بتاع الجمل وبتاع الحمار




راكب من يومين تاكسى ومعايا شنط قد كدة خالى باعتنى بيهم لبيت بنته اللى بيجهزوها للجواز كمان يومين ( وطبعا مابيلاقوش شغال و شيال وموصلاتى غيرى فى العيلة دى ) وماشيين فى قلب المدينة فى عز الحر والزحمة وصوت الكلاكسات الصادر من سائقى الميكروباصات دون توقف ( وكأن سواقين الميكروباصات شاريين كلاكس ومركبينله عربية !! ) . . . . وكالعادة الطريق واقف . . . .

لكن المرة دى الطريق واقف اطول من الازم لدرجة ان ابويا اللى واخدها مشى سبقنى !! . . . وبعد استفسارات عديدة عن سبب توقف الطريق . . . وبعد ان اخترع كل شخص اسباب توقف الطريق . . . فهذا احدهم يعلل اسباب توقف الطريق بوجود كمين للسيارات اللورى على آخر الطريق ( رغم ان مفيش ولا عربية لورى ظاهرة على الطريق !! ) . . . وآخر يقول ان المحافظ معدى بالموكب بتاعه ( تقولش موكب الريس . . ده المحافظ بتاعنا ده آخره يمشى بعربيه وقدامها موتوسيكل اذا وجد اساسا !! ) . . . وثالث بيستظرف وبيقول ان فى عربية خابطة وزة معدية !! ( اصلها نقصة استظراف امه ) . . . . . حتى اتانا الخبر اليقين . . . .
انه الموكب . . . ولكنه ليس موكب المحافظ ولا الرئيس . . . ولكنه موكب . . .
الجمال ( بكسر الجيم )!!!
آه والله موكب جمال معدى . . . وهو اللى موقف الطريق . . . والسبب ان الجمال واحد منهم سرح وطلع على الكوبرى وجرى الراجل وراه عشان يجيبه راحت الجمال التانية هايجة وحدث هرج ومرج . . . واذا بى انا وسائق التاكسى نشاهد جمل من الجمال التى انتشرت بطول الطريق . . . يهرول مسرعا فى اتجاه السيارة . . . وما ان شاهده السائق حتى جن جنونه . . .
السواق : ايه ده ايه ده . . . حاسب حاسب . . . العربية عليها اقساط الله يخربيتك . . .
انا ببرود : وانت لما هاتقول للجمل ان العربية عليها اقساط هاياخد باله يعنى ؟؟!!!
ولقيت السواق بيدى مارشيدير وبيرجع بالعربية لورا بسرعة عشان يوسع من سكة الجمل . . . وهوب لبسنا من ورا فى جمل تانى كان سارح بارضو !!! . . . وبقى جمل قدام وجمل ورا . . وكأن الجملين قاصدين العربية اللى احنا فيها . . . .
ولقينا بوذ الجمل اللى قدام لازقة فى زجاج السيارة الامامى . . . وبوذ الجمل التانى لازقة زجاج السيارة الخلفى !!! . . . وطبعا التاكسى اتطبق من قدام ومن ورا
انا ببرود اكثر : ياختى على جمالهم . . . قمرين دول ولا بوذين؟!!
سواق التاكسى : . . . . . . . . .
انا بنفس البرود : انت ماببتردش ليه . . . بقولك مش الاتنين اجمل من بعض والنبى !!
السواق : . . . . . . . . . . . . . . .
وعرفت بعد كدة ان السواق اغم عليه بعد ماشاف الدمار اللى حل على العربية وراح فى ثبات عميق . .
شوية ولقيت الزجاج الامامى بيتكسر والجمل بيحاول يدخل دماغه منه . . وقد كان . . تخيلوا بقى المنظر . . . والجمل حاطط بوذه فى بوذى رشق وبيدينى احلى قبله ( فرينش ) فى التاريخ . . ولا قبلة دى كابريو لـكيت وينسلت فى فيلم تايتانك !! . . وسط تصفيق حاد من سائقى الميكروباص المنتشرين حولى واللى استلمونى تريقة . . .
وآخيرا جائت النجدة بعد مرور اكثر من ساعة ونص من انغلاق الطريق !!!
الظابط : ايه اللى انت عامله ده . . .
انا ببلاهة : زى مانت شايف يا سعادة الباشا . . . الجمل شبط فيا !!
الظابط مناديا للعساكر اللى معاه : خرجوا الجمال دى من على السكة واخلو الطريق فورا . . .
وقام العساكر باخلاء الطريق وتجميع الجمال على جنب . . . وحاولت جاهدا ان افتح الباب واخرج من التاكسى . . . الا ان الباب كان مربط فى بعضه من شدة الارتطام وخرجت اخيرا من الزجاج الامامى المكسور وخرًجت الشنط من الشبابيك !!!
الطريف انى اول ما حاولت امشى بالشنط لقيت الجمل اللى كان معايا راجعلى تانى وشبطان فيا والا لازم يمشى معايا . . .
الظابط : خلاص يابنى . . . هاتيجى معانا القسم مادام الجمل لازق فيك كدة . . .
انا : طب وانا مالى ؟؟؟
الظابط : ماهو الجمل طول ما هو لازق فيك كدة مش هانعرف نمشى بيه . . . لازم تبقى معانا انت كمان عشان يرضى يتحرك . . انت عملت ايه للجمل خلاه مش راضى يسيبك كدة ؟!!!
انا على طريقة اللمبى : قلب الام بقى !!!
الظابط : طب يلا . . . اتفضل معانا
انا : بس ياباشا انا معايا شنط لازم تروح لصحابها فى اقرب وقت عشان دى بتاعة ناس والناس دى مرتبطة بمعاد قطر كمان نص ساعة . . . و
الظابط : خلاص خلاص . . انت هاتحكيلى قصة حياتك . . . هانوديك مشوارك الاول ترمى هناك الشنط دى . . . وبعدين تكمل معانا . . .
انا : وهاروح المشور بقافلة الجمال دى ؟؟ !!!
الظابط : للاسف آه . . . احنا ما صدقنا نسيطرعليهم !

واترك لكم ان تخيلوا منظرى وانا راكب على ظهر الجمل بالشنط وماشى فى الشارع ولا صقر قريش فى عزه . . . . لا وكمان قابلت وانا ماشى بالجمل ده 3/4 معارفى . . . واللى يطلع الموبايل ويصور . . . واللى يغنيلى اغنية ليلى مراد ( ياريحين للنبى !! ) . . . ولا العيال الصغيره اللى كانت بتهتف الهتاف الشعبى الشهير ( العبيط اهوه !! ) وطبعا الظابط راكب قدام فى البوكس ومكبر دماغه على الآخر . . . . .

الى ان جاء اهم حدث فى الرحلة . . . وهو الوصول اللى الشقة . . . وطبعا كان مستنينى فى الشقة ابويا وامى وخالى . .

انا مناديا من تحت ( ولا كأنى بنادى على بليلة ) : يا امًااااااا . . . يابااااااااااااااا . . . ياخالااااااااى
ابويا وامى وخالى يخرجون فى لحظة واحدة من البلكونة فأذا بهم يصدمون من هول مايرون . . .
خالى على طريقة يوسف وهبى : يال الهول . . . !!
امى : ياختى عليه وعلى حلاوته . . . . وتشاور الى الستات اللى واقفين فى البلكونات اللى حوالينا وتقول . . ابنى . . اسم النبى حارسه بقى تاجر مواشى قد الدنيا !!
ابويا : يخربيتك هاتودينا فى داهية . . . انت سرقت الجمال دى منين ياض . . . وايه البوكس ده كمان . . .
وبعد شرح مستفيض . . . فهم والدى الامر . . . .
ولكن وآه من لكن هذه . . .
نص اللى كان فى الشنط وقع منها اثناء سيرى بالجمل !!!!!

وما كان منى الا ان التفت الى الظابط طالبا منه ان نغادر المكان فورا قبل ان يكتشف احدا الموضوع . . . وبالفعل رحلنا بالقافلة مرة اخرى . . وحمدا لله تم فى الزريبة المجاورة للقسم تخليصى من هذا الجمل الذى اكتشفت بعد ذلك انهم كانوا واخدينه من جماعته عافيه اثناء اجتماعه بها ( غالبا كان عايز يعملنى استبن بدل الجماعة . . هو انا بقيت موزًه على آخر الزمن وانا مش واخد بالى ولا ايه !!! )

المهم خرجت من القسم وانا يملأنى الاحساس بالحرية . . . وفتحت الموبايل لقيت فيه 3 رسايل . . . واحدة من امى وواحدة من ابويا وواحدة من خالى . . . وكانوا كالتالى . . .
خالى : فين الهدوم يا نصاب ياحرااااامى . . ياللى بتمشى مع حيوانات فى السر . . يا بتاع الجمل . !!!!!
( هى وصلت لانى بقيت بتاع الجمل ؟!!! )

ابويا : كسفتنى وعرتنى قدام الناس . . . يعنى اهبل وجايلى راكب جمل وقولنا ماشى . . . انما كمان حرامى . . . اوعى اشوفك فى البيت لما ارجع يا حيوان !!

امى : ابنى . . اللى رافع راسى . . . اللى هايجيبلنا اللحمة ببلاش . . . ربنا يحميك يا ضنايا !!

بعد ماقريت الرسايل كلها شاورت لتاكسى وركبت . . لقيته مشغل اغنية بتقول . . بحبك ياحمار . . . بحبك ياحمار . . . ده انا بزعل اوى لما . . حد يقولك ياحمار !!
انا سائلا السائق : مين اللى بيغنى ده يا اسطى ؟؟
السواق : ده سعد الصغير . . . بتاع الحمار !!!
انا : بتاع الحمار ؟؟؟ . . . . يعنى مش انا لوحدى !!