فاكرين اللقاء اللي اتفقنا عليه يوم الحد اللي فات

انهارده يوم الحد وكل واحد فينا لازم يقول نتيجه تجربته


انا شخصيا شدني اوي خبرين

خبر عن صدام مقبل بين امريكا وروسيا وشويه من دول اوروبا


الموضوع هوه ان امريكا عايزه تعمل درع صاروخي في دول الكومنولث السوفييتي (اوروبا الشرقيه) وقد يمتد بعد كده علشان يشمل دول العالم كلها علشان قال ايه تحمي اراضيها من اي هجوم محتمل

طبعا روسيا شافت ان الدرع الامريكي ده بيهددها شخصيا حولت تقنع امريكا انها متعملوش يهديكي يرضيكي يا ست امريكا يمين شمال الست امريكا قالت هعمله يعني هعمله

في الاخر روسيا عرفت ان الذوق مينفعش مع العالم دول قالت خلاص نستخدم معاهم العافيه


طلع يوم الخميس اللي فات الرئيس الروسي فلاديمير بوتن وقال لو امريكا بدات تعمل الدرع ده روسيا هتوجه صواريخها لقلب اوروبا وهتمنع عمله باي طريقه ممكنه

مين بقى اللي زعل انجلترا وقالت عيب يا جماعه اللي روسيا بتهدد بيه ده

ولسه الموضوع مخلصش ومش عارفيين هيوصل لفين


الخبر التاني بقى رياضي

بيقولك في 18 فريق عالمي في العالم عملوا لنفسهم مجموعه وسموها مجموعه ال ـ14 العظام علشان يدوروا على حقوق الانديه الكبيره ورئيس المجموعه هوه رئيس نادي ليون الفرنسي

من ضمن مطالب العظام دول ان كاس الامم الافريقيه تكون كل اربع سنين ومش كل سنتين بس علشان اللعيبه الافارقه اللي في فرقهم ميعدوش كل شويه يعملوا ليهم ارتباك في تشكيل الفرق

وكمان من مطالبهم ان اللعيب اللي يتصاب مع دولته في اي بطوله او ماتش ودي لازم اتحاد البلد دي يدفع تعويض للنادي عن الاضرار اللي لحقته باصابه اللاعب





على العموم جوزيف بلاتر مش عاجبه الكلام ده وعايز يحل الاتحاد ده وبيقول خلونا نحل مشاكل الكوره في الفيفا بس

وبرضه المشكله لسه مخلصتش



انتوا بقى وصلتوا لايه في التجربه دي؟