ازيكوا يا نجعاوية...دى بعض الحاجات قلت اجيبهالكوا للحفاظ على صحة عنينا اثناء مشاهدة التليفزيون خاصة للى بيقضوا وقت كبير ادامه

اول حاجة في عادة خاطئة وهى اطفاء جميع الانوار ف الغرفة ((انا عن نفسى بعمل كده )) وده غلط جدا لان حدقة العين بتتسع ف الظلام وتضيق عند زيادة الضوء وبما ان النور مطفى حوالينا والاضاءة ف التليفزيون مش ثابتة القوة لانها تتذبذب بين القوة و الضعف حسب نوع الصورة وبالتالى تتبعها الحدقة اتساعا وضيقا مسببة اجهاد للعين ثم حدوث صداع شديد

تانى حاجة لازم يكون المشاهد جالسا جلسة مستوية ومريحة يعنى غلط اشاهده منبطحا او نائم او من زاوية (( وللاسف انا بالنسبة لى احلى مشاهدة وانا نايمة ادام التليفزيون ))

تالت حاجة هى ان جهاز التليفزيون يكون ف مستوى النظر يعنى مش مرتفع ولا منخفض لان ارتفاعه او انخفاضه يؤدى الى اجهاد مستمر ف عضلات الرقبة ومع طول وقت المشاهدة يحدث الم ف الرقبة والظهر والعينين وقد يصاب مدمن المشاهدة بشد عصبى وصداع شديد

اخر حاجة ان الصورة لازم متكونش مهزوزة لان ده بيؤدى لارهاق العين وياريت نضبط الالوان من ازرار ضبط الصورة للوصول لافضل صورة مريحة للعين

المفروض بجد منستهونش بالنصايح البسيطة دى لان البصر ده نعمة غيرنا محروم منها لازم نحافظ عليها ومنفرطش فيها بعادات غلط بنعملها عادى يوميا