طووووووووول عمرنا احنا المصريين وبنربط الحاجات اللي ملهاش علاقه ببعضها ببعض

ممكن تقول قدره

ممكن تكون فهلوة

او تكون بلطجة


يعني اللحمة يزيد سعرها يقولك اصل السمك ماله


الطماطم تبئي بخمسه جنيه يقولك اصل البنزين غلي


ايه العلاقه مش عارفه بس المهم يكون فيه مبرر بصرف النظر بئه المبرر ده صح ولاغلط مش دي القضيه


طيب الاسعار ولعت هتعملوا ايه يا ناس

يردوا يقولوا هنعمل ايه يعني












هناكل فراخ



لسه الكادر اللي بقالهم سنين وسنين منشفين ريء الموظفين عليه

بيدرسوا فيه بئالهم قرن ( تئولش هيزودوا الموظف الف جنيه في الشهر )

يادوب يادوب لسه مطبق الشهر ده ويمكن الناس لسه مأبضتش وشوف الاسعار عملت ايه


كليو البطاطس بعد ما كان بــ جنيه ونص بئي تلاته جنيه

بعد الطماطم ماكانت الكيلو ونص بجنيه بئت الكيلو بإتنين جنيه

كليو الفراخ بعشره جنيه بعد ما كان بسبعه جنيه

كيس المكرونه( العاديه ) كان بجنيه وربع بئه بجنيه ونص

طبق البيض كان بتمانيه جنيه ونص انهارده بئه باتناشر جنيه

واليكم المفاجئه ..

العيش

يعني لما حد مش هيلاقي اللضا هنقول ياكل العيش حاف

وبما ان العيش اللي بيتباع في الافران لا يسر عدو ولا حبيب

دا غير الحرب الضروس اللي بيمر بيها في طابور العيش




يعني الواحد لو حب يحس بادميته ويشتري عيش يتاكل من المحلات

كان العشر ارغفه بجنيه

خفضوها لتماني ارغفه ومتكلمناش

انهارده اصبح 6 ارغفه بجنيه ( ومتستغربوش ابدا لما تعرفوا ان قطر الرغيف من 17:19سم )

اما سُمكه يمكن سم او اقل

شوفوا بئه الاسره تاكل عيش حاف بكام في اليوم



فين المستهلك من كل ده !!

ليه مش بناخد موقف ؟؟

ليه بنلاقي حلول دايما اللحمة غلت هناكل فراخ ان مكنش فراخ نقلب علي السمك

الطماطم غلت هنعمل ايه يعني مضطرين نشتري وفي بؤنا ..............

حتي التوم والبصل الدوله بتصدرهم والشعب مش لاقي

ليييييييييييه

مش هنموت لو مكلناش كل الكلام ده والله

ده احنا نعيش علي الميه بس منتبهدلش البهدله دي



ولا احنا خلاص عيشتنا بئت كده
وفي الاخر كلمة نفسي اقولها للريس من زمان اوي واجري علي الله


الله يكرمك ويعدلك في عيالك يا شيخ احنا لا عايزين علاوات ولا كادر ولا يحزنون

احنا كده فل اوي

لا مؤخذه عالم فئريه بئه تقول ايه


ويجعله عااااااااااامر

محمد سعيد