنى الغنى الحقيقي اللي قلبه مليان ما يبصش على الحاجة ويشتريها ولا يتمناها ولا يرجوها ولا يحلم بيها هو شبعان هو شبعان إن الغنى غنى القلب، وابن القيم في كتاب طريق الهجرتين تقرا له كده بيقول ايه :باب في الغنى العالي في الغنى الإيه ايه ده ايه ده هو فيه غنى عالي وغنى آه قالك
الغنى العالي الغنى بالله )اصل فيه واحد غنى بفلوسه وقلت الكلام ده قبل كده إن اللي غنى بفلوسه ده يوم لما تروح الفلوس تلاقيه أزل من كلب وفى واحد غنى بجاهه، وواحد غنى بناسه ،وواحد غنى بمنظره، واحد غنى ب ،وفى واحد غنى بالله ده امتى يفتقر ! أبدا أبدا لأنه غنى بالله يفضل طول عمره غنى أجيبها منين ديه ؟بالرضا وتنفيذ الأوامر أبقى غنى بيه أما أبقى راضى بيه وبانفذ أوامره يبقى غنى بيه أصل رضي بربنا ،شوف سيدنا النبي ما تصلى عليه" صلى الله عليه وسلم "في فتح مكة بعد كده لما وزع غنائم قبيلة هوازن أدى المهاجرين وأدى مسلمة الفتح ولم يعطى الأنصار شيئا على الإطلاق الأنصار ما ادهومشى حاجه أبدا سبحان الملك كان يدي أبو سفيان مائه من الإبل قال له وابني ،قال له : ولابنك مثلها مية ناقة وقطيع من الغنم أعطاه غنما بين جبلين ، العباس عمه لما جه النبي "صلى الله عليه وسلم" قال له :حمل دهب ،قعد يحمل ملى حجره وجه يقوم ما قدرشى يقوم قال له :قومني ،قال :أنقصه تقوم آه خذوا خدوا وشالوا كله شال إلا الأنصار ما خدوش، أبدا حاجه خالص نهائي فبدأوا يتكلموا الله يعطيهم وسيوفنا تقطر من دمائهم أبو سفيان ده كنا لسه بنحاربه أول امبارح يا خد وأنا ما اخدشي فبلغت المقالة لرسول الله فجمعهم وقال يا معشر الأنصار كلام طويل بقى بس أنا باختصر :(أوجدتم عليا في أنفسكم )زعلتم منى يعنى (على لعاعة من الدنيا أتيتها قوم أتألفهم بها على الإسلام ووكلتكم إلى ما جعل الله في قلوبكم من خير )
انتوا زعلانين منى على قرشين أديتهم لناس علشان يثبتوا وسيبتكم انتوا علشان قلوبكم أوجدتم عليا في أنفسكم على لعاعة من الدنيا أتيتها قوم أتألفهم بها على الإسلام ووكلتكم إلى ما جعل الله في قلوبكم من خير (أما ترضون يا معشر الأنصار أن يذهب الناس بالشاء والبعير وتذهبون أنتم برسول الله تحوزونه إلى رحالكم )قالوا :رضينا برسول الله قسما ) رضينا بالقسمة ديه ناخد النبي سبحان الله ناس خدت إبل وناس خدت غنم وناس خدت دهب وناس خدت رسول الله ، فين الإبل ؟ ماذا فعلت الإبل لأهل الإبل، وماذا صنعت الغنم لأهل الغنم ،وماذا صنع الذهب لأهل الذهب ذهبوا وبقى رسول الله للأنصار ، أنا فرطكم على الحوض
) أنا مستنيكم على الحوض في القيامة شوف هو اللي فاضل اهوه فلذلك اللي راضى بربنا الفلوس تروح والعيال تروح والدنيا كلها تروح وبفضل لك الله ربنا، مرآتك حبيبتك مش ها تنفعك أول واحده تبيعك، وأخوك وكل الدنيا لكن لو ليك ربنا ها يفضل لك هو ده الغنى الأيه؟

الغنى العالي الغنى العالي الرضي وتنفيذ الأوامر إنك ترضى بربنا وتنفذ أوامره تبقى غنى بيه ترضى بيه وتلعب في الأوامر لأ تبقى ما رضيتشى بيه ما رضيتشى بيه لازم تنفذ أوامره ولذلك الآية
( لو أنهم أقاموا التوراة والإنجيل وما أنزل إليهم من ربهم لأكلوا من فوقهم ومن تحت أرجلهم ) نفذ الأوامر ها يوكلك من تحت رجليك بمنتهى البساطة يغنيك .

5.نمرة خامسة رفع البلاء "اللهم أرفع البلاء عن جميع المبتلين من المسلمين " قال" سبحانه وتعالى" :(فيكشف ما تدعون إليه إن شاء ) بنطلب كتيير بس مش كل اللي بتطلبه تا خده إن ايه؟ إن شاء فيكشف ما تدعون إليه إن شاء طيب أزاي أدخل في المشيئة ديه قالوا بحاجتين بس كلمه عجيبة أوى اللي قالوها المرة ديه بدوام التبصيص بدوام التبصيص والدعاء ايه التبصيص ديه؟يقولوا يا عم الشيخ رأفت انه رمى للكلب لقمه فبصبص الكلب يعنى ايه بصبص؟آه أتمسح فيه وهز له ذيله واستكان هيه ديه اللي باقول لك عليه إنك أنت محتاج تتمسح تتلزق تفضل على طول غلبان ذليل تفضل متطفل تفضل بتتحشر.

وصلت ولا لسه ؟ يعنى ايه اتلزق هيه ديه يارب يارب دا أنا بتاعك يارب طب أروح لمين طب قولي يارب قولي طب أروح لمين هو أنا ليه غيرك يارب هو أنا شفت عمري عز إلا منك ولا شفت كرم إلا منك يارب دا أنا كل الناس فاضحانى وكل الناس ذل انفاسى وكل الناس أرفاني ومطلعه عنيه أنت بس اللي بتكرمنى يارب تعرفوها دي هيه ديه إنك ايه هيه دوام التبصيص هيه ديه أقول تانى كمان شوية دا أنت أستاذ ورئيس قسم في الموضوع

يا ريس صلى على الرسول وسلم
" صلى الله عليه وسلم" آه محتاج انك أنت تقعد تقول له يارب طب أنا محتاج يارب أنت اعلم يعنى أنا موش باقول علشان حاجه أنت اعلم بما يصلحني واعلم بنا ينفعني ولكن من غير ولكن يارب أنا آسف خلاص اللي تشوفه يارب اللي تقول عليه أنا اهوه واللي تعمله أنا بحبك أنا بحبك شوية بصبصة مش للنسوان تعرف تعمل معاه كده أنا بعد الكلام ده لما باقوله كده ارجع استغرب للي بيقروا من كتب وهما بيطوفوا طب الكلام ده يخلص امتى! يخلص امتى! ده الكلام ده ما يخلصشى انك تقعد تقول لربنا كده وربنا يحب من عبده انه يتملكه بيفرح بدية "سبحانه وتعالى" في حديث ثلاثة يحبهم الله:(رجل قام يتملقني ويتلو آياتي ) يتملقني التملق هيه دي بقى خلاص بلاش كلمه البصبصة يتملقني التملق جت اهه الحمد لله التملق انك أنت تقعد تتكلم مع ربنا "سبحانه وتعالى" دي نمره واحد علشان يديك اللي أنت عايز رفع البلاء "اللهم اكشف البلاء اللهم اكشف البلاء عن المبتلين من المسلمين اللهم ارفع البلاء وانزل الشفاء "نعم دوام التبصيص والدعاء الدعاء أنا قلت امبارح إن فعلا اكتشفت إن إحنا مفيش اى فايده إلا الدعاء إحنا ماشيين بالدعاء فهمت معنى قول ربنا" جل جلاله" :(قل ما يعبأ بكم ربى لولا دعاؤكم) قل ايه ؟ ما يعبأ بكم ربى

عارفين يعبأ بكم ربى يعنى ايه؟ لا يهتم بكم ولا يقيم لكم وزنا ولا لكم وجود إلا بالدعاء
"اللهم ارزقنا الدعاء "الدعاء الدعاء بتركيز واحد أخوانا ربنا يهديه كان يقول لي أوعى تفكر إن دعائكم ده ما لهوش لازمه لأده عامل حاجات كتيير أوى للمبتلين اصل إحنا عماليين نقول ما أحنا عماليين ندعى لأ فيه الدعاء ده عامل حاجات كتيير جدا بس أنت موش شايف حاسس مش شايف الدعاء ده عامل عامل الرسول بيقول ايه ما تصلى عليه " صلى الله عليه وسلم"(الدعاء سلاح المؤمن لكن يستجاب لأحدكم ما لم يعجل ) وفى رواية( ما لم يستحسر) وفى رواية (ما لم ينقطع)( يقول دعوت فلم أرى يستجاب لي) أنا دعيت وفين الإجابة مش لاقى خلاص يبطل دعاء لأما تبطلش أفضل استمر الزم الباب وان طردت الزم الباب وان زجرت الزم الباب .

6.ستة التوبة قال الله" سبحانه "
ثم يتوب الله من بعد ذلك على من يشاء )"اللهم تب علينا يارب"ثم يتوب الله من بعد ذلك ايه على من يشاء "يارب توب علينا يارب" إحنا محتاجين نتوب ودي التوبة من الكسل إن يبقى في عمل يبقى في حركه يبقى في وجود يبقى في حياه ازاى نحصلها دي؟ بالتوبةببغض المعاصي والندم والتملص والاعتذار صليت على الرسول "صلى الله عليه وسلم "

التوبة معنى كبير أوى بردوا علشان الناس اللي فاتهم حاجه من بتاع امبارح دي اللي فاضلة ما قولنهاش من درس امبارح إن الصيام قضيه الصوم معنى يحتاج إن يفهم ويتدبر الصيام مش لعبه مش ترك الطعام والشراب والشهوة من الفجر للمغرب مش ده الصيام بس الصيام

موضوع اكبر من كده بكتيير شوف حديث ربنا يقول ايه :
(كل عمل ابن آدم له إلا الصوم فإنه لي وأنا أجزى به ) الله يبقى الموضوع ايه الموضوع كبير مش بس ترك الطعام والشراب بس مش ده الموضوع مش دول بس يعنى ترك الطعام والشراب والشهوة ده حاجه من الصيام لكن مش هو ده الصيام الشاهد إن التوبة كده التوبة موضوع كبير جدا وصعب جدا معلشى ما متزعلوش منى في مشايخ كتيير يقولك يا بنى الناس دول معقدين بيصعبوا المسائل التوبة سهله قول تبت إلى الله وخلص الموضوع

لا صعبه ولا حاجه مين اللي قالك صعبه طيب هو سهلها لك الموضوع ماشى وأنت قلت لي انك أنت تبت تعال لي بعد أسبوع بقى أشوفك تبت لسه تايب ولا لأ تقول لي أسبوع ليه تانى يوم بارجع للذنب طيب يبقى الموضوع إذن ايه لأمش سهل ده موضوع دي قضيه قول لي طب معلشى براحه عليه يا عم الشيخ واحده واحده مش سيدنا النبي حبيبك حبيب قلبك قال :
( إذا أذنب العبد ذنبا قال ربى أذنبت ذنبا قال الله علم عبدي أن له ربا يغفر الذنب ويأخذ بالذنب قد غفرت لعبدي )
ماهى سهله اهه قال لك طب اعملها سهله آه اعملها لا دا القضية في علم عبدي إن له ربا يغفر الذنب ويأخذ بالذنب هو ده بقى اللي أنا باقول عليه صعب أن تعلم قول لي طب ما أنا اعلم اهوه اهوه أنا اشهد لله انه يغفر للذنب ويأخذ بالذنب العمل ايه ؟ العلم ده عمل فيك ايه هيه دي
( إلا من تاب وآمن) هيه ديه هو ده الإيمان أن تؤمن إن لك رب يغفر الذنب ويأخذ بالذنب دي فين ماهى لو موجودة مش ها تعصى أصلا الشاهد ازاى ندخل في ديه بكره الذنوب ببغض المعاصي ممكن الإنسان يذنب أحنا ما بنقولشى عن الإنسان معصوم ما بيغلطش بيغلط بس زى ما قال ابن القيم قال ايه :(ولا تتم لذة لمؤمن بمعصية أبدا ولا تتم اللذة لمؤمن بمعصية أبدا بل لا يباشر معصية إلا والحزن يخالط قلبه ومتى خلى قلبه من هذا الحزن فليبكى على موت قلبه )

هيه دي انك لو حصل وعصيت تبقى بتتقطع تبقى بتتقطع ايه اللي أنا باعمله ده ما تبقاش مستمتع ومستلذ لا تتم لذة بمعصية أبدا لمؤمن مش ممكن بغض المعاصي أتنين
الندم تلاته التملص والاعتذار التملص من الذنب عارف يعنى ايه التملص يارب ما كانشى قصدي سامحني يارب يارب والله ما كنت اعرف سامحني يارب طب أنا كنت حمار وما بافهمشى سامحني مش ها عملها تانى سامحني التملص التملص من الذنب إنك تتملص من المعصية ديه والاعتذار فتعتذر لربنا "سبحانه وتعالى ".

7.سبعه الرزق إحنا فات معانا الغنى وده الرزق وما اتعرضتش لموضوع الفلوس لا ديه ولا ديه أنا اقصد بالرزق هنا المعنى الأعم الأوسع الصلاة رزق وقيام الليل رزق والكلام اللي أنت بتسمعه ده رزق والذكر والتسبيح رزق والزوجة رزق العيال رزق والجار الجيران رزق فربنا"سبحانه وتعالى" بيقول ايه :( ويرزق من يشاء بغير حساب ) "اللهم وسع من الخير رزقنا اللهم أوسع من الخيرات رزقنا "آه الخير بقى الخير ده أرزاق يرزق من يشاء بإيه ؟ بغير حساب جبت ده كله منين يا جدع أنت ؟ ده رزق جبته منين ده أرزاق بغير ايه آه والله بغير حساب مفيش أكرم منه بغير حساب كريم مش ممكن لا يتصور كرمه "سبحانه وتعالى" والله أنا لو وصفت كرم ربنا أبقى غلطان لأنه لا يوصف لا تستطيع وصفه أنا لا أستطيع لا أستطيع أن أنا أحيط به علما ولا بشر لا يحيطون به علما" سبحانه وتعالى" كرم الله صفه من صفات الله اسمه الكريم فلذلك من كرمه أنه يرزق بغير حساب يغرقك في نعمه بغير حساب نجيبها منين ديه نجيبها منين ديه( يرزق من يشاء بغير حساب)بالتقوى وحب الله بالتقوى قال" سبحانه وتعالى" :(ومن يتقى الله يجعل له مخرجا ويرزقه من حيث لا يحتسب )ومن يتقى الله يجعل له مخرجا وإيه؟ يرزقه من حيث لا يحتسب ده الرزق اتقى الله اتقى الله بقيت كلمه سهله ممتهنه اليومين دول اتقى الله يا عم محمد اللهم اجعلنا من المتقين اتقى الله يا عم سيد ربنا يرزقنا التقوى ولا بيتقى الله ولا حاجه وإحنا زى ما قلنا كده سبحان الله اهو المعنى ده احتجناه دلوقتي عند الموت "اللهم ارزقنا حسن الخاتمة"أبو هريرة قال لسيدنا عمر لما سيدنا عمر سأله عن التقوى قال له ايه :(هل أخذت طريقا ذا شوك ,قال: نعم ,قال ماذا فعلت ,قال: شمرت واجتهدت ,قال : فتلك التقوى )

قلت لكم كتيير التقوى إنك تمشى على طراطيف صوابعك اهو إحنا محتاجين في الدنيا ديه ما تمشيش بتدب أوى برجليك ما تطمن لهاش أوى كلها ازاز كلها شوك كلها قاذورات ما تمشيش بكل رجلك أمشى على طرا طيف صوابعك هيه ديه التقوى هيه دي التقوى في الدنيا هيه دي التقوى اللي عشان ترزق بغير حساب , نمرة أتنين حب الله لأنه قال ايه :(فإذا أحببته كنت شوف الرزق بقى كنت سمعه الذي يسمع به وبصره الذي يبصر به ويده التي يبطش بها ورجله التي يمشى بها ولان سألني لأعطينه ولان استعاذ بي لأعيذ نه ومثله في خلقي )الله اكبر كل ده الله أكبر بغير حساب التقوى بحب الله .

8.تمانيه المغفرة قال" سبحانه" :(يغفر لمن يشاء ويعذب من يشاء وإليه تقلبون )سبحانه( يغفر لمن يشاء )سبحان الملك ربك "سبحانه وتعالى" ممكن واحد السحرة سحره فرعون لما جابهم عشان يحاربوا سيدنا موسى سبحان الملك فجأة بعد ما كانوا أعداء محاربين يبقوا ايه أولياء لأه و شوف فرعون يقول لهم ها قطعكوا يقول له :قطع هادبحكوا دبح ها حرمكم يقوموا يقولوا له ايه :(إنا آمنا بربنا ليغفر لنا خطايانا إنا نطمع أن يغفر لنا ربنا خطايانا أن كنا أول المؤمنين)الله اكبر سحره ويغفر لهم الصبح كانوا بيحاربوا سيدنا موسى بالليل في الجنة بيسبحوا سبحان الملك إذن يغفر لمن يشاء من كان يظن إن عمر يسلم، من كان يظن إن خالد بن الوليد يسلم ،من كان يظن إن أبو سفيان يسلم ،يغفر ايه لمن يشاء وتلاقى واحد عنده يعنى شوف الناس دول اللي أنا باكلمك عنهم كانوا كفار فربنا أتى بهم وغفر لهم وواحد عنده معصية صغيره أد كده يفضل مصر عليها لحد ما يموت على الكفر يغفر هاه لمن يشاء( لا معقب لحكمه ولا رآد لقضائه)

اشتغل بقى نجيبها منين ديه بالخوف والرجاء الخوف قولنا جناحين الخوف والرجاء انك أنت تطلع بجناح الخوف لحد ما قبل القنوت من رحمه الله وينزل ويطلع جناح الرجاء لحد ما قبل الأمن من مكر الله وينزل ويطلع الخوف وهكذا تطير إلى الله خوف لحد قبل القنوت تنزل ورجاء لحد قبل الأمن تنزل وتظل على هذا عمرك عمرك .


9.تسعه الهداية الهداية"اللهم اهدنا يارب يارب اهدينا يارب يارب اهدينا يارب " قال" سبحانه وتعالى" :( ويهدى من يشاء إلى صراط مستقيم )يهدى من يشاء (ليس عليك هداهم ولكن الله يهدى من يشاء )(إنك لا تهدى من أحببت ولكن الله يهدى من يشاء )مش بأيدك مش منك ده هو إلى بيهدى بحاجتين بحفظ العهد والوفاء.

10.رفع الدرجات(نرفع درجات من نشاء)بالعلم والإحسان والإنابة نرفع درجات من نشاء جت في حق سيدنا إبراهيم حليم أواب منيب وفى حق سيدنا يوسف أنا نراك من المحسنين.

بحبكم في الله مش عايز أطول كانت ديه التوبة من الكسل لو جينا نعد بقى الصمت والفكر وقطع الشهوات , التواضع والشكر ، والبكاء والإستكانة والانطراح ، الرضا وصدق الطلب وتنفيذ الأوامر ,دوام التبصيص والدعاء ، بغض المعاصي , الندم والاعتذار ، التقوى وحب الله ،الخوف والرجاء ، حفظ العهد والوفاء ، العلم والإحسان والإنابة .
كل دي معاني محتاجه تتعمل الليلة دي قبل ما تموت زى الراجل اللي مات النهار ده ده محتاجين نتوب من الكسل قبل دخول رمضان لأ موش قبل دخول رمضان قبل ما نموت لأن إحنا قد نموت قبل رمضان "اللهم ارزقنا حسن الخاتمة " زى ما قولنا يا ما ناس عندها أمل توصل رمضان و مين عارف ؟مين عارف؟ ها يوصل رمضان ولا مش ها يوصل رمضان "اللهم بارك لنا فيما شعبان وبلغنا رمضان اللهم إنا نسألك رضاك والجنة ونعوذ بك من سخطك والنار، اللهم إنا نعوذ بك من الهم والحزن ونعوذ بك من العجز والكسل ونعوذ بك من الجبن والبخل ونعوذ بك من غلبة الدين وقهر الرجال، اللهم إنا نعوذ بك أن نضل أو نضل أو نذل أو نذل أو نظلم أو نظلم أو نجهل أو يجهل علينا، اللهم إنا نعوذ بك من زوال نعمتك ونعوذ بك من فجأة نقمتك ونعوذ بك من تحول عافيتك ونعوذ بك من جميع سخطك، اللهم إنا نعوذ بك من جهد البلاء ونعوذ بك من درك الشقاء ونعوذ بك من سوء القضاء ،اللهم إنا نعوذ بك من سوء الخاتمة، اللهم إنا نعوذ بك من سوء الخاتمة، اللهم إنا نعوذ بك من سوء الخاتمة، اللهم إنا نعوذ بك من علم لا ينفع ونعوذ بك من قلب لا يخشع ونعوذ بك من نفس لا تشبع ونعوذ بك من دعاء لا يرفع اللهم إنا نعوذ بك من هذه الأربع ،اللهم إنا نعوذ بك من الشر كله عاجله واجله ما علمنا منه وما لم نعلم، نسألك اللهم الخير كله عاجله واجله ما علمنا منه وما لم نعلم ،صلى اللهم وسلم وبارك على النبي محمد وآله والحمد لله رب العالمين ".

المصدر: منتديات نبض القلوب